ຂ່າວສານຊີອາໄອລາຍງານວ່າ: ໃນຕອນເຊົ້າວັນທີ 17 ມີນາ ຜ່ານມາ, ຫ້ອງການຖະແຫຼງຂ່າວລັດຖະບານຈີນໄດ້ຈັດກອງປະຊຸມຖະແຫຼງຂ່າວ, ທ່ານຟູ້ລິງຫຸ່ຍ ໂຄສົກອົງການສະຖິຕິແຫ່ງຊາດຈີນໄດ້ແຈ້ງສະພາບການເຄື່ອນໄຫວຂອງເສດຖະກິດແຫ່ງຊາດຈີນໃນ 2 ເດືອນທຳອິດຂອງປີນີ້.
ຂ່າວລະບຸວ່າ: ໂຕເລກຂໍ້ມູນສະແດງໃຫ້ເຫັນວ່າ, ໃນໄລຍະເດືອນມັງກອນ ແລະ ເດືອນກຸມພາຂອງປີນີ້, ການຜະລິດອຸດສາຫະກຳໄດ້ເພີ່ມຂຶ້ນອ່າວໄວ, ມູນຄ່າເພີ່ມຂອງອຸດສາຫະກຳຂະໜາດໃຫຍ່ທົ່ວປະເທດໄດ້ເພີ່ມຂຶ້ນ 5.9% ເມື່ອທຽບໃສ່ໄລຍະດຽວກັນຂອງປີ 2024. ຂະແໜງການບໍລິການມີທ່າອ່ຽງເພີ່ມຂຶ້ນອ່າວດີ, ຕົວຊີ້ວັດການຜະລິດຂອງຂະແໜງການບໍລິການທົ່ວປະເທດໄດ້ເພີ່ມຂຶ້ນ 5.6% ເມື່ອທຽບໃສ່ໄລຍະດຽວກັນຂອງປີ 2024. ການເຕີບໂຕຂອງມູນຄ່າການຈຳໜ່າຍໃນຕະຫຼາດເລັ່ງຕົວຂຶ້ນ, ຍອດມູນຄ່າຂາຍຍ່ອຍເຄື່ອງບໍລິໂພກໃນສັງຄົມມີເຖິງ 8,373.1ຕື້ຢວນ, ເພີ່ມຂຶ້ນ 4.0% ເມື່ອທຽບໃສ່ໄລຍະດຽວກັນຂອງປີ 2024.
ເມື່ອສັງເກດໂດຍລວມແລ້ວເຫັນວ່າ, ໃນເດືອນມັງກອນ ແລະ ເດືອນກຸມພາຂອງປີນີ້, ຄຽງຄູ່ກັບນະໂຍບາຍມະຫາພາກຕ່າງໆສືບຕໍ່ໄດ້ຮັບປະສິດທິຜົນ, ເສດຖະກິດແຫ່ງຊາດຈີນໄດ້ຮັກສາທ່າອ່ຽງການພັດທະນາໃນທິດທາງທີ່ດີ ແລະ ຄຸນນະພາບແຫ່ງການພັດທະນາສູງຂຶ້ນຢ່າງໝັ້ນທ່ຽງ.
