ການສ້າງເສດຖະກິດຄອບຄົວແມ່ນການຫາລາຍໄດ້ແກ້ໄຂຄວາມທຸກຍາກ ເຮັດໃຫ້ສະມະຊິກທຸກຄົນມີຢູ່ມີກິນ, ມີລາຍຮັບ ໂດຍອີງໃສ່ຄວາມສາມາດ, ທ່າແຮງ, ເງື່ອນໄຂ ແລະ ການຊ່ວຍເຫຼືອ ເຊິ່ງກັນ ແລະ ກັນ ປະກອບກັບຄວາມດຸໝັ່ນຂະຫຍັນພຽນ ເຮັດໃຫ້ຖານະຂອງຄອບຄົວດີຂຶ້ນ, ຄືດັ່ງຄອບຄົວຂອງ ທ່ານ ຄໍາໂອດ ໄຊຍະລາດ ອາຍຸ 55 ປີ ປັດຈຸບັນເປັນປະຊາຊົນ ຢູ່ບ້ານ ດົງບາກໃໝ່ຫີນຄໍາ ເມືອງສະໜາມໄຊ ແຂວງອັດຕະປື ໄດ້ນຳເອົາຜົນສຳເລັດຈາກການ​ຜະລິດກະສິກຳເປັນສິນຄ້າຕາມແນວທາງນະໂຍບາຍຂອງພັກ-ລັດ ລາຍງານໃນກອງປະຊຸມໃຫຍ່ອົງຄະນະພັກເມືອງສະໜາມໄຊ ຄັ້ງທີ XIII ແລະ ເປັນຄອບຄົວຕົວແບບເຮັດແທ້ທຳຈິງໃນການປູກຝັງ ໂດຍການປູກພືກປະສົມປະສານ ສາມາດສ້າງລາຍຮັບໄດ້ສະເລ່ຍ 70 ລ້ານກວ່າກີບຕໍ່ປີ.

ທ່ານ ຄໍາໂອດ ໄຊຍະລາດ ໄດ້ໃຫ້ຮູ້ວ່າ: ຕົນເອງໄດ້ສ້າງຄອບຄົວກັບ ນາງ ໜຸ່ຍ ແຕ່ປີ 2000 ເປັນຕົ້ນມາ ເປັນເວລາ 25 ປີແລ້ວ, ມີລູກນໍາກັນ 3 ຄົນ, ມີແຮງງານສົມບູນ 5 ຄົນ ຍິງ 1 ຄົນ, ໃນເບື້ອງຕົ້ນຄອບຄົວແມ່ນຢູ່ບ້ານຄັງ ແລະ ກໍເປັນຄອບຄົວໜຶ່ງທີ່ນອນຢູ່ໃນຄອບຄົວທຸກຍາກ, ອາຊີບຕົ້ນຕໍໃນໄລຍະນັ້ນ ແມ່ນເຮັດນາ ແລະ ຮັບຈ້າງທົ່ວໄປ ຊຶ່ງເຫັນວ່າລາຍຮັບທີ່ໄດ້ມາຍັງບໍ່ພຽງພໍກັບຄວາມຮຽກຮ້ອງຕ້ອງການຂອງການໃຊ້ຈ່າຍພາຍໃນຄອບຄົວ ເຮັດໃຫ້ການດໍາລົງຊີວິດ ພົບກັບຄວາມຫຍຸ້ງຍາກ ຂາດເຂີນຫຼາຍດ້ານ. ມາຮອດປີ 2004 ຕົນເອງ ແລະ ເມຍ ໄດ້ປຶກສາຫາລື ເປັນເອກະພາບຕັດສິນໃຈຢ່າງຕັ້ງໜ້າ ໃນການທຳການຜະລິດ ໂດຍສຸມໃສ່ການປູກພືດຜັກກິນໝາກ ແລະ ກິນໃບ ເຊັ່ນ: ປູກໝາກຖົ່ວ, ໝາກແຕງ, ໝາກໂມ, ໝາກເຂືອ ແລະ ພຶດຜັກກິນໃບອື່ນໆ ໃນເນື້ອທີ່ 0.6 ເຮັກຕາ, ຊຶ່ງສາມາດສ້າງລາຍຮັບຈາກການຂາຍຜົນຜະລິດ ລວມ ໃນ 13 ປີ ໄດ້ປະມານ 100 ລ້ານກວ່າກີບ, ລາຍຮັບດັ່ງກ່າວນັ້ນຈໍານວນໜຶ່ງແມ່ນໄດ້ໃຊ້ຈ່າຍເຂົ້າໃນການ ດໍາລົງຊີວິດປະຈຳວັນ ແລະ ລາຍຮັບຈໍານວນໜຶ່ງ ແມ່ນໄດ້ສະສົມໄວ້, ການຜະລິດໃນໄລຍະນັ້ນ ແມ່ນມີຄວາມຫຍຸ້ງຍາກຫຼາຍ ເນື່ອງຈາກເນື້ອທີ່ທໍາການຜະລິດມີຈຳກັດ, ພາຫະນະ ແລະ ອຸປະກອນຍັງຂາດເຂີນ, ຕໍ່ມາຮອດປີ 2012 ໄດ້ມີແນວຄິດຢາກເພີ່ມຜົນຜະລິດໃຫ້ຫຼາຍຂຶ້ນ ຈຶ່ງໄດ້ປຶກສາຫາລືກັບຜູ້ເປັນເມຍ ໄດ້ເອກະພາບກັນນໍາເອົາເງິນທີ່ສະສົມໄວ້ ມາຊື້ລົດໄຖນາ 1 ຄັນ, ລົດຈັກ 1 ຄັນ ແລະ ຊື້ດິນຕື່ມອີກ 1 ຕອນ ຈໍານວນ 0.5 ເຮັກຕາ. ໃນປີ 2017 ດ້ວຍຫຼາຍເງື່ອນໄຂ ຂ້າພະເຈົ້າພ້ອມດ້ວຍຄອບຄົວ ໄດ້ຍົກຍ້າຍ ໄປຢູ່ບ້ານ ທ່າແສງຈັນ ຊຶ່ງການດໍາລົງຊີວິດໃນເບື້ອງຕົ້ນ ກໍພົບຄວາມຫຍຸ້ງຍາກຫຼາຍດ້ານ ແຕ່ດ້ວຍຄວາມເປັນຮ່ວງເປັນໄຍຂອງຄະນະພັກຂັ້ນເທິງ ກໍຄື ການຈັດຕັ້ງຂອງບ້ານ ທ່າແສງຈັນ ໄດ້ປະຕິບັດນະໂຍບາຍ ຈັດສັນເນື້ອທີ່ດິນໃຫ້ຄອບຄົວ ຈໍານວນ 1 ຕອນ, ມີເນື້ອທີ 0.5 ເຮັກຕາ ຈຶ່ງໄດ້ສືບຕໍ່ທໍາການຜະລິດ ປູກພືດຜັກປະເພດຕ່າງໆ ຢູ່ໃນເນື້ອທີ່ດິນຕອນດັ່ງກ່າວ ເປັນຕົ້ນ: ປູກໝາກຖົ່ວ, ໝາກແຕງ, ໝາກໂມ, ໝາກເຂືອ ແລະ ພຶດຜັກກິນໃບອື່ນໆ ແລະ ສາມາດສາງລາຍຮັບໄດ້ 25 ລ້ານກວ່າກີບຕໍ່ປີ, ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນກວ່າເກົ່າ, ສາມາດສົ່ງລູກເຂົາໂຮງຮຽນ ແລະ ໄດ້ເລີ່ມປູກສ້າງເຮືອນ ຢູ່ໄດ້ລະດັບໜຶ່ງ ແຕ່ຍັງບໍ່ທັນສໍາເລັດ. ມາຮອດທ້າຍປີ 2018 ກໍໄດ້ຮັບຜົນກະທົບ ຈາກເຫດການຄູກັນນໍ້າເຂື່ອນເຊປຽນ-ເຊນໍ້ານ້ອຍແຕກ.

ນັບແຕ່ທ້າຍປີ 2018 ເປັນຕົ້ນມາ ຄອບຄົວກໍໄດ້ຖືກຍົກຍ້າຍ, ຈັດສັນໃຫ້ມາຢູ່ ບ້ານດົງບາກໄໝ່ຫິນຄໍາ ຊຶ່ງຄະນະພັກຂັ້ນເທິງ ໄດ້ມີນະໂຍບາຍຟື້ນຟູແກ້ໄຂຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບດັ່ງກ່າວ. ຄອບຄົວຂ້າພະເຈົ້າ ໄດ້ຮັບການຊຸກຍູ້ສົ່ງເສີມໃນຫຼາຍດ້ານເຊັ່ນ: ດ້ານວິຊາການ, ແນວພັນ, ຢາປາບສັດຕູພືດ ແລະ ອື່ນໆ. ຈາກນັ້ນ, ຂັ້ນເທິງໄດ້ຕົກລົງໃຫ້ຄອບຄົວຂ້າພະເຈົ້າເຂົ້າຮ່ວມໃນການຮ່ວມມືທົດລອງສາທິດເຮືອນຮົ່ມ ໂດຍໄດ້ສຸມໃສ່ການປູກພືດປະສົມປະສານ ຊຶ່ງເປັນພືດທີ່ຕະຫຼາດມີຄວາມຕ້ອງການ ເຊັ່ນ: ປູກໝາກຖົ່ວ, ໝາກແຕງ, ໝາກໂມ, ໝາກເຂືອ ແລະ ພືດຜັກກິນໃບ, ບັນດາຜົນຜະລິດດັ່ງກ່າວນັ້ນ ແມ່ນໄດ້ນໍາໄປຈຳໜ່າຍຢູ່ຕະຫຼາດເມືອງ ແລະ ຈໍານວນໜຶ່ງ ກໍມີແມ່ຄ້າໄປຮັບຊື້ຢູ່ສວນເລີຍ, ໃນໄລຍະແຕ່ປີ 2023 ຫາ 2025 ນີ້ ສາມາດສ້າງລາຍຮັບໃຫ້ຄອບຄົວໄດ້ສະເລ່ຍ 70 ລ້ານກວ່າກີບຕໍ່ປີ. ຈາກລາຍຮັບດັ່ງກ່າວ ໄດ້ເຮັດໃຫ້ຄອບຄົວ ມີຊີວິດການເປັນຢູ່ທີ່ດີ, ມີເງີນສົ່ງລູກໄດ້ຮໍ່າຮຽນ, ມີເນື້ອທີ່ດິນປຸກສ້າງ 2 ຕອນ, ດິນສວນ 3 ຕອນ ເນື້ອທີ່ 1 ເຮັກຕາ, ມີສັດລ້ຽງອີກຈໍານວນໜຶ່ງ ແລະ ມີເຮືອນຢູ່ແບບຖາວອນ.

(ໂດຍ: ໄພບູນ)