ການສະແດງສິລະປະ-ວັດທະນະທຳຮັບໃຊ້ພິທີສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ (22/3/1955-22/3/2025) ໄດ້ຈັດຂຶ້ນໃນຕອນຄໍ່າຂອງວັນທີ 22 ມີນາ 2025 ທີ່ຫໍປະຊຸມແຫ່ງຊາດ, ໂດຍໃຫ້ກຽດເຂົ້າຮ່ວມຊົມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ, ມີບັນດາການນໍາພັກ-ລັດຂັ້ນສູງ, ອະດີດການນໍາ, ທູຕານຸທູດປະເທດເພື່ອນມິດ, ອົງການຈັດຕັ້ງສາກົນປະຈຳລາວ, ການນໍານະຄອນຫຼວງວຽງຈັນ, ກະຊວງ, ອົງການ, ພະນັກງານ, ທະຫານ, ຕຳຫຼວດ ແລະ ຊາວນະຄອນຫຼວງວຽງຈັນເຂົ້າຮ່ວມ.

ໃນການສະແດງສິລະປະຄັ້ງນີ້ ປະກອບມີ 2 ພາກຄື: ພາກທີ1 ເສບດົນຕີຊິມໂຟນີ (ເສບວົງອໍແກັສຕຣາ) ມີເພງສຽງປຶນສະຫຼອງໄຊ, ເພງຈົດຈຳບຸນຄຸນພັກ ແລະ ເພງກ້າວສ້າງສະຫວັນເມືອງລາວ ແລະພາກທີ2 ການສະແດງປະສົມປະສານລະຫວ່າງດົນຕີ, ຟ້ອນ, ຮ້ອງເພງ, ລະຄອນ, ກາຍຍະສິນປະກອບພາບ, ໄຟ, ແສງ,ສີ, ສຽງ ລວມມີ 4 ຕອນ: ໃນຫົວຂໍ້ 70 ປີ ໃຕ້ຮົ່ມທຸງຂອງພັກ ມີຕອນທີ 1: ສຸກໃຈໃນບ້ານເກີດ; ຕອນທີ 2: ຢາດເຫື່ອ ແລະ ນໍ້າຕາ; ຕອນທີ 3: ວິລະກຳອັນອົງອາດກ້າຫານຂອງກອງທັບ ແລະ ປະຊາຊົນບັນດາເຜົ່າ ແລະ ຕອນທີ 4: ກ້າວສູ່ການພັດທະນາ.

ໃນພິທີ, ສະຫາຍ ນາງ ສວນສະຫວັນ ວິຍະເກດ ກຳມະການສູນກາງພັກ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ໄດ້ກ່າວວ່າ: ການແດງສິລະປະໃນຄັ້ງນີ້ເປັນກິດຈະກຳໜຶ່ງທີ່ສຳຄັນຂອງການສະເຫຼີມສະຫຼອງວັນສ້າງຕັ້ງພັກ ຄົບຮອບ 70 ປີ ແລະ ການສະແດງສິລະເປັນການປະກອບສ່ວນເຂົ້າໃນການສຶກສາອົບຮົມໃຫ້ຄົນຮຸ່ນໃໝ່ເຫັນໄດ້ມູນເຊື້ອການນໍາພາພິລະອາດຫານລະອິດລະອ້ຽວຫຍຸຸ້ງຍາກ ແລະ ສ່ອງແສງໃຫ້ເຫັນເຖິງໄຊຊະນະອັນສະຫງ່າງາມຂອງພັກເຮົາໃນການນໍາພາໄລຍະຕໍ່ສູ້ປົດປ່ອຍຊາດກໍຄືການນໍາພາສ້າງສາພັດທະນາປະເທດຊາດອັນແສນຮັກ ແລະ ຫວງແຫນໂດຍຜ່ານເນື້ອຮ້ອງທຳນອງເພງ ແລະ ບັນດາບົດຟ້ອນບົດສະແດງຕ່າງໆ ຊຶ່ງນັກສະແດງ ແລະ ສິລະປິນໄດ້ນຳເອົາເນື້ອຮ້ອງສັນລະເສີນບຸນຄຸນພັກ ແລະ ການນໍາພາຂອງພັກໃນໄລຍະ 70 ປີຜ່ານມາ ທີ່ໄດ້ນໍາພາປະເທດຊາດແລະ ປະຊາຊໍົນລາວທຸກຄົນຫຼຸດພົ້ນອອກຈາກແອກປົກຄອງຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ໃນຕະຫຼອດໄລຍະ 50 ປີຜ່ານໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດເຮັດໃຫ້ສັງຄົມມີຄວາມສະຫງົບ ແລະ ປະເທດຊາດໄດ້ຮັບການພັດທະນາຢ່າງບໍ່ຢຸດຢັ້ງ.

(ຂ່າວ-ພາບ: ຍຸພິນທອງ)