ແຂວງສາລະວັນ ໄດ້ພິທີປະດັບຫຼຽນກາລະນຶກ 70 ປີ ພັກປະຊາຊົນປະຕິວັດລາວ (ພັກ ປປ ລາວ) ໃຫ້ບັນດາສະຫາຍການນຳ, ອະດີດການນຳຂັ້ນສູງພັກ, ລັດເນື່ອງໃນໂອກາດເຫຼີມສະຫຼອງວັນສ້າງຕັ້ງພັກ ປະຊາຊົນປະຕິວັດລາວ ຄົບຮອບ 70 ປີ ຈັດຂຶ້ນໃນຕອນບ່າຍວັນທີ 22 ມີນາຜ່ານມາ ທີ່ແຂວງສາລະວັນໂດຍໃຫ້ກຽດເຂົ້າຮ່ວມຂອງ ສະຫາຍ ດາວວົງ ພອນແກ້ວ ກໍາມະການສູນກາງພັກ ເລຂາພັກແຂວງ ເຈົ້າແຂວງສາລະວັນ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ສະຫາຍ ເວີນມະນີ ມຸ່ງສີວົງສາ ກຳມະການພັກແຂວງ ຫົວໜ້າພະແນກພາຍໃນແຂວງ ໄດ້ຜ່ານມະຕິຕົກລົງ ຂອງຄະນະເລຂາທິການສູນກາງພັກ ສະບັບເລກທີ 419/ຄລສພ, ລົງວັນທີ 14 ມີນາ 2025 ວ່າດ້ວການປະດັບຫຼຽນກາລະນຶກ 70 ປີ ວັນສ້າງຕັ້ງພັກ ປະຊາຊົນປະຕິວັດລາວ (22 ມີນາ 1955-22 ມີນາ 2025) ໃຫ້ສາມະຊິກພັກ ແຂວງສາລະວັນ ຈຳນວນ 835 ສະຫາຍ. ໃນນັ້ນ, ສະມາຊິກພັກບຳນານ 682 ສະຫາຍ ຍິງ 64 ສະຫາຍ, ສະມາຊິກ ປະຈຳການ 153 ສະຫາຍ ຍິງ 4 ສະຫາຍ ແລະຂໍ້ຕົກລົງຄະນະຈັດຕັ້ງສູນກາງພັກ ວ່າດ້ວຍ ການມອບຫຼຽນກາລະນຶກ 70 ປີ ວັນສ້າງຕັ້ງຄະນະຈັດຕັ້ງສູນກາງພັກ (25 ມີນາ 1955-25 ມີນາ 2025)ໃຫ້ພະນັກງານ-ລັດຖະກອນຂະແໜງຈັດຕັ້ງແຂວງສາລະວັນ ຈຳນວນ 95 ສະຫາຍ ຍິງ 34 ສະຫາຍ. ໃຫ້ກຽດປະດັບຫລຽນໂດຍ ສະຫາຍ ດາວວົງ ພອນແກ້ວ, ສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ ຕາມລໍາດັບ.

ການປະດັບຫລຽນໃນຄັ້ງນີ້, ເປັນການຍ້ອງຍໍສັນລະເສີນ ຄຸນງາມຄວາມດີ ແລະ ຜົນງານ ອັນໃຫຍ່ຫຼວງ ຂອງບັນດາການນຳ, ອະດີດການນຳພັກ-ລັດ ທີ່ໄດ້ອຸທິດຕົນ ເຂົ້າໃນການປະຕິບັດໜ້າທີ່ ນຳພາ-ຊີ້ນຳ ສ້າງສາພັດທະນາປະເທດຊາດ ໃນໄລຍະຜ່ານມາ ຈົນຮອດປັດຈຸບັນ.

(ແຫຼ່ງຂ່າວ: ແຂວງສາລະວັນ)