ແຂວງຊຽງຂວາງຈັດພິທີວາງສີລາລຶກໂຄງການກໍ່ສ້າງຫໍຫຼັກເມືອງ ໃນວັນທີ 24 ມີນານີ້, ຢູ່ໃກ້ສີ່ແຍກໄຟແດງບ້ານໂພນງາມໄຕ້ ເມືອງແປກ ໂດຍການນຳພາຂອງທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ.

ທ່ານ ສີວີໄລ ແສງຈະເລີນ ຮອງເຈົ້າແຂວງໆຊຽງຂວາງ ໄດ້ລາຍງານວ່າ: ໂຄງການກໍ່ສ້າງຫໍຫຼັກເມືອງເປັນຮູບຈະຕຸລັດ 6X6 ແມັດ, ສູງ 16 ແມັດ, ເນື້ອທີ່ລະບຽງອ້ອມອາຄານ 224 ຕາແມັດ, ເນື້ອທີ່ດິນທັງໝົດ 20x46.8 ຕາແມັດ ລວມມູນຄ່າການກໍ່ສ້າງ 9 ຕື້ກ່ວາກີບ ເປັນທຶນລະດົມຈາກສັງຄົມ, ປະຊາຊົນບັນດາເຜົ່າ, ນັກທຸລະກິດ, ຊາວຄ້າຂາຍ ແລະ ການລະດົມແມ່ນນັບແຕ່ມື້ວາງສີລາລຶກໄປຈົນ ກ່ວາຈະກໍ່ສ້າງສຳເລັດ, ການອອກແບບ ແລະ ການກໍ່ສ້າງແມ່ນໄດ້ນຳເອົາຄວາມເປັນເອກະລັກຂອງແຂວງມາປະສົມປະສານກັບຄວາມເປັນຍຸກສະໄໝໃໝ່ ທີ່ໄດ້ນຳເອົາເອກະລັກສະຖາປັດຕະຍະກຳແບບຊາວພວນ ແລະ ທາງສາສະ ໜາ. ຈາກນັ້ນ, ທ່ານເຈົ້າແຂວງໄດ້ໄຕ້ທຽນໄຊ, ລັ່ນຄ້ອງ 9 ບາດ ເພື່ອເປັນສິລິມຸງຄຸນຕອນທ້າຍກໍໄດ້ວາງສີລາລຶກກໍ່ສ້າງຢ່າງເປັນທາງການ

(ຂ່າວ: ບຸນມີ ແສງທຸມມີ)