ທະນາຄານນະໂຍບາຍ (ທນບ) ໄດ້ສໍາເລັດກອງປະຊຸມສະຫຼຸບການເຄື່ອນໄຫວວຽກງານ ປະຈຳປີ 2024 ແລະທິດທາງແຜນການ ປະຈຳປີ 2025ເມື່ອບໍ່ດົນມານີ້ ທີ່ສູນການຮ່ວມມືສາກົນ ແລະການຝຶກອົບຮົມ (ICTC) ນະຄອນຫຼວງວຽງຈັນ ໂດຍການເປັນປະທານ ຂອງທ່ານ ສຸພັກ ຖິ່ນໄຊພອນ ເລຂາຄະນະພັກຮາກຖານຜູ້ອຳນວຍການ ທນບ; ມີຄະນະພັກ, ຄະນະອໍານວຍການ, ຫົວໜ້າພະແນກ, ຫົວໜ້າສາຂາ ແລະ ຂະແໜງການ ທນບ ໃນທົ່ວປະເທດ ເຂົ້າຮ່ວມ.

ກອງປະຊຸມ ໄດ້ສະຫຼຸບການເຄື່ອນໄຫວວຽກງານ ຂອງ ທນບ ຢ່າງຮອບດ້ານ ປະຈຳປີ 2024 ແລະ ກຳນົດຄາດໝາຍສູ້ຊົນ ປະຈຳປີ 2025 ພ້ອມດຽວກັນນັ້ນກໍໄດ້ມອບການຍ້ອງຍໍ ໃຫ້ບັນດາສາຂາ ແລະ ໜ່ວຍບໍລິການ ທີ່ມີຜົນງານດີເດັ່ນ ປະຈຳປີ 2024 ແລະ ບັນຫາສໍາຄັນອື່ນໆຈໍານວນໜຶ່ງ.

ສໍາລັບການເຄື່ອນໄຫວວຽກງານ ຂອງ ທະນາຄານນະໂຍບາຍ ປະຈຳປີ 2024 ຜົນການດຳເນີນງານໃນປີ 2024 ມີລາຍຮັບ 579.27 ຕື້ກີບ ລາຍຈ່າຍ 567.38 ຕື້ກີບ ມີກຳໄລໃນປີ 2024 ຈໍານວນ 7.91 ຕື້ກີບ ແລະ ໄດ້ປ່ອຍສິນເຊື່ອທັງໝົດ 648.60 ຕື້ກີບ ເທົ່າກັບ 79% ຂອງແຜນການ ປີ (817 ຕື້ກີບ), ທຽບໃສ່ປີຜ່ານມາ (564.10 ຕື້ກີບ) ເພີ່ມຂຶ້ນ 84 ຕື້ກີບ ຫຼື 15% ຊຶ່ງປ່ອຍ ຕາມຂະແໜງການປູກຝັງ 266.35 ຕື້ກີບ ເທົ່າກັບ 41%, ລ້ຽງສັດ 300.50 ຕື້ກີບ ເທົ່າກັບ 46%, ຫັດຖະກຳ 15.65 ຕື້ກີບ ເທົ່າກັບ 2.41%, ຫັດຖະກຳປຸງແຕ່ງ 11.96 ຕື້ກີບເທົ່າກັບ 1.84%, ຂະແໜງການບໍລິການ: 54.12 ຕື້ກີບ ເທົ່າກັບ 8.34 % ຂອງການປ່ອຍສິນເຊື່ອ.

ຮອດທ້າຍປີ 2024 ປະຊາຊົນ ເຂົ້າເຖິງສິນເຊື່ອທັງໝົດ ກວມເອົາ 17 ແຂວງ 1 ນະຄອນຫຼວງ, 128 ເມືອງ, 3 ນະຄອນ, 5,252 ບ້ານ ເປັນບ້ານທຸກ 1,509 ຄອບຄົວ, 76,962ກຸ່ມ, 286,256 ຄອບຄົວ ເປັນຄອບຄົວທຸກ 43,565 ຄອບຄົວ; ສ້າງໂຄງການພົ້ນເດັ່ນໄດ້ທັງໝົດ 311 ໂຄງການ, ມີຄອບຄົວຕົວແບບ 532 ຄອບຄົວ, ໃນນີ້ປະກອບມີໂຄງການປູກຝັງ 39 ໂຄງການ, 76 ຄອບຄົວ; ໂຄງການລ້ຽງສັດ 253 ໂຄງການ, 424 ຄອບຄົວ,ໂຄງການຫັດຖະກໍາ 9 ໂຄງການ, 17 ຄອບຄົວ, ໂຄງການອຸດສາຫະກໍາ 7 ໂຄງການ, 12 ຄອບຄົວ ແລະໂຄງການບໍລິການ 3 ໂຄງການ ແລະ 3 ຄອບຄົວ. ກອງປະຊຸມຍັງໄດ້ຜ່ານທິດທາງແຜນການ ປະຈຳປີ 2025 ໂດຍສຸມໃສ່ການຫັນເອົາ ທນບ ໄປເປັນ ທພບ, ວາງເປົ້າໝາຍ, ກຳນົດທິດທາງ ແລະ ຍຸດທະສາດ (ທັງໄລຍະສັ້ນ ແລະ ໄລຍະຍາວ ຊຶ່ງຈະຕ້ອງໄດ້ກຳນົດ SLOGAN), ເລັ່ງລົງທຶນພັດທະນາດ້ານໂຄງສ້າງພື້ນຖານລະບົບ IT ໃຫ້ມີ Core Banking ໃໝ່ ໃຫ້ສາມາດບໍລິການໄດ້ຫຼາກຫຼາຍຜະລິດຕະພັນ, ໂດຍຈະຕ້ອງພັດທະນາ ຜະລິດຕະພັນທາງການເງິນ ທາງເອເລັກໂຕນິກອອກສູ່ສັງຄົມ, ຄົ້ນຄວ້າສ້າງ ແລະ ເປີດໂຕສາຂາຮູບແບບໃໝ່ ທີ່ມີຜະລິດຕະພັນການບໍລິການ ທີ່ທັນສະໄໝ; ປັບປ່ຽນວັດທະນະທຳ ຂອງອົງກອນ, ສ້າງຮູບແບບການເຮັດວຽກຢ່າງປະດິດສ້າງ; ມຸ່ງເນັ້ນການຂະຫຍາຍກຸ່ມທຸລະກິດ SME, ຮັກສາ ແລະຂະຫຍາຍຖານລູກຄ້າໃນຊົນນະບົດ; ມຸ່ງເນັ້ນສ້າງລາຍໄດ້ ແລະຫຼຸດລາຍຈ່າຍ ແລະ ເລັ່ງສ້າງ Platform; ເລັ່ງສ້າງໂຄງສ້າງເປົ້າໝາຍ ຕົວຊີ້ວັດ KPI ແລະ ເປົ້າໝາຍຂອງອົງກອນ.

ທ່ານ ສຸພັກ ຖິ່ນໄຊພອນ ໄດ້ເນັ້ນໃຫ້ສືບຕໍ່ປະຕິບັດໜ້າທີ່ການເມືອງໃນໄລຍະໃໝ່ ໃນການປະກອບສ່ວນແກ້ໄຂຄວາມທຸກຍາກຂອງປະຊາຊົນ ໃຫ້ມີປະສິດທິຜົນກວ່າເກົ່າ, ເອົາໃຈໃສ່ຄຸ້ມຄອງການດຳເນີນງານຕ້ອງບົນພຶ້ື້ນຖານການປະຕິບັດແນວທາງແຕ່ຮັບປະກັນການໄລ່ລ່ຽງ,ການຄຸ້ມຄອງບໍລິຫານລາຍຮັບ-ລາຍຈ່າຍໃຫ້ສອດຄ່ອງກັບແຜນການແລະຖືກຕ້ອງຕາມລະບຽບກົດໝາຍ; ພ້ອມກັນປະຢັດມັດທະຢັດ, ຫຼີກລ່ຽງລາຍຈ່າຍ ທີ່ເປັນອັນຟຸ່ມເຟືອຍ, ຈຳກັດລາຍຈ່າຍທີ່ບໍ່ມີຄວາມຈຳເປັນ ພ້ອມທັງຕ້ອງຄົ້ນຄວ້າມາດຕະການ,ວິທີການຄຸ້ມຄອງສາຂາແລະໜ່ວຍບໍລິການໃນການດຳເນີນທຸລະກິດໃຫ້ມີການໄລ່ລຽງ,ຫຼີກລ່ຽງການຂາດທຶນສະສົມເປັນເວລາຫຼາຍປີ.

(ຂ່າວ: ຣັດສະໝີ ດວງສັດຈະ)