ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ຢູ່ນະຄອນ ວໍຊິງຕັນ ທູດພິເສດຂອງນາຍົກລັດຖະມົນຕີ ຫວຽດນາມ, ທ່ານ ຫງວຽນຮົ່ງຢຽນ ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມໄດ້ເຂົ້າຮ່ວມພິທີລົງນາມ ແລະ ປະກາດບັນດາຂໍ້ຕົກລົງຮ່ວມມື, ສັນຍາຊື້-ຂາຍລະຫວ່າງວິສາຫະກິດ ຫວຽດນາມ ແລະ ສະຫະລັດ ອາເມຣິກາ.

ຂ່າວລະບຸວ່າ: ກ່າວຄຳເຫັນໃນພິທີ, ທ່ານ ຫງວຽນຮົ່ງຢຽນ ຢັ້ງຢືນວ່າ: ເສົາຄ້ຳດຳເນີນທຸລະກິດ - ການຄ້າ - ການລົງທຶນມີບົດບາດເປັນກຳລັງຫຼັກແຫຼ່ງຊຸກຍູ້ການພົວພັນລວມຂອງສອງຝ່າຍ. ສະຫະລັດ ອາເມຣິກາ ກາຍເປັນຄູ່ຮ່ວມມືການຄ້າໃຫຍ່ອັນດັບທີ 2 ແລະ ແມ່ນໜຶ່ງໃນບັນດາຕະຫຼາດສົ່ງອອກສຳຄັນທີ່ສຸດຂອງ ຫວຽດນາມ ແລະ ພວມກາຍເປັນແຫຼ່ງສະໜອງບັນດາຜະລິດຕະພັນເຄື່ອງຈັກ, ອາໄຫຼ່, ວິທະຍາສາດເຕັກໂນໂລຊີ, ພະລັງງານໃຫ້ແກ່ ຫວຽດນາມ.

ທ່ານ ຫງວຽນຮົ່ງຢຽນ ໃຫ້ຮູ້ວ່າ: ຫວຽດນາມ ປາຖະໜາໃຫ້ ສະຫະລັດ ອາເມຣິກາ ສືບຕໍ່ສ້າງເງື່ອນໄຂ, ໜູນຊ່ວຍວິສາຫະກິດສອງປະເທດເປີດກວ້າງການລົງທຶນ, ດຳເນີນທຸລະກິດຢ່າງມີປະສິດທິຜົນ, ພິເສດແມ່ນບັນດາໂຄງການວິທະຍາສາດເຕັກໂນໂລຊີ, ນະວັດຕະກຳ.

ພາຍໃຕ້ການເປັນສັກຂີພິຍານຂອງທ່ານ ຫງວຽນຮົ່ງຢຽນ, ມີຂໍ້ຕົກລົງຮ່ວມມືຫຼາຍສະບັບ ລວມມູນຄ່າ 4,15 ຕື້ໂດລາ ໄດ້ຮັບການລົງທຶນ.