ອົງການໄອຍະການປະຊາຊົນສູງສຸດ (ອອປສ) ໄດ້ຈັດກິດຈະກຳອອກແຮງງານລວມອະນາໄມເກັບມ້ຽນຂີ້ເຫຍື້ອ,ປັດກວາດຢູ່ພາຍໃນສຳນັກງານເພື່ອຮັບຕ້ອນວັນສ້າງຕັ້ງພັກປະຊາຊົນປະຕິວັດລາວ (ພັກ ປປ ລາວ) ຄົບຮອບ 70 ປີຂຶ້ນໃນວັນທີ 20 ມີນານີ້ ທີ່ສຳນັກງານດັ່ງກ່າວໂດຍມີບັນດາຫົວໜ້າອົງການ ອອປສ, ຮອງກົມ, ຫົວໜ້າພະແນກ-ຮອງພະແນກ, ພະນັກງານ-ລັດຖະກອນພາຍໃນເຂົ້າຮ່ວມ.

ໃນໂອກາດດັ່ງກ່າວ, ທ່ານນາງ ພອນທິບ ສາວະລີ ຄະນະບໍລິຫານງານພັກຫົວໜ້າກົມຈັດຕັ້ງ-ພະນັກງານ ທັງເປັນປະທານສະຫະພັນແມ່ຍິງ ອອປສ ກ່າວວ່າ: ການຈັດກິດຈະກຳອອກແຮງງານລວມໃນຄັ້ງນີ້ ໂດຍໄດ້ນໍາພາພະນັກງານ-ລັດຖະກອນອະນາໄມເກັບມ້ຽນຂີ້ເຫຍື້ອ,ປັດກວາດຢູ່ພາຍໃນສຳນັກງານໃຫ້ມີຄວາມສະອາດຈົບງາມ ເພື່ອຮັບຕ້ອນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ພ້ອມນີ້ທ່ານຍັງໄດ້ຍົກໃຫ້ເຫັນມູນເຊື້ອວັນສ້າຕັ້ງພັກປປລາວ ຄົບຮອບ 70 ປີ ໂດຍພາຍໃຕ້ການນຳພາຂອງພັກປປລາວ ຕະຫຼອດໄລຍະ70 ປີ ຜ່ານມາ ພັກໄດ້ເດັດດຽ່ວຈັດຕັ້ງນໍາພາພາລະກິດປົດປ່ອຍປະເທດຊາດ ເຮັດໃຫ້ປະຊາຊົນລາວບັນດາເຜົ່າໄດ້ຢູ່ດີ, ກິນດີ, ປະເທດຊາດໄດ້ຮັບການພັດທະນາຫຼາຍດ້ານ ປະຊາຊົນມີສິດເສລີພາບ, ຮັກແພງສາມັກຄີປອງດອງ, ເຊື່ອໝັ້ນຕໍ່ການນຳພາຂອງພັກ. ພາຍໃຕ້ການນຳພາຂອງພັກປປລາວ ອົງການໄອຍະການປະຊາຊົນ ໄດ້ຮັບການສ້າງຕັ້ງຂຶ້ນໃນເດືອນມັງກອນປີ 1990 ປັດຈຸບັນມີອາຍຸຄົບຮອບ 35 ປີ ຊຶ່ງເມື່ອຫວນຄືນຫຼັງແລ້ວ ເຫັນວ່າອົງການໄອຍະການປະຊາຊົນໄດ້ເຕີບໃຫຍ່ເຂັ້ມແຂງຂະຫຍາຍຕົວຢ່າງບໍ່ຢຸດຢັ້ງທາງດ້ານການຈັດຕັ້ງ, ບຸກຄະລາກອນ, ວຽກງານໄອຍະການປະຊາຊົນໄດ້ຮັບການພັດທະນານັບຕັ້ງແຕ່ຂັ້ນສູນກາງລົງຮອດທ້ອງຖິ່ນ ມາຮອດປັດຈຸບັນ,ອົງການໄອຍະການປະຊາຊົນປະກອບດ້ວຍອົງການໄອຍະການປະຊາຊົນສູງສຸດ, ອົງການໄອຍະການປະຊາຊົນພາກ 3 ພາກ, ອົງການໄອຍະການປະຊາຊົນແຂວງ-ນະຄອນຫຼວງ18 ແຫ່ງ, ອົງການໄອຍະການປະຊາຊົນເຂດ 46 ເຂດ, ອົງການໄອຍະການປະຊາຊົນເຂດປະຈໍາເມືອງ 22 ເມືອງ ແລະ ອົງການໄອຍະການທະຫານ ໄດ້ປະກອບສ່ວນເຂົ້າໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍຢູ່ປະເທດເຮົານັບມື້ມີຄວາມສັກສິດ, ຮັບປະກັນໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ, ເສດຖະກິດ-ສັງຄົມໄດ້ຮັບການພັດທະນາຕາມແນວທາງຂອງພັກທີ່ວາງໄວ້ຢ່າງບໍ່ຢຸດຢັ້ງ.

ໂອກາດນີ້, ທ່ານນາງ ພອນທິບ ສາວະລີ ໄດ້ຕາງໜ້າໃຫ້ຄະນະພັກ-ຄະນະນຳ, ສະມາຊິກພັກ, ພະນັກງານ-ລັດຖະກອນ, ອົງການໄອຍະການປະຊາຊົນສູງສຸດ ອວຍພອນໄຊອັນປະເສີດແດ່ການນໍາພັກ-ລັດຈົ່ງມີສຸຂະພາບເຂັ້ມແຂງ ປະສົບຜົນສໍາເລັດໃນໜ້າທີ່ວຽກງານ ນໍາພາ-ຊີ້ນໍາປະເທດຊາດໃຫ້ຈະເລີນຮຸ່ງເຮືອງກ້າວໜ້າຍິ່ງໆຂຶ້ນ.

ຂ່າວ-ພາບ: ຍຸພິນທອງ