ກອງປະຊຸມໃຫຍ່ຜູ້ແທນອົງຄະນະພັກເມືອງຈຳພອນ ແຂວງສະຫວັນນະເຂດ ຄັ້ງທີ IX ໄດ້ໄຂຂຶ້ນຢ່າງເປັນທາງການໃນວັນທີ 13 ມີນານີ້ ທີ່ສະໂມສອນຂອງເມືອງ ໂດຍໄດ້ຮັບກຽດເຂົ້າຮ່ວມເປັນປະທານກິດຕິມະສັກຂອງສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີບັນດາແຂກທີ່ຖືກເຊີນ ແລະ ສະຫາຍຜູ້ແທນສົມບູນ 195 ສະຫາຍ ຍິງ 21 ສະຫາຍ ທີ່ເປັນຕົວແທນໃຫ້ສະມາຊີກພັກທົ່ວເມືອງ ເຂົ້າຮ່ວມ.
ໃນພິທີ, ສະຫາຍ ບຸນຊູ ທຸ່ນຊົມພູ ວ່າການເລຂາພັກເມືອງ ວ່າການເຈົ້າເມືອງຈຳພອນໄດ້ກ່າວໄຂກອງປະຊຸມໃຫຍ່ຢ່າງເປັນທາງການ. ຈາກນັ້ນ, ສະຫາຍ ດວງຈັນ ວຽງວິໄລ ຮອງເລຂາພັກເມືອງ ປະທານກວດກາພັກ-ລັດເມືອງ ໄດ້ຜ່ານຮ່າງບົດລາຍງານການເມືອງຕໍ່ກອງປະຊຸມໃຫຍ່ ເພື່ອຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກເມືອງຈຳພອນ ຄັ້ງທີ VIII ໄລຍະ 5 ປີຜ່ານມາ (2020-2024). ຜ່ານການຈັດຕັ້ງປະຕິບັດທົ່ວເມືອງ ສາມາດຮັບປະກັນໄດ້ສະຖຽນລະພາບດ້ານການເມືອງ, ສັງຄົມມີຄວາມສະຫງົບ, ບັນຫາປະກົດການຫຍໍ້ທໍ້ໃນສັງຄົມ ແລະ ພາຍໃນການຈັດຕັ້ງພັກ-ລັດ ໄດ້ຮັບການເອົາໃຈໃສ່ແກ້ໄຂຢ່າງຖືກຕ້ອງເໝາະສົມ, ການປັບປຸງພັກໃຫ້ປອດໃສ, ເຂັ້ມແຂງ, ໜັກແໜ້ນ ບັນລຸໄດ້ໂດຍພື້ນຖານ, ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໄດ້ຮັບການຍົກລະດັບດີຂຶ້ນກວ່າເກົ່າ, ໄດ້ນໍາພາ-ຊີ້ນໍາກໍາລັງປ້ອງກັນຊາດ-ປ້ອງກັນຄວາມສະຫງົບ ເຄື່ອນໄຫວກຳແໜ້ນສະພາບການຢ່າງຮອບດ້ານ, ນໍາເອົາແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ໄປຈັດຕັ້ງຜັນຂະຫຍາຍ ດ້ວຍການໂຄສະນາເຂົ້າສູ່ລວງເລິກ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ໃຫ້ກາຍເປັນໜ້າທີ່ຄວາມຮັບຜິດຊອບຂອງທຸກພາກສ່ວນໃນສັງຄົມ; ໄດ້ນຳພາສ້າງຄອບຄົວ-ບ້ານປ້ອງກັນຊາດເຂັ້ມແຂງໄດ້ 100 ບ້ານ, ເທົ່າກັບ 99% ຂອງບ້ານທັງໝົດ, ສ້າງບ້ານປ້ອມໝັ້ນສູ້ຮົບຕິດລຽນ 2 ບ້ານ ແລະ ກຸ່ມບ້ານສູ້ຮົບຕິດລຽນໄດ້ 2 ກຸ່ມບ້ານ, ສ້າງຄອບຄົວ ແລະ ບ້ານປ້ອງກັນຄວາມສະຫງົບດີ 100 ບ້ານ ເທົ່າກັບ 99%, ສ້າງບ້ານປອດຢາເສບຕິດໄດ້ 100 ບ້ານ, ເທົ່າກັບ 99% ລື່ນຄາດໝາຍ 4% ຂອງແຜນ 5 ປີ; ດ້ານວຽກງານເສດຖະກິດ: ໄດ້ນໍາໃຊ້ທ່າແຮງບົ່ມຊ້ອນ ແລະ ກຳລັງແຮງຂອງທຸກພາກສ່ວນສັງຄົມເຂົ້າໃສ່ການພັດທະນາເສດຖະກິດ ໃຫ້ສືບຕໍ່ຂະຫຍາຍຕົວຢ່າງຕໍ່ເນື່ອງ ໂດຍການສຸມໃສ່ແກ້ໄຂປັບປຸງລະບອບ, ລະບຽບການ, ກົນໄກຄຸ້ມຄອງ-ບໍລິຫານ, ລະບົບພື້ນຖານໂຄງລ່າງ ເພື່ອເອື້ອອໍານວຍໃຫ້ແກ່ການຜະລິດ-ທຸລະກິດ ສາມາດເຮັດໃຫ້ເສດຖະກິດຂອງເມືອງຂະຫຍາຍຕົວ ແລະ ມີອັດຕາການເຕີບໂຕສະເລ່ຍໃນລະດັບ 5.49% ລວມຍອດຜະລິດຕະພັນພາຍໃນ (GDP) ບັນລຸ 2,853.49 ຕື້ກີບ, ສະເລ່ຍໃສ່ຫົວຄົນໄດ້ 23.30 ລ້ານກີບ/ຄົນ/ປີ ຫຼື ເທົ່າກັບ 1,059 ໂດລາສະຫະລັດ. ຈາກນັ້ນ, ສະຫາຍ ຄຳຕາ ສີນນະສອນ ຄະນະປະຈຳພັກເມືອງ ຮອງເຈົ້າເມືອງ ໄດ້ຜ່ານຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2020-2024) ພ້ອມນັ້ນ ບັນດາສະຫາຍຕາງໜ້າໃຫ້ຂົງເຂດຕ່າງໆ ທີ່ເຂົ້າຮ່ວມກອງປະຊຸມ ໄດ້ປະກອບຄຳຄິດຄຳເຫັນຢ່າງກົງໄປກົງມາ
ກອງປະຊຸມຄັ້ງນີ້, ບັນດາສະຫາຍຜູ້ແທນສົມບູນ ຈະໄດ້ປ່ອນບັດເລືອກຕັ້ງເອົາຄະນະບໍລິຫານງານພັກເມືອງຈຳພອນຊຸດໃໝ່ ແລະ ຈະເລືອກເອົາຜູ້ແທນສົມບູນ-ສຳຮອງເຂົ້າຮ່ວມກອງປະຊຸມໃຫຍ່ອົງຄະນະພັກແຂວງສະຫວັນນະເຂດ ຄັ້ງທີ X ນຳອີກ.
(ແຫຼ່ງຂ່າວ: ແຂວງສະຫວັນນະເຂດ)
