ຂ່າວຕ່າງປະເທດລາຍງານໃນວັນທີ 18 ມີນາ ຜ່ານມາວ່າ: ທ່ານ ອິຊິບະຊິເງະຣຸນາຍົກລັດຖະມົນຕີຍີ່ປຸ່ນ ສັ່ງໃຫ້ບັນດາອົງການກ່ຽວຂ້ອງເຮັດແຜນການເພີ່ມຈຳນວນນັກທ່ອງທ່ຽວຂາເຂົ້າໃຫ້ເປັນ 60 ລ້ານເທື່ອຄົນໃນປີ 2030 ແລະ ເພີ່ມທະວີຄວາມດຶງດູດໃຈລະດັບພາກພື້ນ. ຍ້ອນວ່າການທ່ອງທ່ຽວເປັນອຸດສາຫະກໍາພື້ນຖານສໍາລັບເສດຖະກິດລະດັບພາກພື້ນແລະເປັນຕົວຂັບເຄື່ອນຂອງການຟື້ນຟູພາກພື້ນ ຊຶ່ງໄວໜຸ່ມແລະແມ່ຍິງສາມາດຈະເລີນເຕີບໂຕ.
ທ່ານ ອິຊິບະຊິເງະຣຸຮຽກຮ້ອງໃຫ້ພາກລັດແລະເອກະຊົນເຮັດວຽກຮ່ວມກັນເພື່ອປະຕິບັດຍຸດທະສາດການທ່ອງທ່ຽວ ແລະ ສັ່ງໃຫ້ລັດຖະບານປະຕິບັດແຜນການໃຫ້ສຳເລັດໃນທ້າຍປີງົບປະມານຕໍ່ໜ້າ. ເພື່ອບັນລຸເປົ້າໝາຍໃນປີ 2030 ທີ່ຈະດຶງດູດນັກທ່ອງທ່ຽວຕ່າງປະເທດ 60 ລ້ານເທື່ອຄົນເຂົ້າປະເທດ ແລະ ຊຸກຍູ້ໃຫ້ເກີດລາຍຈ່າຍທາງການທ່ອງທ່ຽວໃຫ້ໄດ້ 15.000 ຕື້ເຢນ.
ແຜນການໃໝ່ນີ້ມີທ່າອ່ຽງຈະແກ້ໄຂບັນຫາສຳຄັນຕ່າງໆເຊັ່ນ: ເພີ່ມທະວີຄວາມດຶງດູດໃນການທ່ອງທ່ຽວລະດັບພາກພື້ນ, ປັບປຸງພື້ນຖານໂຄງລ່າງ ທັງສະໜາມບິນ ແລະເຄືອຂ່າຍການຂົນສົ່ງ ແລະປະຕິບັດມາດຕະການຕ່າງໆ ເພື່ອປ້ອງກັນນັກທ່ອງທ່ຽວເກີນ.
ທັງນີ້, ຍີ່ປຸ່ນຈະຕ້ອນຮັບນັກທ່ອງທ່ຽວຕ່າງປະເທດ 36,86 ລ້ານເທື່ອຄົນໃນປີ 2024, ແຕ່ຍັງປະເຊີນໜ້າກັບສິ່ງທ້າທາຍຕ່າງໆເຊັ່ນ: 70% ຂອງທີ່ພັກນັກທ່ອງທ່ຽວແມ່ນສຸມຢູ່ສາມເມືອງໃຫຍ່. ສິ່ງດັ່ງກ່າວສະແດງໃຫ້ເຫັນເຖິງຄວາມຕ້ອງການໃນການກະຈາຍການທ່ອງທ່ຽວໃນລະດັບພາກພື້ນໃຫ້ດີຍິ່ງຂຶ້ນ.
