ຂ່າວຕ່າງປະເທດລາຍງານ ໃນວັນທີ 18 ມີນາ ຜ່ານມາ; ມະຫາວິທະຍາໄລ Harvard ເປີດເຜີຍວ່າ: ຈະໃຫ້ນັກສຶກສາລະດັບປະລິນຍາຕີຈາກຄອບຄົວທີ່ມີລາຍຮັບບໍ່ເກີນ 200,000 ໂດລາຕໍ່ປີ ຮຽນໂດຍບໍ່ເສຍຄ່າ ແລະຈະຄຸ້ມຄອງປະກັນສຸຂະພາບ, ທີ່ຢູ່ອາໄສ ແລະ ຄ່າໃຊ້ຈ່າຍອື່ນໆສໍາລັບນັກສຶກສາທີ່ມາຈາກຄອບຄົວທີ່ມີລາຍຮັບຕ່ໍາກວ່າ 100,000 ໂດລາ, ມະຫາວິທະຍາໄລລະບຸໃນຖະແຫຼງການ ເມື່ອວັນທີ 17 ມີນາ ຜ່ານມາວ່າການສະເໜີຈະມີຜົນບັງຄັບໃຊ້ໃນປີ 2025-2026.

ມະຫາວິທະຍາໄລຊັ້ນນຳ ຂອງ ສະຫະລັດ ອາເມຣິກາ ໃນອະດີດໄດ້ໃຫ້ນັກຮຽນລະດັບປະລິນຍາຕີຈາກຄອບຄົວທີ່ມີລາຍຮັບໜ້ອຍກວ່າ 85,000 ໂດລາຕໍ່ປີ ຮຽນໂດຍບໍ່ເສຍຄ່າ, ໂດຍຕ້ອງການໃຫ້ສະຖາບັນດັ່ງກ່າວສາມາດເຂົ້າເຖິງນັກຮຽນໄດ້ຫຼາຍຂຶ້ນ. ໂດຍສະເພາະຜູ້ທີ່ມາຈາກຄອບຄົວທີ່ມີລາຍຮັບປານກາງ.

ອີງຕາມຂໍ້ມູນໃນເວັບໄຊຂອງມະຫາວິທະຍາໄລ; ຄ່າຮຽນ ແລະ ຄ່າທຳນຽມຕ່າງໆ ລວມທັງທີ່ພັກແລະອາຫານຢູ່ມະຫາວິທະຍາໄລ Harvard ຊຶ່ງເປັນຫຼັກສູດລະດັບປະລິນຍາຕີຈະມີຄ່າໃຊ້ຈ່າຍຫຼາຍກວ່າ 82,000 ໂດລາໃນປີການສຶກສາ 2024-2025.

ການສະເໜີຄ່າຮຽນອາດສາມາດຊ່ວຍໃຫ້Harvard ມີຄວາມຫຼາກຫຼາຍທາງດ້ານເຊື້ອຊາດໃນກຸ່ມນັກສຶກສາເນື່ອງຈາກໃນເດືອນມິຖຸນາ ປີ 2023, ສານສູງສຸດຂອງສະຫະລັດ ອາເມຣິກາ ປະຕິເສດນະໂຍບາຍການຮັບນັກສຶກສາເຂົ້າຮຽນໂດຍອີງໃສ່ເຊື້ອຊາດ, ເພື່ອໃຫ້ໂຄງສ້າງນັກສຶກສາໃນມະຫາວິທະຍາໄລມີຄວາມຫຼາກຫຼາຍແລະ ​ເພື່ອ​ດຶງ​ດູດ​ນັກສຶກສາມາ​ຮຽນ​ຫຼາຍ​ຂຶ້ນ.

ທ່ານ ອາລັນ ກາເບີ ອະທິການບໍດີມະຫາວິທະຍາໄລ Harvard ກ່າວໃນຖະແຫຼງການວ່າ: ການເຮັດໃຫ້ບຸກຄົນຈຳນວນຫຼາຍທີ່ມີພື້ນຖານ, ປະ​ສົບ​ການ ແລະ​ທັດ​ສະ​ນະ​ທີ່​ແຕກ​ຕ່າງ ສາມາດ​ເຂົ້າເຖິງ Harvardໄດ້ໂດຍການຫຼຸດຜ່ອນອຸປະສັກທາງດ້ານການເງິນ ຈະຊ່ວຍສົ່ງເສີມການເຕີບໂຕທາງດ້ານສະຕິປັນຍາແລະການພັດທະນາຕົນເອງ.

ນັບ​ຕັ້ງ​ແຕ່​ຂຶ້ນ​ຮັບ​ຕຳ​ແໜ່ງ​ໃນ​ເດືອນ​ມັງ​ກອນ ຜ່ານມາ, ທ່ານ ໂດນັລ ທຣໍາ ປະທານາທິບໍດີ ສະຫະລັດ ອາເມຣິກາໄດ້ອອກຄໍາສັ່ງບໍລິຫານເພື່ອລຶບລ້າງໂຄງການຄວາມຫຼາກຫຼາຍ, ຄວາມສະເໝີພາບ ແລະການຄຸ້ມຄອງຢູ່ໃນມະຫາວິທະຍາໄລ ຊຶ່ງໄດ້ບັງຄັບໃຫ້ມະຫາວິທະຍາໄລຕ້ອງສ້າງວິທີການໃໝ່ໆ ເພື່ອ​​ຮັກ​ສາ​ນັກ​ສຶກ​ສາ​ທີ່ມີເຊື້ອຊາດ ແລະ ​ພື້ນ​ຖານ​ທີ່​ແຕກ​ຕ່າງ​ກັນໄວ້​.ມະຫາວິທະຍາໄລ Harvard ກ່າວຕື່ມວ່າ: ຂໍ້ສະເໜີດັ່ງກ່າວ ຊຶ່ງປະຕິບັດຕາມວິທີການດຽວກັນກັບມະຫາວິທະຍາໄລຊັ້ນນໍາອື່ນໆ. ຈະເຮັດໃຫ້ຄອບຄົວໃນສະຫະລັດ ອາເມຣິກາ ປະມານ 86% ມີສິດໄດ້ຮັບການຊ່ວຍເຫຼືອທາງດ້ານການເງິນ.

ທັງນີ້, ອີງຕາມຂໍ້ມູນສຳມະໂນຄົວຂອງສະຫະລັດ ອາເມຣິກາ, ລາຍຮັບສະເລ່ຍຂອງຄົວເຮືອນແມ່ນ 80,610 ໂດລາໃນປີ 2023.