ຂ່າວຕ່າງປະເທດລາຍງານ ໃນວັນທີ 17 ມີນາ ຜ່ານມາ; ກະຊວງກະສິກໍາ, ປ່າໄມ້ ແລະ ການປະມົງຂອງຍີ່ປຸ່ນ ລາຍງານວ່າ: ລາຄາເຂົ້າສານໃນຮ້ານສັບພະສິນຄ້າທົ່ວປະເທດຍີ່ປຸ່ນ ໂດຍສະເລ່ຍແມ່ນ 4,077 ເຢນຕໍ່ 5 ກິໂລກຣາມໃນອາທິດທີ່ສິ້ນສຸດໃນວັນທີ 9 ມີນາ ຜ່ານມາ ຊຶ່ງເພີ່ມຂຶ້ນເກືອບສອງເທົ່າເມື່ອທຽບກັບໄລຍະດຽວກັນໃນປີ 2024.

ກະຊວງ​ດັ່ງກ່າວ​ໄດ້​ເກັບ​ກຳ​ຂໍ້​ມູນ​ລາຄາ​ເຂົ້າສານ​ປະ​ຈໍາ​ອາທິດ​ຈາກ​ຮ້ານ​ສັບພະສິນຄ້າ​ປະມານ 1,000 ​ແຫ່ງ​ໃນ​ທົ່ວ​ປະ​ເທດ ລະບຸວ່າ:ລາຄາເຂົ້າສານສະເລ່ຍລ້າສຸດ​ເພີ່ມ​ຂຶ້ນ 125 ເຢນຈາກ​ອາ​ທິດ​ຜ່ານ​ມາ​​ເຮັດ​ໃຫ້​ລາຄາ​ເຂົ້າ​ສານເພີ່ມ​ຂຶ້ນຕິດຕໍ່ກັນ​ເປັນ​ເວລາ 10 ອາທິດ​.

ບົດ​ລາຍ​ງານ​ລະບຸວ່າ: ນີ້​ແມ່ນ​ຄັ້ງ​ທຳ​ອິດ​ທີ່​ລາຄາ​ເຂົ້າສານ​ສະ​ເລ່ຍ​ສູງ​ເກີນ 4,000 ​ເຢນນັບ​ຕັ້ງ​ແຕ່​ເລີ່​ມຕິດຕາມ​ຂໍ້ມູນ​ໃນ​ເດືອນມີນາ 2022, ​ໃນ​ຂະນະດຽວກັນ​ປະລິມານ​ການຈຳໜ່າຍ​ເຂົ້າສານໂດຍ​ລວມ​ຫຼຸດ​ລົງ 11.6% ​ເມື່ອ​ທຽບ​ໃສ່​ໄລຍະ​ດຽວ​ກັນ​ຂອງ​ປີ 2024.

ທັງນີ້, ລັດຖະບານ​ຍີ່ປຸ່ນໄດ້ສຳເລັດ​ການ​ປະມູນ​ເຂົ້າສານ​ສຳຮອງ​ຄັ້ງ​ທຳ​ອິດ​ໃນ​ອາທິດຜ່ານມາ ແລະ​ຈະ​ປ່ອຍເຂົ້າສານ​ສຳຮອງ​ເຂົ້າ​ສູ່​ຮ້ານ​ສັບພະ​ສິນຄ້າ​​ທົ່ວ​ປະ​ເທດ​ໃນ​ເດືອນ​ມີນາ​ນີ້. ໂດຍປັດຈຸ​ບັນ, ​ໄດ້​ເອົາ​ໃຈ​ໃສ່​ເຖິງ​ຜົນ​ກະທົບ​ຂອງ​ການ​ຊ່ວຍ​ເຫຼືອ​ຕໍ່​ລາຄາ​ເຂົ້າສານ​ໃນ​ອະນາຄົດ.