ພາຍຫຼັງການລາຍງານການປັບປຸງລັດຖະທໍາມະນູນ ປີ 2025 ໃນວາລະກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃນວັນທີ 17 ມີນານີ້ ທີ່ຫໍສະພາແຫ່ງຊາດ; ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ກໍໄດ້ມີຄໍາຖາມເຈາະຈີ້ມ ຕໍ່ຮ່າງລັດຖະທໍາມະນູນດັ່ງກ່າວ ໂດຍສະເໜີໃຫ້ບັນດາທ່ານສະມາຊິກສະພາແຫ່ງຊາດ (ສສຊ) ມີຄໍາເຫັນຢ່າງມີຈຸດສຸມຕໍ່ບາງມາດຕາ ທີ່ເພີ່ມໃໝ່ ແລະ ປັບປຸງ ດັ່ງນີ້:
    ມາດຕາ 11, 103, 104, 105 ແລະ ມາດຕາ 106 ເປັນມາດຕາທີ່ໄດ້ກໍານົດເຂົ້າໃໝ່, ບັນດາທ່ານເຫັນວ່າການກໍານົດເນື້ອໃນຄືດັ່ງກ່າວ ມີຄວາມຄົບຖ້ວນ, ຮັດກຸມ ແລະ ເຫັນດີຕາມການກໍານົດນັ້ນບໍ່?; 
ມາດຕາ 47 ໄດ້ກໍານົດເພີ່ມເປັນວັກທີສອງ ແລະ ສາມ ການກໍານົດເພີ່ມສອງວັກດັ່ງກ່າວ ໃນມາດຕາ ນີ້ ກໍເພື່ອເພີ່ມສິດຂອງຄົນລາວທີ່ອາໄສຢູ່ຕ່າງປະເທດ ໃຫ້ຄົບຖ້ວນ, ຈະແຈ້ງ ແລະ ຮັດກຸມ ຕໍ່ກັບເນື້ອໃນດັ່ງກ່າວ ບັນດາທ່ານເຫັນດີກັບການກໍານົດນັ້ນບໍ່ ຫຼື ຈະກໍານົດຄືແນວໃດ ເພື່ອໃຫ້ສາມາດຈັດຕັ້ງປະຕິບັດໄດ້ຢ່າງມີປະສິທິພາບ, ປະສິດທິຜົນ?.
ມາດຕາ 57 ໂດຍສະເພາະຂໍ້ 4 ແຕ່ງຕັ້ງ, ຍົກຍ້າຍ ຫຼື ປົດຕໍາແໜ່ງ ຫົວໜ້າຄະນະສານຂອງສານປະຊາຊົນສູງສຸດ, ປະທານສານປະຊາຊົນພາກ ແລະ ຜູ້ພິພາກສາຂອງສານປະຊາຊົນ; ຂໍ້ 5 ແຕ່ງຕັ້ງຄະນະກໍາມະການ ໄອຍະການປະຊາຊົນສູງສຸດ; ຂໍ້ 7 ໄດ້ປັບປຸງຄື: ພິຈາລະນາ, ຕົກລົງ ການໃຫ້ສັດຕະຍາບັນ, ການເຂົ້າຮ່ວມເປັນພາຄີ ຫຼື ການຍົກເລີກ ສົນທິສັນຍາ ທີ່ ສາທາລະນະລັດ ປະຊາທິປະໄຕ ປະຊາຊົນລາວ ເປັນພາຄີ; ຕໍ່ກັບການປັບປຸງເນື້ອໃນຄືດັ່ງກ່າວ ບັນດາທ່ານເຫັນດີລະບໍ່ ຫຼື ຈະມີຄໍາເຫັນປັບປຸງຫຍັງຕື່ມ?.
ມາດຕາ 54 ແລະ ມາດຕາ 71 ໄດ້ກໍານົດເພີ່ມ ວິໄສທັດ ໃສ່ໜ້າຄໍາວ່າ “ແຜນຍຸດທະສາດ” ນັ້ນ ບັນດາທ່ານເຫັນວ່າສອດຄ່ອງ ແລະ ເໝາະສົມແລ້ວບໍ່?;
ມາດຕາ 80 ກ່ຽວກັບສິດ ແລະ ໜ້າທີ່ຂອງຄະນະປະຈໍາສະພາປະຊາຊົນຂັ້ນແຂວງ ໄດ້ເພີ່ມຂໍ້ 3 ແລະ ຂໍ້ 4 ຄື: ຂໍ້ 3: ພິຈາລະນາ, ຮັບຮອງເອົາການສະເໜີແຕ່ງຕັ້ງ, ຍົກຍ້າຍ ຫຼື ປົດຕໍາແໜ່ງ ບຸກຄະລາກອນຂອງສານປະຊາຊົນ ຕາມທີ່ໄດ້ກໍານົດໄວ້ໃນກົດໝາຍ; ຂໍ້ 4: ພິຈາລະນາ, ຮັບຮອງເອົາການສະເໜີແຕ່ງຕັ້ງຄະນະກໍາມະການໄອຍະການປະຊາຊົນທ້ອງຖິ່ນ  ຕໍ່ກັບການກໍານົດເນື້ອໃນເຂົ້າໃໝ່ຄືແນວນັ້ນ   ບັນດາທ່ານເຫັນວ່າມີຄວາມສອດຄ່ອງ,   ຮັດກຸມ   ແລະ  ແທດເໝາະກັບການຈັດຕັ້ງປະຕິບັດຕົວຈິງແລ້ວບໍ່?;
ມາດຕາ 86 ວັກທີສອງ ໄດ້ກໍານົດວ່າ ສໍາລັບບ້ານ ແມ່ນການຈັດຕັ້ງຊຸມຊົນ ຫຼື ການຈັດຕັ້ງຮາກຖານ. ບັນດາທ່ານເຫັນດີແນວໃດ?;
ມາດຕາ 91 ວັກທີສອງ ໄດ້ກໍານົດເພີ່ມ: ສານປະຊາຊົນສູງສຸດ ກວດກາ, ສັງລວມການຕັດສິນຄະດີຂອງສານປະຊາຊົນ ແລະ ຄຸ້ມຄອງຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ. ຕໍ່ກັບການກໍານົດຄືແນວນັ້ນ ບັນດາທ່ານເຫັນວ່າສອດຄ່ອງ ແລະ ເໝາະສົມແລ້ວບໍ່ ໂດຍສະເພາະບັນຫາການຄຸ້ມຄອງຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ?;
ມາດຕາ 98 ກ່ຽວກັບການກໍານົດ ແລະ ສັບຊ້ອນຈັດລຽງທີ່ຕັ້ງ, ພາລະບົດບາດຂອງ ອົງການໄອຍະການປະຊາຊົນ ແມ່ນອົງການສັ່ງຟ້ອງຜູ້ຖືກຫາຂຶ້ນສານ ແລະ ຕິດຕາມກວດກາການເຄົາລົບ ແລະ ປະຕິບັດກົດໝາຍ ໃນການດໍາເນີນຄະດີຕາມຂະບວນຍຸຕິທໍາ ນັ້ນ ບັນດາທ່ານເຫັນວ່າມີຄວາມສອດຄ່ອງ ແລະ ເໝາະສົມ ແລ້ວບໍ່?;
ມາດຕາ 102 ໄດ້ຕັດປະໂຫຍກທີ່ວ່າ ແລະ ຄໍາສັ່ງຂອງຫົວໜ້າອົງການໄອຍະການປະຊາຊົນສູງສຸດ ອອກ ຊຶ່ງການຕັດປະໂຫຍກດັ່ງກ່າວອອກ ເພື່ອບໍ່ໃຫ້ເປັນຊ່ອງວ່າງໃນການຈັດຕັ້ງປະຕິບັດ ບັນດາທ່ານເຫັນວ່າສອດຄ່ອງ ແລະ ເໝາະສົມແລ້ວບໍ່?.
ມາດຕາ 111 ກ່ຽວກັບຄະນະກໍາມະການເລືອກຕັ້ງ ໄດ້ປັບປຸງເນື້ອໃນວັກທີສາມ ຄື ຄະນະກໍາມະການເລືອກຕັ້ງລະດັບທ້ອງຖິ່ນ ແມ່ນການຈັດຕັ້ງທີ່ຄະນະປະຈໍາສະພາປະຊາຊົນທ້ອງຖິ່ນ ເປັນຜູ້ຕົກລົງສ້າງຕັ້ງ ແລະ ປະກາດເປັນທາງການ. ມີພາລະບົດບາດຈັດຕັ້ງປະຕິບັດແຜນການຂອງຄະນະກໍາມະການເລືອກຕັ້ງລະດັບຊາດ ໃນການເລືອກຕັ້ງ ສະມາຊິກສະພາແຫ່ງຊາດ, ສະມາຊິກສະພາປະຊາຊົນທ້ອງຖິ່ນ ໃນຂອບເຂດຄວາມຮັບຜິດຊອບຂອງຕົນ. ຕໍ່ກັບການປັບປຸງເນື້ອໃນຄືແນວນັ້ນ ບັນດາທ່ານເຫັນວ່າຄົບຖ້ວນແລ້ວບໍ່?;
ນອກຈາກມາດຕາທີ່ເພີ່ມເຂົ້າໃໝ່ ແລະ ປັບປຸງທີ່ໄດ້ສະເໜີມານັ້ນ, ທ່ານ ໄຊສົມພອນ ພົມວິຫານ ຍັງເນັ້ນໃຫ້ບັນດາທ່ານ ສສຊ ຫາກເຫັນວ່າຍັງມີເນື້ອໃນ ຂໍ້ກໍານົດ ຫຼື ມາດຕາໃດແດ່ ທີ່ຄວນສະເໜີ ກໍໃຫ້ສະເໜີກອງປະຊຸມພິຈາລະນາຕື່ມ, ແຕ່ໃຫ້ມີຄໍາເຫັນສຸມໃສ່ແຕ່ບັນດາມາດຕາທີ່ໄດ້ປັບປຸງເທົ່ານັ້ນ.
(ຂ່າວ: ສຸກສະຫວັນ, ພາບ: ຕຸໄລເພັດ)