ວັນທີ 13 ມີນານີ້, ເມືອງຊານໄຊ ແຂວງອັດຕະປື ໄດ້ໄຂກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ XIV ຂຶ້ນທີ່ຫ້ອງປະຊຸມ ກອງບັນຊາການ ປ້ອງກັນຄວາມສະຫງົບເມືອງ ພາຍໃຕ້ການເປັນປະທານຂອງ ສະຫາຍ ຫັດສະໄນ ສີບຸນເຫຼືອງ ກໍາມະການພັກແຂວງ ເລຂາພັກເມືອງ ວ່າການເຈົ້າເມືອງຊານໄຊ, ເປັນກຽດເຂົ້າຮ່ວມມີ ສະຫາຍ ພົນໂທ ວັນທອງ ກອງມະນີ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື, ມີແຂກຖືກເຊີນ ແລະ ຜູ້ແທນສົມບູນ 155 ສະຫາຍ ຍິງ 16 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວເມືອງ ທັງໝົດ 1,380 ສະຫາຍ.

ສະຫາຍ ຫັດສະໄນ ສີບຸນເຫຼືອງ ໄດ້ມີຄຳເຫັນກ່າວໄຂກອງປະຊຸມວ່າ: ກອງປະຊຸມໃຫຍ່ຄັ້ງນີ້, ຜູ້ແທນກອງປະຊຸມຈະໄດ້ພ້ອມກັນພິຈາລະນາຮັບຮອງເອົາ ບົດລາຍງານການເມືອງ ຊຶ່ງຈະໄດ້ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIIl ຂອງອົງຄະນະພັກເມືອງ, ພ້ອມທັງຖອດຖອນບົດຮຽນທີ່ເປັນປະໂຫຍດ ແລະ ພິຈາລະນາຮັບຮອງເອົາ ແຜນພັດທະນາເສດຖະກິດ- ສັງຄົມ 5 ປີ ຕໍ່ໜ້າແຕ່ປີ 2025-2029 ແລະ ຈະໄດ້ສຳຫຼວດຕີລາຄາການນຳພາຂອງຄະນະບໍລິຫານງານພັກເມືອງສະໄໝທີ XIIl ແລະ ດໍາເນີນການເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່.

ພ້ອມນັ້ນໃນກອງປະຊຸມ ສະຫາຍ ນາງ ແກ້ວສະໝອນ ແກ້ວນະສັກ ຮອງເລຂາພັກເມືອງ ປະທານແນວລາວສ້າງຊາດ ໄດ້ຜ່ານບົດລາຍງານການເມືອງທັງສອງພາກ, ຮັບຟັງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ lX ໄລຍະແຕ່ປີ 2020-2024, ແລະ ທິດທາງແຜນການ 5 ປີ ຄັ້ງທີ X, ຜ່ານບົດສໍາຫຼວດນໍາພາລວມຂອງຄະນະບໍລິຫານງານພັກເມືອງສະໄໝ ທີ XIIl. ກອງປະຊຸມຄັ້ງນີ້, ຍັງຈະໄດ້ຮັບຟັງການປະກອບຄຳຄິດຄຳເຫັນ ຂອງບັນດາຂະແໜງການ, ຕົວແບບດ້ານຕ່າງໆຂອງເມືອງ ແລະ ຜູ້ແທນກອງປະຊຸມຈະໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນຳພາ-ຊີ້ນໍາຈັດຕັ້ງປະຕິບັດມະຕິກອງປະຊຸມໃຫຍ່ຂອງຄະນະພັກເມືອງ ຄັ້ງທີ XIV ໃຫ້ບັນລຸຜົນສໍາເລັດຕາມລະດັບຄາດໝາຍທີ່ວາງໄວ້.

(ຂ່າວ: ສຸກສະຫວ່າງ)