ຂ່າວສານຊີອາໄອລາຍງານວ່າ: ແຫຼ່ງຂ່າວຈາກກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານຈີນໃຫ້ຮູ້ໃນວັນທີ 17 ມີນາ ຜ່ານມາວ່າ: ອຸດສາຫະກຳດີຈີຕອນຂອງຈີນໃນປີ 2024 ໂດຍລວມໄດ້ເຄື່ອນໄຫວຢ່າງມີຄວາມໝັ້ນທ່ຽງ, ລາຍໄດ້ຈາກການດຳເນີນທຸລະກິດມີເຖິງ 35,000 ຕື້ຢວນ, ເພີ່ມຂຶ້ນ 5.5% ເມື່ອທຽບໃສ່ປີ 2023, ລວມຍອດຜົນກຳໄລມີເຖິງ 2,700 ຕື້ຢວນ, ເພີ່ມຂຶ້ນ 3.5% ເມື່ອທຽບໃສ່ປີ 2023.

ໃນນັ້ນ, ຕະຫຼາດຜະລິດຕະພັນເອເລັກໂຕຣນິກທີ່ນຳໃຊ້ໃນຊີວິດປະຈຳວັນໄດ້ພັດທະນາດີຂຶ້ນຢ່າງຮອບດ້ານ. ໂດຍພາຍໃຕ້ການຊຸກຍູ້ຈາກທຸລະກິດພັດທະນາຂຶ້ນມາໃໝ່ ເຊັ່ນ: ປັນຍາປະດິດ ແລະ ຄລາວຄອມພິວຕິງເປັນຕົ້ນ, ອຸດສາຫະກຳຊັອຟແວສາມາດສ້າງລາຍຮັບໄດ້ເຖິງ 13,700 ຕື້ຢວນ, ເພີ່ມຂຶ້ນ 10% ເມື່ອທຽບປີ 2023. ອຸດສາຫະກຳການສື່ສານສາມາດສ້າງລາຍຮັບໄດ້ເຖິງ 1,740 ຕື້ຢວນ, ເພີ່ມຂຶ້ນ 3.2% ເມື່ອທຽບໃສ່ປີ 2023.

ພື້ນຖານໂຄງລ່າງທາງດ້ານດີຈີຕອນໄດ້ຮັບການຍົກສູງຂຶ້ນທັງທາງດ້ານຄຸນນະພາບ ແລະ ປະລິມານ. ມາຮອດທ້າຍປີ 2024, ການໃຊ້ສາຍໃຍແກ້ວໃນທົ່ວປະເທດມີເຖິງ 72.88 ລ້ານກິໂລແມັດ, ນັບລວມແລ້ວໄດ້ສ້າງສະຖານີສົ່ງສັນຍານສື່ສານ 5G 4,251 ລ້ານແຫ່ງ, ທຸກເມືອງໄດ້ນຳໃຊ້ລະບົບອິນເຕີເນັດຂະໜາດ Gbps, ທຸກຕາແສງໄດ້ນໍາໃຊ້ລະບົບ 5G ແລະ ລະບົບ5G ສາມາດປົກຄຸມບ້ານຫຼາຍກວ່າ 90%.

ນອກນີ້, ລະບົບນິເວດອຸດສາຫະກໍາໄດ້ຮັບການປັບປຸງນັບມື້ນັບດີຂຶ້ນ, ໄດ້ສະໜອງການບໍລິການແກ່ 150 ກວ່າປະເທດ ແລະ ເຂດແຄວ້ນໃນທົ່ວໂລກ. ພະລັງຊຸກຍູ້ອຸດສາຫະກໍາໃໝ່ໄດ້ເພີ່ມທະວີຂຶ້ນເລື້ອຍໆ, ຂົງເຂດພັດທະນາຂຶ້ນມາໃໝ່ ເຊັ່ນ: ປັນຍາປະດິດ, ຫຸ່ນຍົນທີ່ເປັນຮູບຮ່າງຄືມະນຸດ ແລະອື່ນໆໄດ້ຮັກສາຄວາມດຶງດູດອ່າວສູງຕໍ່ການລົງທຶນ ແລະ ການລະດົມທຶນ, ນອກນີ້ການພັດທະນາແບບຈໍາລອງໃຫຍ່ທີ່ນໍາໃຊ້ ໃນທາງການຄ້າໄດ້ພັດທະນາໄວຂຶ້ນ.