ຄະນະພັກມະຫາວິທະຍາໄລແຫ່ງຊາດ (ມຊ) ໄດ້ຈັດກອງປະຊຸມຜ່ານບົດລາຍງານການກະກຽມກອງປະຊຸມໃຫຍ່ຄັ້ງທີ VI ອົງຄະນະພັກ, ຜ່ານບົດລາຍງານການດຳເນີນຊີວິດການເມືອງທ້າຍສະໄໝຂອງຄະນະບໍລິຫານງານພັກ, ຜ່ານຮ່າງບົດລາຍງານການເມືອງໂດຍຫຍໍ້, ຜ່ານຮ່າງແຜນພັດທະນາ ມຊ, ຮ່າງບົດສຳຫຼວດການນຳພາລວມຂອງຄະນະບໍລິຫານງານພັກໂດຍຫຍໍ້ ແລະ ທາບທາມເອົາບຸກຄະລາກອນຮອບທີ III ເພື່ອລົງສະໝັກເລືອກຕັ້ງໃນກອງປະຊຸມໃຫຍ່ຄັ້ງທີ VI ຂອງອົງຄະນະພັກ ມຊ ຂຶ້ນໃນວັນທີ 18ມີນານີ້ ທີ່ ມຊ ພາຍໃຕ້ການເປັນປະທານຂອງທ່ານ ເດຊານຸລາດ ແສນດວງເດດ ເລຂາຄະນະພັກ ວ່າການແທນອະທິການບໍດີ ມຊ, ເປັນກຽດເຂົ້າຮ່ວມຂອງທ່ານ ສຳລານ ພັນຄະວົງ ຮອງເລຂາຄະນະພັກ ຮອງລັດຖະມົນຕີກະຊວງສຶກສາທິການ ແລະ ກິລາ (ສສກ), ມີບັນດາຄະນະປະຈຳພັກ, ຄະນະບໍລິຫານງານພັກ, ຄະນະພັກຮາກຖານ, ໜ່ວຍພັກຮາກຖານ, ພະນັກງານຫຼັກແຫຼ່ງ, ສະມາຊິກພັກສົມບູນ-ສຳຮອງ ພ້ອມດ້ວຍແຂກຖືກເຊີນເຂົ້າຮ່ວມ.

ທ່ານ ເດຊານຸລາດ ແສນດວງເດດ ໄດ້ໃຫ້ກຽດຂຶ້ນຜ່ານຮ່າງບົດລາຍງານການກະກຽມກອງປະຊຸມໃຫຍ່ຄັ້ງທີ VI ອົງຄະນະພັກ ແລະ ຜ່ານບົດລາຍງານການດຳເນີນຊີວິດການເມືອງທ້າຍສະໄໝຂອງຄະນະບໍລິຫານງານພັກ ມຊ, ຮ່າງບົດສຳຫຼວດການນຳພາລວມຂອງຄະນະບໍລິຫານງານພັກໂດຍຫຍໍ້; ທ່ານ ສິນທະວອນ ດາລາວົງ ຮອງເລຂາຄະນະພັກ ຮອງອະທິການບໍດີ ມຊ ຜ່ານຮ່າງບົດລາຍງານການເມືອງໂດຍຫຍໍ້, ທ່ານ ພູເພັດ ກ້ຽວພິລາວົງ ຄະນະປະຈຳພັກ ຮອງອະທິການບໍດີ ມຊ ຜ່ານຮ່າງແຜນພັດທະນາ ມຊ ໂດຍຫຍໍ້.

ໃນພິທີ, ທ່ານ ຕຸດາວັນ ໜໍ່ເມືອງເສດ ຄະນະປະຈຳພັກກະຊວງ ຫົວໜ້າກົມຈັດຕັ້ງ ແລະ ພະນັກງານກະຊວງ ສສກ ໄດ້ຜ່ານມາດຖານເງື່ອນໄຂຜູ້ລົງສະໝັກເລືອກຕັ້ງ.ຈາກນັ້ນ, ຄະນະຜູ້ແທນທີ່ເຂົ້າຮ່ວມໄດ້ພ້ອມກັນປອບຄຳຄິດ ຄຳເຫັນໃສ່ບັນດາຮ່າງເອກະສານຕ່າງເພື່ອໃຫ້ມີເນື້ອໃນຄົບຖ້ວນສົມບູນ.

ໂອກາດນີ້, ທ່ານ ສຳລານ ພັນຄະວົງ ໄດ້ໃຫ້ກຽດມີຄຳເຫັນໂອ້ລົມເພື່ອເຮັດໃຫ້ການທາບທາມໃນຄັ້ງນີ້ຖືກຕ້ອງຕາມລະບຽບຫຼັກການຂອງພັກ ແລະ ການປ່ອນບັດມີຄວາມເປັນລະບຽບຮຽບຮ້ອຍດີ ຊຶ່ງທ່ານໄດ້ເນັ້ນໜັກໃຫ້ເພີ່ມທະວີຄວາມຮັບຜິດຊອບໃຫ້ເລືອກເອົາການນຳຜູ້ທີ່ມີວິໃສທັດເບິ່ງກວ້າງມອງໄກ, ເພີ່ມຄວາມຮັບຜິດຊອບພິຈາລະນາໃຫ້ຖີ່ຖ້ວນ ທີ່ສຳຄັນຕ້ອງຮັບປະກັນໃຫ້ໄດ້ບຸກຄະລາກອນທີ່ມີຄຸນນະພາບເພື່ອໃຫ້ບັ້ນທາບທາມຄັ້ງນີ້ປະສົບຜົນສຳເລັດຢ່າງຈົບງາມ.

ຂ່າວ: ພູວັນ