ໃນຕອນເຊົ້າວັນທີ 20 ມີນານີ້, ໄດ້ມີພິທີໃສ່ບາດ-ຖວາຍສັງຂະທານ ຢູ່ຫໍຈາລຶກປະຫວັດສາດ ບັ້ນຮົບປ້ອງກັນຕົວເມືອງທ່າແຂກ 21 ມີນາ 1946, ເຂົ້າຮ່ວມໃນພິທີມີ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີບັນດາການນຳຂອງແຂວງ, ພະນັກງານການນຳປະຕິວັດອາວຸໂສບຳນານ, ຕະຫຼອດເຖິງພໍ່ແມ່ປະຊາຊົນຊາວພຸດທະສາສະນິກະຊົນຊາວເມືອງທ່າແຂກເຂົ້າຮ່ວມ.

ງານຕັ້ງກອງບຸນຢູ່ຫໍຈາລຶກປະຫວັດສາດ 21 ມີນາ 1946ຄັ້ງນີ້, ເພື່ອອຸດທິດສ່ວນບຸນກຸສົນເຖິງດວງວິນຍານນັກຮົບປະຕິວັດ ແລະ ປະຊາຊົນບັນດາເຜົ່າທີ່ເສຍສະຫຼະຊີວິດເລືອດເນື້ອ ໃນບັ້ນຮົບປ້ອງກັນຕົວເມືອງທ່າແຂກ 21 ມີນາ 1946 ຊຶ່ງແມ່ນວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ບັ້ນຮົບດັ່ງກ່າວແມ່ນເປັນບັ້ນຮົບໜຶ່ງທີ່ມີຄວາມໝາຍສໍາຄັນຕໍ່ການຕໍ່ສູ້ປ້ອງກັນຕົວເມືອງທ່າແຂກຈາກອິດທິກໍາລັງຂອງຈັກກະພັດຝຣັ່ງຜູ້ຮຸກຮານ ເວົ້າສະເພາະ, ເວົ້າລວມກໍຄືປະຊາຊົນລາວບັນດາເຜົ່າໃນທົ່ວປະເທດ. ງານບຸນໃນຄັ້ງນີ້, ຍັງເປັນການສືບທອດມູນເຊື້ອປະເພນີອັນດີງາມຂອງຊາດ, ທັງເພື່ອແນໃສ່ເຮັດໃຫ້ປະຊາຊົນລາວບັນດາເຜົ່າຊາວເມືອງທ່າແຂກກໍຄືແຂວງຄຳມ່ວນໄດ້ຈາລຶກເຖິງເຫດການສຳຄັນດັ່ງກ່າວໄວ້ຕະຫຼອດໄປ.

(ຂ່າວ: ມະນີວັນ)