ໃນຕອນເຊົ້າຂອງວັນທີ 23 ມີນາຜ່ານມາ, ຄະນະອະນຸກຳມະການໂຄສະນາ, ຂະບວນການ, ພິທີການ, ປະດັບປະດາ ແລະ ຍ້ອງຍໍ ຂັ້ນແຂວງ ແລະ ສະຫະພັນລົດຖີບແຂວງວຽງຈັນ ໄດ້ຮ່ວມກັນຈັດກິດຈະກຳຂະບວນຂີ່ລົດຖີບເພື່ອຂ່ຳນັບຮັບຕ້ອນວັນສຳຄັນທາງປະຫວັດສາດຂອງຊາດ-ຂອງພັກ ໃຫ້ກຽດເຂົ້າຮ່ວມຂອງ ທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ, ມີການນຳຂັ້ນແຂວງ, ເມືອງ, ພະນັກງານ, ນັກທຸລະກິດ ຈາກ 4 ຕົວເມືອງທົ່ງພຽງຂອງແຂວງ ແລະ ຈາກນະຄອນຫຼວງວຽງຈັນ ເຂົ້າຮ່ວມ 200 ກວ່າຄົນ.
        ທ່ານເຈົ້າແຂວງວຽງຈັນ ໄດ້ໃຫ້ກຽດຂຶ້ນກ່າວເປີດງານຄັ້ງນີ້ວ່າ: ການຈັດກິດຈະກຳຄັ້ງ ເພື່ອຂ່ຳນັບຮັບຕ້ອນວັນສຳຄັນທາງປະຫວັດສາດຂອງຊາດ-ຂອງພັກ ຄື: ສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ຂ່ຳນັບຮັບຕ້ອນວັນສະຖາປະນາ ສປປ ລາວ ຄົບຮອບ 50 ປີ ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 105 ປີ ແລະ ຂໍານັບຮັບຕ້ອນກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ຄັ້ງທີ VII ທີ່ຈະໄຂຂຶ້ນໃນຕໍ່ໜ້ານີ້, ເພື່ອເປັນການພົບປະສັງສັນລະຫວ່າງພາກລັດ-ເອກະຊົນ, ບັນດານັກທຸລະກິດດ້ວຍກັນ ທັງເປັນການອອກກຳລັງກາຍເຮັດໃຫ້ສຸຂະພາບແຂງແຮງ ແລະ ທັງເປັນການຮັດແໜ້ນຄວາມສາມັກຄີໃຫ້ມີຄວາມແໜ້ນແຟ້ນຍິ່ງຂຶ້ນ.
    (ແຫຼ່ງຂ່າວ: ແຂວງວຽງຈັນ)