ໃນວາລະກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 1 ພະຈິກນີ້, ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ. ສະມາຊິກສະພາແຫ່ງຊາດ (ສສຊ) ຈາກເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳເຫັນຕໍ່ບົດລາຍງານຂອງລັດຖະບານກ່ຽວກັບແຜນພັດທະນາເສດຖະກິດ-ສັງຄົມ, ແຜນງົບປະມານລັດ ແລະ ແຜນເງິນຕາ ເພື່ອໃຫ້ລັດຖະບານແກ້ໄຂ. ໂດຍສະເພາະ ສສຊ ເຂດເລືອກຕັ້ງທີ 2 ແຂວງຜົ້ງສາລີໄດ້ສະເໜີໃຫ້ລັດຖະບານ ຈຳກັດສິນຄ້າການນຳເຂົ້າ ເພື່ອຊຸກຍູ້ເສດຖະກິດພາຍໃນປະເທດໃຫ້ຫຼາຍຂຶ້ນ.
ທ່ານ ສົມຈິດ ຫັບລາກອນ  ສສຊ ເຂດເລືອກຕັ້ງທີ 2 ແຂວງຜົ້ງສາລີມີຄຳເຫັນສະເໜີໃຫ້ລັດຖະບານ ເລັ່ງສົ່ງເສີມຜະລິດພະລັງງານໄຟຟ້າໃຫ້ເປັນຮູບປະທຳ ຖ້າເຮັດໄດ້ຈະເຮັດໃຫ້ພະລັງງານໄຟຟ້າ, ພະລັງງານການຊື້ນໍ້າມັນໜ້ອຍລົງ ແລະ ຍັງເປັນເງື່ອນໄຂປະຢັດເງິນຕາຕ່າງປະເທດໄດ້ຫຼາຍຂຶ້ນ. ໃນນັ້ນ, ບັນຫາການຜະລິດທົດແທນ ຜ່ານມາໄດ້ສຸມໃສ່ພະແນກກະສິກຳ ແລະ ປ່າໄມ້ ເປັນສ່ວນໃຫຍ່ແມ່ນເຫັນດີ ແຕ່ຕ້ອງໄດ້ແນໃສ່ດ້ານອື່ນໆ ພ້ອມເບິ່ງຄືນຄວາມດຸ່ນດ່ຽງທັງໝົດຂອງສິນຄ້າພາຍໃນ ຕົວຢ່າງ: ການຜະລິດເຂົ້າ ຕາມແຜນພັດທະນາເສດຖະກິດແຫ່ງຊາດການຜະລິດເຂົ້າແມ່ນກຸ້ມກິນ ແຕ່ພວກເຮົາຍັງມີການນຳເຂົ້າ ເຂົ້າຫຼາຍ. ສະນັ້ນ, ຂະແໜງການຂອງລັດຖະບານຕ້ອງໄດ້ຄົ້ນຄວ້າຈຳກັດການນຳເຂົ້າສິນຄ້າຕື່ມ ໂດຍມີມາດຕະການຢ່າງແທ້ຈິງ ທັງໝົດເພື່ອຊຸກຍູ້ເສດຖະກິດພາຍໃນປະເທດໃຫ້ຫຼາຍຂຶ້ນ. 
(ຂ່າວ: ວັນເພັງ)