ວັນທີ 22 ມີນາຜ່ານມານີ້ ທີ່ສະໂມສອນມະຫາວິທະຍາໄລ ສຸພານຸວົງ, ແຂວງຫຼວງພະບາງໄດ້ຈັດພິທີປະດັບຫຼຽນກາລະນຶກ 70 ປີ ໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ໃຫ້ການນໍາ ແລະອະດິດການນຳ ແຂວງຫຼວງພະບາງ, ໂດຍເປັນປະທານຂອງ ສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ, ມີການນໍາ, ອະດິດການນຳ ພ້ອມດ້ວຍພະນັກງານຫຼັກແຫຼ່ງແຂວງຫຼວງພະບາງເຂົ້າຮ່ວມ.
 ສະຫາຍ ຄໍາຄ່ອງ ພົມມະປັນຍາ ໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການປະດັບຫຼຽນກາລະນຶກ 70 ປີ, ວັນສ້າງຕັ້ງພັກປະຊາຊົນ ປະຕິວັດລາວ ວັນທີ່ 22 ມີນາ 1955 ຫາ ວັນທີ່ 22 ມີນາ 2025 ໃຫ້ສະມາຊິກພັກ ພາຍແຂວງ ຈໍານວນ 1,437 ສະຫາຍ. ໃນນີ້, ສະມາຊິກພັກບໍານານ 856 ສະຫາຍ ຍິງ 92 ສະຫາຍ ແລະ ສະມາຊິກພັກປະຈໍາການ 581 ສະຫາຍ ຍິງ 14 ສະຫາຍ ທີ່ມີຜົນງານ, ຄຸນງາມຄວາມດີ ໃນພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະຜ່ານມາ.
 (ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ)