ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII (2020-2024) ຂອງນະຄອນ ຫຼວງພະບາງ ໄດ້ກຳນົດ 6 ເປົ້າໝາຍຫຼັກ. ໃນໂອກາດຜ່ານບົດສະຫຼຸບ ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII (2020-2024) ສະຫາຍ ສະເຫວີຍ ສີລາວັນ ກຳມະການປະຈຳພັກ ຮອງເຈົ້ານະຄອນ ຫຼວງພະບາງ ແຂວງຫຼວງພະບາງໃຫ້ຮູ້ວ່າ: ໃນໄລຍະ 5 ປີຜ່ານມາ, ເສດຖະກິດຂອງນະຄອນຫຼວງພະບາງຂະຫຍາຍຕົວໃນລະດັບສະເລ່ຍ 6.9% ຕໍ່ປີ, ລວມຍອດລາຍຮັບຜົນຜະລິດພາຍໃນ ບັນລຸໄດ້ 3,989 ຕື້ກວ່າກີບ ເກີນແຜນ 931 ຕື້ກວ່າກີບ, ສະເລ່ຍໄດ້ 39 ລ້ານກ່ວາກີບ ຫຼື ເທົ່າກັບ 1,897 ໂດລາສະຫະລັດ ຕໍ່ຄົນ ຕໍ່ປີ. ອັນພົ້ນເດັ່ນ ແມ່ນການລົງທຶນຢູ່ ນະຄອນ ຫຼວງພະບາງ ມີທັງໝົດ 72 ໂຄງການ, ມູນຄ່າທັງໝົດ 174 ລ້ານກວ່າໂດລາ. ໃນນີ້, ມີໂຄງການລົງທຶນພາຍໃນ 53 ໂຄງການ ລວມມູນຄ່າ 140 ລ້ານກວ່າໂດລາ ແລະ ໂຄງການລົງທຶນຂອງຕ່າງປະເທດ 19 ໂຄງການ ລວມມູນຄ່າ 33 ລ້ານກວ່າໂດລາ, ທຶນຊ່ວຍເຫຼືອລ້າຈາກຕ່າງປະເທດ ມີ 23 ໂຄງການ ລວມມູນຄ່າ 18 ຕື້ກວ່າກີບ; ທຶນສົມທົບຂອງປະຊາຊົນ ລວມມູນຄ່າ 1 ຕື້ກວ່າກີບ ແລະ ທຶນເອກະຊົນພາຍໃນ ມູນຄ່າ 304 ລ້ານກີບ. ປັດຈຸບັນ, ທົ່ວນະຄອນມີບ້ານພົ້ນທຸກ 113 ບ້ານ, ມີ 16,355 ຄອບຄົວ ກວມ 98%, ບ້ານພັດທະນາ ມີ 109 ບ້ານ, ມີ 14,979 ຄອບຄົວ ກວມ 94%. ສັງລວມແລ້ວ ຜົນສຳເລັດທີ່ພົ້ນເດັ່ນ ໃນໄລຍະຜ່ານມາໄດ້ເຮັດໃຫ້ ນະຄອນ ຫຼວງພະບາງ ສືບຕໍ່ມີສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ປະຊາຊົນບັນດາເຜົ່າ ມີຄວາມສາມັກຄີເປັນປຶກແຜ່ນ ພາຍໃຕ້ການນໍາພາຂອງພັກ; ລາຍຮັບມີທ່າອ່ຽງເພີ່ມຂຶ້ນໃນແຕ່ລະປີ ພິເສດແມ່ນ ລາຍຮັບຈາກການບໍລິການທ່ອງທ່ຽວ; ການຄຸ້ມຄອງລາຍຮັບ-ລາຍຈ່າຍ ໄດ້ຮັບການປັບປຸງໃຫ້ດີຂຶ້ນເປັນກ້າວໆ; ເຖີງວ່າງົບປະມານການລົງທຶນຂອງລັດ ພົບຄວາມຫຍຸ້ງຍາກ ແຕ່ການລົງທຶນຂອງພາກເອກະຊົນພາຍໃນ ແລະ ຕ່າງປະເທດຢູ່ ນະຄອນ ຫຼວງພະບາງ ມີທ່າອ່ຽງເພີ່ມຂຶ້ນ; ໂຄງລ່າງພື້ນຖານຮັບໃຊ້ໃຫ້ແກ່ການຜະລິດ, ການບໍລິການສືບຕໍ່ໄດ້ຮັບການຍົກລະດັບ ໂດຍສະເພາະແມ່ນ ການກໍ່ສ້າງເສັ້ນທາງເບຕົງເຂົ້າບ້ານ, ເສັ້ນທາງເຂົ້າຫາສະຖານທີທ່ອງທ່ຽວ, ການຂະຫຍາຍສິ່ງອໍານວຍຄວາມສະດວກຮອງຮັບການທ່ອງທ່ຽວ ນັບມື້ເພີ່ມຂຶ້ນ; ພື້ນຖານໂຄງລ່າງເຊື່ອມຈອດ ເປັນຕົ້ນ ເສັ້ນທາງລົດໄຟລາວ-ຈີນ ແລະ ສະໜາມບິນສາກົນຫຼວງພະບາງ ນັບມື້ໄດ້ຮັບການຍົກລະດັບເທື່ອລະກ້າວ; ການພັດທະນາຊັບພະຍາກອນມະນຸດ, ການຮັກສາສຸຂະພາບຂອງປະຊາຊົນ, ການພັດທະນາຊົນນະບົດ ແລະ ແກ້ໄຂຄວາມທຸກຍາກໄດ້ຮັບການເອົາໃຈໃສ່ ແລະ ມີຜົນສໍາເລັດໃນຫຼາຍດ້ານ ເຮັດໃຫ້ນະຄອນ ຫຼວງພະບາງ ໄດ້ຮັບຮອງຈາກລັດຖະບານ ເປັນນະຄອນພົ້ນທຸກ ແລະນະຄອນເຂັ້ມແຂງຮອບດ້ານ ໃນເດືອນກຸມພາຜ່ານມາ.

(ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ)