ກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃນວັນທີ 18 ມີນານີ້ ທີ່ຫໍສະພາແຫ່ງຊາດ ໄດ້ດຳເນີນພາຍໃຕ້ການເປັນປະທານຂອງ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ, ກອງປະຊຸມໃນມື້ນີ້ ໄດ້ມີການສະເໜີປັບປຸງກົດໝາຍ ວ່າດ້ວຍການປົກຄອງທ້ອງຖິ່ນສະບັບປີ 2015 ເພື່ອໃຫ້ມີຄວາມຮັດກຸມ, ສອດຄ່ອງ ແນໃສ່ແກ້ໄຂບາງບັນຫາທີ່ຄົ້ງຄ້າງແລະ ບໍ່ສາມາດຈັດຕັ້ງປະຕິບັດໄດ້ດີ ເທົ່າທີ່ຄວນ.
ໃນກອງປະຊຸມ, ທ່ານວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ລາຍງານເຫດຜົນ ແລະ ຄວາມຈໍາເປັນໃນການປັບປຸງກົດໝາຍ ວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ 2015ວ່າ: ພາຍຫຼັງທີ່ກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ 2015ໄດ້ຖືກຮັບຮອງ ແລະ ປະກາດໃຊ້, ກະຊວງພາຍໃນ ໃນນາມທີ່ເປັນເສນາທິການໃຫ້ລັດຖະບານ ກໍໄດ້ເອົາໃຈໃສ່ເຜີຍແຜ່, ເຊື່ອມຊຶມ ແລະ ແຈກຢາຍ ໃຫ້ບັນດາກະຊວງ-ອົງການຂັ້ນສູນກາງ ແລະ ອົງການປົກຄອງທ້ອງຖິ່ນແຕ່ລະຂັ້ນໃນຂອບເຂດທົ່ວປະເທດ, ໄດ້ຜັນຂະຫຍາຍເປັນນິຕິກຳລຸ່ມກົດໝາຍຈໍານວນ 13ສະບັບ; ບັນດາອົງການຂັ້ນສູນກາງ ແລະ ທ້ອງຖິ່ນໄດ້ຕັ້ງໜ້າຜັນຂະຫຍາຍ ແລະ ຈັດຕັ້ງປະຕິບັດກົດໝາຍສະບັບດັ່ງກ່າວ ເຂົ້າໃນການຄຸ້ມຄອງບໍລິຫານລັດໃນດ້ານຕ່າງໆ ຂອງອົງການປົກຄອງແຕ່ລະຂັ້ນແລະ ໄດ້ຮັບຜົນສໍາເລັດເປັນຢ່າງດີໂດຍພື້ນຖານ.
ນັບແຕ່ປີ 2021ເປັນຕົ້ນມາ, ກະຊວງພາຍໃນໄດ້ມີການປະເມີນການຈັດຕັ້ງປະຕິບັດ ແລະ ພ້ອມທັງທາບທາມທິດທາງໃນການປັບປຸງກົດໝາຍດັ່ງກ່າວ ຢູ່ທ້ອງຖິ່ນຈໍານວນໜຶ່ງ. ຜ່ານການຕີລາຄາການຈັດຕັ້ງປະຕິບັດກົດໝາຍ ຊຶ່ງເຫັນວ່າມີບາງບັນຫາທີ່ຄ້າງຄາ ແລະ ບໍ່ສາມາດຈັດຕັ້ງປະຕິບັດໄດ້ດີ ເທົ່າທີ່ຄວນ. ນອກນັ້ນ, ຍັງມີກຸ່ມບ້ານຊຶ່ງຖືກສ້າງຕັ້ງຂຶ້ນຕາມມະຕິ 09/ກມສພ, ເປັນຂອດລະຫວ່າງກາງລະຫວ່າງ ເມືອງ ກັບ ບ້ານ ເຮັດວຽກຄ້າຍຄືຂັ້ນການປົກຄອງ, ແຕ່ບໍ່ແມ່ນຂັ້ນຂອງການປົກຄອງ; ພ້ອມດຽວກັນນັ້ນ, ໃນຕົວເນື້ອໃນຂອງກົດໝາຍວ່າດ້ວຍການປົກຄອງທ້ອງຖິ່ນ ສະບັບປີ 2015 ມີບາງມາດຕາຍັງບໍ່ທັນສອດຄ່ອງກັບກົດໝາຍອື່ນທີ່ກ່ຽວຂ້ອງ. ສັງລວມແລ້ວ, ການບໍລິຫານຂັ້ນຮາກຖານ ຍັງບໍ່ທັນເຂັ້ມແຂງດີເທົ່າທີ່ຄວນ, ການບໍລິຫານລັດຂັ້ນຮາກຖານຍັງມີລັກສະນະເຄິ່ງໆກາງໆ ຊອດກະຈາ ລະຫວ່າງອົງການບໍລິຫານລັດຂັ້ນລຸ່ມສຸດ ກັບການຈັດຕັ້ງຊຸມຊົນ.
ການສະເໜີປັບປຸງກົດໝາຍດັ່ງກ່າວ ກໍເພື່ອໃຫ້ສອດຄ່ອງນິຕິກໍາຈໍານວນໜຶ່ງທີ່ສູນກາງວາງອອກນັ້ນເປັນຕົ້ນແມ່ນມະຕິວ່າດ້ວຍສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ ສູ່ລ່ວງເລິກສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ ສະບັບເລກທີ 05/ຄບສພ, ຄໍາສັ່ງວ່າດ້ວຍການຄາດຄະເນແບ່ງຄວາມຮັບຜິດຊອບຂອງຄະນະປະຈຳພັກ ແຕ່ລະຂັ້ນສະບັບເລກທີ 173/ຄລສພ, ແຈ້ງການກ່ຽວກັບການແບ່ງງານໃຫ້ສະຫາຍຮອງເລຂາຄະນະບໍລິຫານງານພັກເມືອງ-ນະຄອນ ສະບັບເລກທີ56/ຄຈສພ, ແຈ້ງການກ່ຽວກັບທິດຊີ້ນໍາກ່ຽວກັບການສ້າງຕາແສງໃນຂອບເຂດທົ່ວປະເທດ ສະບັບເລກທີ 04/ຫສພ ແລະ ຮ່າງລັດຖະທຳມະນູນສະບັບປັບປຸງ ປີ 2025.ໂດຍອີງໃສ່ທິດນໍາດັ່ງກ່າວ, ລັດຖະບານໄດ້ຄົ້ນຄວ້າປັບປຸງກົດໝາຍດັ່ງກ່າວ ເປັນຕົ້ນແມ່ນການຄົ້ນຄວ້າອົງການປົກຄອງຕາແສງເປັນກົງຈັກການປົກຄອງຂັ້ນລຸ່ມສຸດຢູ່ຮາກຖານ, ຫັນບ້ານ ໃຫ້ເປັນການຈັດຕັ້ງຂອງຊຸມຊົນ. ພ້ອມນັ້ນ, ກໍໄດ້ຄົ້ນຄ້ວາຊື່ເອີ້ນຕຳແໜ່ງບໍລິຫານ ຊຶ່ງໄດ້ລະບຸຊື່ເອີ້ນຂອງຫົວໜ້າອົງການປົກຄອງຂັ້ນແຂວງຈະແຈ້ງວ່າແມ່ນປະທານຄະນະກຳມະການປົກຄອງແຂວງ, ນະຄອນຫຼວງວຽງຈັນ; ຂັ້ນເມືອງ ແມ່ນປະທານຄະນະກຳມະການປົກຄອງເມືອງ, ນະຄອນ, ຂັ້ນຕາແສງ ແມ່ນປະທານຄະນະກຳມະການປົກຄອງຕາແສງ.
ທ່ານ ວິໄລວົງ ບຸດດາຄໍາ ກ່າວຕື່ມວ່າ: ບັນດາບັນຫາທີ່ຄ້າງຄາ ແລະ ນິຕິກຳຂອງຂັ້ນເທິງດັ່ງກ່າວມານັ້ນ, ແມ່ນເຫດຜົນຄວາມຈໍາເປັນ ທີ່ສໍາຄັນ ໃນການຄົ້ນຄວ້າປັບປຸງກົດໝາຍວ່າດ້ວຍການປົກຄອງທ້ອງຖິ່ນໃນຄັ້ງນີ້.ສໍາລັບດ້ານໂຄງສ້າງ ຮ່າງກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ2025ທີ່ນໍາສະເໜີພິຈາລະນາຄັ້ງນີ້ ປະກອບມີທັງໝົດ8ພາກ, 21ໝວດ, 81ມາດຕາ. ໃນນີ້, ເພີ່ມເຂົ້າໃໝ່ ຈໍານວນ 16ມາດຕາ, ປັບປຸງ ຈໍານວນ 62ມາດຕາ ແລະ ບໍ່ໄດ້ປັບປຸງ ຈໍານວນ3ມາດຕາ.
ຄາດຄະເນຜົນໄດ້ຮັບພາຍຫຼັງກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ 2025 ຖືກຮັບຮອງ ແລະ ປະກາດໃຊ້ຈະເປັນບ່ອນອີງອັນສໍາຄັນ ໃຫ້ແກ່ອົງການປົກຄອງທ້ອງຖິ່ນ ໃນການປັບປຸງຂັ້ນການປົກຄອງໃຫ້ມີຄວາມສອດຄ່ອງ ແລະ ແທດເໝາະກັບສະພາບເງື່ອນໄຂຕົວຈິງໃນແຕ່ລະທ້ອງຖິ່ນ ໂດຍສະເພາະການສ້າງຕາແສງເປັນການປົກຄອງຂັ້ນລຸ່ມສຸດ ເພື່ອເອື້ອອໍານວຍໃຫ້ບ້ານເປັນຫົວໜ່ວຍບໍລິຫານຊຸມຊົນຢ່າງແທ້ຈິງ;ເປັນບ່ອນອີງໃຫ້ແກ່ບັນດາກະຊວງ, ອົງການທີ່ກ່ຽວຂ້ອງໃນການປັບປຸງກົດໝາຍ ແລະ ນິຕິກຳລຸ່ມກົດໝາຍໃຫ້ສອດຄ່ອງຕາມແນວທາງນະໂຍບາຍຂອງພັກ-ລັດຖະບານ ແລະ ເປັນການແບ່ງຄວາມຮັບຜິດຊອບ, ແບ່ງຂັ້ນຄຸ້ມຄອງ ໃຫ້ອົງການປົກຄອງທ້ອງຖິ່ນແຕ່ລະຂັ້ນ ໃຫ້ແທດເຖິງ;ຮັບປະກັນບົດບາດການນໍາພາຂອງພັກຢ່າງໜັກແໜ້ນເຮັດໃຫ້ການນໍາພາຂອງພັກຢັ່ງເລິກເຖິງຫົວໜ່ວຍຮາກຖານຂອງປະເທດ; ສ້າງໃຫ້ເປັນກົງຈັກການປົກຄອງທີ່ຕິດແທດກິ້ງເກືອກລີເລືອ, ເປັນທີ່ເພິ່ງຂອງປະຊາຊົນບັນດາເຜົ່າ; ສາມາດນໍາເອົາແນວທາງນະໂຍບາຍ, ການບໍລິການຂອງລັດຫຍັບເຂົ້າເຖິງປະຊາຊົນໄດ້ຢ່າງທົ່ວເຖິງ;ຍົກລະດັບການປົກຄອງລັດດ້ວຍກົດໝາຍໃຫ້ໜັກແໜ້ນຍິ່ງຂຶ້ນຕາມຈຸດພິເສດ ແລະ ເງື່ອນໄຂຂອງ ສປປ ລາວ ເພື່ອສ້າງເງື່ອນໄຂໃຫ້ທ້ອງຖິ່ນນັບມື້ນັບມີຄວາມເຂັ້ມແຂງ, ມີການພັດທະນາ ຊຶ່ງເປັນປັດໄຈສໍາຄັນຕົ້ນຕໍ ໃຫ້ກັບການສ້າງເສດຖະກິດເອກະລາດເປັນເຈົ້າຕົນເອງ ກໍຄືການສ້າງຄວາມຢູ່ດີກິນດີແຕ່ຮາກຖານຂຶ້ນມາເພື່ອກ້າວຂຶ້ນສູ່ຈຸດໝາຍສັງຄົມນິຍົມ.
(ຂ່າວ: ວັນເພັງ, ພາບ: ສຸກສະຫວັນ)
ໃນກອງປະຊຸມ, ທ່ານວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ລາຍງານເຫດຜົນ ແລະ ຄວາມຈໍາເປັນໃນການປັບປຸງກົດໝາຍ ວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ 2015ວ່າ: ພາຍຫຼັງທີ່ກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ 2015ໄດ້ຖືກຮັບຮອງ ແລະ ປະກາດໃຊ້, ກະຊວງພາຍໃນ ໃນນາມທີ່ເປັນເສນາທິການໃຫ້ລັດຖະບານ ກໍໄດ້ເອົາໃຈໃສ່ເຜີຍແຜ່, ເຊື່ອມຊຶມ ແລະ ແຈກຢາຍ ໃຫ້ບັນດາກະຊວງ-ອົງການຂັ້ນສູນກາງ ແລະ ອົງການປົກຄອງທ້ອງຖິ່ນແຕ່ລະຂັ້ນໃນຂອບເຂດທົ່ວປະເທດ, ໄດ້ຜັນຂະຫຍາຍເປັນນິຕິກຳລຸ່ມກົດໝາຍຈໍານວນ 13ສະບັບ; ບັນດາອົງການຂັ້ນສູນກາງ ແລະ ທ້ອງຖິ່ນໄດ້ຕັ້ງໜ້າຜັນຂະຫຍາຍ ແລະ ຈັດຕັ້ງປະຕິບັດກົດໝາຍສະບັບດັ່ງກ່າວ ເຂົ້າໃນການຄຸ້ມຄອງບໍລິຫານລັດໃນດ້ານຕ່າງໆ ຂອງອົງການປົກຄອງແຕ່ລະຂັ້ນແລະ ໄດ້ຮັບຜົນສໍາເລັດເປັນຢ່າງດີໂດຍພື້ນຖານ.
ນັບແຕ່ປີ 2021ເປັນຕົ້ນມາ, ກະຊວງພາຍໃນໄດ້ມີການປະເມີນການຈັດຕັ້ງປະຕິບັດ ແລະ ພ້ອມທັງທາບທາມທິດທາງໃນການປັບປຸງກົດໝາຍດັ່ງກ່າວ ຢູ່ທ້ອງຖິ່ນຈໍານວນໜຶ່ງ. ຜ່ານການຕີລາຄາການຈັດຕັ້ງປະຕິບັດກົດໝາຍ ຊຶ່ງເຫັນວ່າມີບາງບັນຫາທີ່ຄ້າງຄາ ແລະ ບໍ່ສາມາດຈັດຕັ້ງປະຕິບັດໄດ້ດີ ເທົ່າທີ່ຄວນ. ນອກນັ້ນ, ຍັງມີກຸ່ມບ້ານຊຶ່ງຖືກສ້າງຕັ້ງຂຶ້ນຕາມມະຕິ 09/ກມສພ, ເປັນຂອດລະຫວ່າງກາງລະຫວ່າງ ເມືອງ ກັບ ບ້ານ ເຮັດວຽກຄ້າຍຄືຂັ້ນການປົກຄອງ, ແຕ່ບໍ່ແມ່ນຂັ້ນຂອງການປົກຄອງ; ພ້ອມດຽວກັນນັ້ນ, ໃນຕົວເນື້ອໃນຂອງກົດໝາຍວ່າດ້ວຍການປົກຄອງທ້ອງຖິ່ນ ສະບັບປີ 2015 ມີບາງມາດຕາຍັງບໍ່ທັນສອດຄ່ອງກັບກົດໝາຍອື່ນທີ່ກ່ຽວຂ້ອງ. ສັງລວມແລ້ວ, ການບໍລິຫານຂັ້ນຮາກຖານ ຍັງບໍ່ທັນເຂັ້ມແຂງດີເທົ່າທີ່ຄວນ, ການບໍລິຫານລັດຂັ້ນຮາກຖານຍັງມີລັກສະນະເຄິ່ງໆກາງໆ ຊອດກະຈາ ລະຫວ່າງອົງການບໍລິຫານລັດຂັ້ນລຸ່ມສຸດ ກັບການຈັດຕັ້ງຊຸມຊົນ.
ການສະເໜີປັບປຸງກົດໝາຍດັ່ງກ່າວ ກໍເພື່ອໃຫ້ສອດຄ່ອງນິຕິກໍາຈໍານວນໜຶ່ງທີ່ສູນກາງວາງອອກນັ້ນເປັນຕົ້ນແມ່ນມະຕິວ່າດ້ວຍສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ ສູ່ລ່ວງເລິກສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ ສະບັບເລກທີ 05/ຄບສພ, ຄໍາສັ່ງວ່າດ້ວຍການຄາດຄະເນແບ່ງຄວາມຮັບຜິດຊອບຂອງຄະນະປະຈຳພັກ ແຕ່ລະຂັ້ນສະບັບເລກທີ 173/ຄລສພ, ແຈ້ງການກ່ຽວກັບການແບ່ງງານໃຫ້ສະຫາຍຮອງເລຂາຄະນະບໍລິຫານງານພັກເມືອງ-ນະຄອນ ສະບັບເລກທີ56/ຄຈສພ, ແຈ້ງການກ່ຽວກັບທິດຊີ້ນໍາກ່ຽວກັບການສ້າງຕາແສງໃນຂອບເຂດທົ່ວປະເທດ ສະບັບເລກທີ 04/ຫສພ ແລະ ຮ່າງລັດຖະທຳມະນູນສະບັບປັບປຸງ ປີ 2025.ໂດຍອີງໃສ່ທິດນໍາດັ່ງກ່າວ, ລັດຖະບານໄດ້ຄົ້ນຄວ້າປັບປຸງກົດໝາຍດັ່ງກ່າວ ເປັນຕົ້ນແມ່ນການຄົ້ນຄວ້າອົງການປົກຄອງຕາແສງເປັນກົງຈັກການປົກຄອງຂັ້ນລຸ່ມສຸດຢູ່ຮາກຖານ, ຫັນບ້ານ ໃຫ້ເປັນການຈັດຕັ້ງຂອງຊຸມຊົນ. ພ້ອມນັ້ນ, ກໍໄດ້ຄົ້ນຄ້ວາຊື່ເອີ້ນຕຳແໜ່ງບໍລິຫານ ຊຶ່ງໄດ້ລະບຸຊື່ເອີ້ນຂອງຫົວໜ້າອົງການປົກຄອງຂັ້ນແຂວງຈະແຈ້ງວ່າແມ່ນປະທານຄະນະກຳມະການປົກຄອງແຂວງ, ນະຄອນຫຼວງວຽງຈັນ; ຂັ້ນເມືອງ ແມ່ນປະທານຄະນະກຳມະການປົກຄອງເມືອງ, ນະຄອນ, ຂັ້ນຕາແສງ ແມ່ນປະທານຄະນະກຳມະການປົກຄອງຕາແສງ.
ທ່ານ ວິໄລວົງ ບຸດດາຄໍາ ກ່າວຕື່ມວ່າ: ບັນດາບັນຫາທີ່ຄ້າງຄາ ແລະ ນິຕິກຳຂອງຂັ້ນເທິງດັ່ງກ່າວມານັ້ນ, ແມ່ນເຫດຜົນຄວາມຈໍາເປັນ ທີ່ສໍາຄັນ ໃນການຄົ້ນຄວ້າປັບປຸງກົດໝາຍວ່າດ້ວຍການປົກຄອງທ້ອງຖິ່ນໃນຄັ້ງນີ້.ສໍາລັບດ້ານໂຄງສ້າງ ຮ່າງກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ2025ທີ່ນໍາສະເໜີພິຈາລະນາຄັ້ງນີ້ ປະກອບມີທັງໝົດ8ພາກ, 21ໝວດ, 81ມາດຕາ. ໃນນີ້, ເພີ່ມເຂົ້າໃໝ່ ຈໍານວນ 16ມາດຕາ, ປັບປຸງ ຈໍານວນ 62ມາດຕາ ແລະ ບໍ່ໄດ້ປັບປຸງ ຈໍານວນ3ມາດຕາ.
ຄາດຄະເນຜົນໄດ້ຮັບພາຍຫຼັງກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ 2025 ຖືກຮັບຮອງ ແລະ ປະກາດໃຊ້ຈະເປັນບ່ອນອີງອັນສໍາຄັນ ໃຫ້ແກ່ອົງການປົກຄອງທ້ອງຖິ່ນ ໃນການປັບປຸງຂັ້ນການປົກຄອງໃຫ້ມີຄວາມສອດຄ່ອງ ແລະ ແທດເໝາະກັບສະພາບເງື່ອນໄຂຕົວຈິງໃນແຕ່ລະທ້ອງຖິ່ນ ໂດຍສະເພາະການສ້າງຕາແສງເປັນການປົກຄອງຂັ້ນລຸ່ມສຸດ ເພື່ອເອື້ອອໍານວຍໃຫ້ບ້ານເປັນຫົວໜ່ວຍບໍລິຫານຊຸມຊົນຢ່າງແທ້ຈິງ;ເປັນບ່ອນອີງໃຫ້ແກ່ບັນດາກະຊວງ, ອົງການທີ່ກ່ຽວຂ້ອງໃນການປັບປຸງກົດໝາຍ ແລະ ນິຕິກຳລຸ່ມກົດໝາຍໃຫ້ສອດຄ່ອງຕາມແນວທາງນະໂຍບາຍຂອງພັກ-ລັດຖະບານ ແລະ ເປັນການແບ່ງຄວາມຮັບຜິດຊອບ, ແບ່ງຂັ້ນຄຸ້ມຄອງ ໃຫ້ອົງການປົກຄອງທ້ອງຖິ່ນແຕ່ລະຂັ້ນ ໃຫ້ແທດເຖິງ;ຮັບປະກັນບົດບາດການນໍາພາຂອງພັກຢ່າງໜັກແໜ້ນເຮັດໃຫ້ການນໍາພາຂອງພັກຢັ່ງເລິກເຖິງຫົວໜ່ວຍຮາກຖານຂອງປະເທດ; ສ້າງໃຫ້ເປັນກົງຈັກການປົກຄອງທີ່ຕິດແທດກິ້ງເກືອກລີເລືອ, ເປັນທີ່ເພິ່ງຂອງປະຊາຊົນບັນດາເຜົ່າ; ສາມາດນໍາເອົາແນວທາງນະໂຍບາຍ, ການບໍລິການຂອງລັດຫຍັບເຂົ້າເຖິງປະຊາຊົນໄດ້ຢ່າງທົ່ວເຖິງ;ຍົກລະດັບການປົກຄອງລັດດ້ວຍກົດໝາຍໃຫ້ໜັກແໜ້ນຍິ່ງຂຶ້ນຕາມຈຸດພິເສດ ແລະ ເງື່ອນໄຂຂອງ ສປປ ລາວ ເພື່ອສ້າງເງື່ອນໄຂໃຫ້ທ້ອງຖິ່ນນັບມື້ນັບມີຄວາມເຂັ້ມແຂງ, ມີການພັດທະນາ ຊຶ່ງເປັນປັດໄຈສໍາຄັນຕົ້ນຕໍ ໃຫ້ກັບການສ້າງເສດຖະກິດເອກະລາດເປັນເຈົ້າຕົນເອງ ກໍຄືການສ້າງຄວາມຢູ່ດີກິນດີແຕ່ຮາກຖານຂຶ້ນມາເພື່ອກ້າວຂຶ້ນສູ່ຈຸດໝາຍສັງຄົມນິຍົມ.
(ຂ່າວ: ວັນເພັງ, ພາບ: ສຸກສະຫວັນ)
