ກອງປະຊຸມໃຫຍ່ຜູ້ແທນອົງຄະນະພັກເມືອງສະໜາມໄຊ ແຂວງອັດຕະປື ຄັ້ງທີ XIII ໄດ້ສຳເລັດລົງຢ່າງຈົບງາມ ໃນວັນທີ 19 ກຸມພານີ້ ທີ່ເມືອງດັ່ງກ່າວ ໂດຍການເປັນປະທານຂອງສະຫາຍ ສຸລິວົງ ອະໄພວົງ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງສະໜາມໄຊ, ເປັນກຽດເຂົ້າຮ່ວມຊີ້ນຳກອງປະຊຸມມີ ສະຫາຍ ພົທ ວັນທອງ ກອງມະນີ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື, ມີແຂກຖືກເຊີນ, ພ້ອມດ້ວຍຜູ້ແທນສົມບູນ 119 ສະຫາຍ ຊຶ່ງເປັນຕົວແທນໃຫ້ແກ່ສະ ມາຊິກພັກໃນທົ່ວເມືອງເຂົ້າຮ່ວມ.
ກອງປະຊຸມຄັ້ງນີ້, ໄດ້ສະຫຼູບຕີລາຄາຄືນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XII ຂອງອົງຄະນະພັກເມືອງຕະຫຼອດໄລຍະ 5 ປີຜ່ານມາ, ຜ່ານຮ່າງບົດລາຍງານການເມືອງທັງສອງພາກ, ບົດສຳຫຼວດນຳພາ-ຊີ້ນຳ ແລະ ທິດທາງແຜນການໃນຕໍ່ໜ້າ 2025-2029. ໃນ 5 ປີຜ່ານມາ ອົງຄະນະພັກເມືອງ ສາມາດຍາດໄດ້ຜົນສໍາເລັດຫຼາຍດ້ານເປັນຕົ້ນ: ທົ່ວເມືອງ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດ-ສັງຄົມ ມີການພັດທະນາດ້ວຍບາດກ້າວ ແລະ ທ່ວງທ່າໃໝ່, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງກໍໄດ້ຮັບການປັບປຸງແກ້ໄຂ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເປັນກ້າວໆ, ເສດຖະກິດຂອງເມືອງ ສືບຕໍ່ຂະຫຍາຍຕົວຢ່າງຕໍ່ເນື່ອງ ສະເລ່ຍຢູ່ໃນລະດັບ 5.75% ຕໍ່ປີ, ລວມຍອດຜະລິດຕະພັນພາຍໃນ ບັນລຸໄດ້ 493.71 ຕື້ກີບ, ລື່ນແຜນ 163.33 ຕື້ກີບ ເທົ່າກັບ 49.43%. ສະເລ່ຍລາຍຮັບຕໍ່ຫົວຄົນ 1,095 ໂດລາຕໍ່ຄົນຕໍ່ປີ ຫຼື 23.52 ລ້ານຕໍ່ຄົນຕໍ່ປີ.
ກອງປະຊຸມຍັງໄດ້ເປັນເອກະສັນກັນຮັບຮອງແຜນການພັດທະນາເສດຖະກິດ-ສັງຄົມ 5 ປີ ຕໍ່ໜ້າ ( 2025-2029) ຊຶ່ງຄາດໝາຍສູ້ຊົນຕົ້ນຕໍທາງດ້ານເສດຖະກິດ ສະເລ່ຍເພີ່ມຂຶ້ນໃນລະດັບ 8-8.5% ຕໍ່ປີ
ລວມຍອດຜະລິດຕະພັນພາຍໃນ (GDP) ໃຫ້ບັນລຸ 725.42 ຕື້ກີບ; ຄາດຄະເນພົນລະເມືອງ ຮອດປີ 2029 ປະມານ 45,719 ຄົນ, ລາຍຮັບສະເລ່ຍຕໍ່ຫົວຄົນ ໃຫ້ໄດ້ 1,479 ໂດລາຕໍ່ຄົນຕໍ່ປີ.
ກອງປະຊຸມຄັ້ງນີ້, ຍັງໄດ້ປ່ອນບັດເລືອກເອົາຄະນະບໍລິຫານງານພັກເມືອງ ຊຸດທີ XIII ຊຶ່ງມີຜູ້ສະ ໝັກເລືອກຕັ້ງ 29 ສະຫາຍ, ເລືອກເອົາ 25 ສະຫາຍ, ຍິງ 4 ສະຫາຍ, ເລືອກເອົາຄະນະປະຈໍາພັກເມືອງຈຳນວນ 7 ສະຫາຍ ຍິງ 1 ສະຫາຍ, ຜ່ານໃນການດຳເນີນກອງປະຊຸມຄັ້ງປະຖົມມະລຶກ ກອງປະຊຸມໄດ້ເລືອກເອົາ ສະຫາຍ ສຸລິວົງ ອະໄພວົງ ເປັນເລຂາຄະນະບໍລິຫານງານພັກເມືອງ, ສະຫາຍ ພັທ ຄຳໂພໄຊ ໄຊຍະເສນາ ແລະ ສະຫາຍ ນາງ ພູດອນ ຈູມມະລີ ເປັນຮອງເລຂາຄະນະບໍລິຫານງານພັກເມືອງ, ສະຫາຍ ຈັນທະພອນ ຈ່ອຍຄຳລຽນ ເປັນປະທານຄະນະກວດກາພັກເມືອງ, ສະຫາຍ ໄກສິດ ສີດາເພັດ ແລະ ສະຫາຍ ຄຳຕັນ ໄຊຍະລາດ ເປັນຮອງປະທານຄະນະກວດກາພັກເມືອງ ແລະ ເລືອກເອົາຜູ້ແທນສົມບູນຮ່ວມກອງປະຊຸມໃຫຍ່ ອົງຄະນະພັກແຂວງ 13 ສະຫາຍ ຍິງ 3 ສະຫາຍ ແລະ ສຳຮອງອີ 2 ສະຫາຍ.
ສະຫາຍ ພົທ ວັນທອງ ກອງມະນີ ໄດ້ຮຽກຮ້ອງໃຫ້ຜູ້ແທນອົງຄະນະພັກເມືອງ ຊຸດທີ XIII ສືບຕໍ່ເອົາໃຈໃສ່ນຳພາ- ຊີ້ນໍາໃຫ້ໄດ້ຮັບຜົນສໍາເລັດ ຕາມຄາດໝາຍທີ່ວາງໄວ້, ພ້ອມກັນຂຸດຄົ້ນ ແລະ ນຳໃຊ້ທ່າແຮງບົ່ມຊ້ອນທີ່ມີຢູ່ຂອງເມືອງເຂົ້າໃນການພັດທະນາພື້ນຖານໂຄງລາງຕິດພັນກັບການບໍ່ລິການ, ຊຸກຍູ້ສົ່ງເສີມກະສິກຳທີ່ມີຄຸນນະພາບ, ເພີ່ມການເຕີບໂຕ ແລະ ສ້າງລາຍຮັບທີ່ໝັ້ນຄົງໃຫ້ແກ່ຜູ້ຜະລິດກະສິກຳ ໂດຍປະຕິບັດນະໂຍບາຍຂອງລັດຖະບານ ກ່ຽວກັບການພັດທະນາກະສິກຳ ຕາມທິດສະອາດ-ສີຂຽວ ແລະ ຍືນຍົງ, ເວົ້າສະເພາະ ແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2025-2029 ໃຫ້ຮັບປະກັນໃນດ້ານສະມັດຕະພາບຜົນຜະລິດເປັນສິນຄ້າສະໜອງທັງພາຍໃນ ແລະ ສົ່ງອອກ ເພື່ອຊອກວິທີທາງຊ່ວຍເຫຼືອປະຊາຊົນ ແລະ ຜູ້ປະກອບການດ້ານການຜະລິດກະສິກຳ ໃຫ້ນັບມື້ພັດທະນາດ້ານຄຸນນະພາບການຜະລິດ ສອດຄ່ອງກັບຄວາມຕ້ອງການຂອງຕະຫຼາດເປົ້າໝາຍ ແລະ ເງື່ອນໄຂກ້າວສູ່ຕະຫຼາດທັງພາກພື້ນ ແລະ ສາກົນ.
(ຂ່າວ: ໄພບູນ)
