ສະຫາຍນາງສຸກສະຫວັນ ອິນຄະວິໄລ ຮອງຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ(ຄອສພ) ໃຫ້ສໍາພາດນັກຂ່າວໜັງສືພິມປະຊາຊົນ ໃນໂອກາດດໍາເນີນກອງປະຊຸມໃຫຍ່ຄັ້ງທີV ຂອງສະມາຊິກຊາວໜຸ່ມ ທີ່ຄອສພ ວ່າ: ພາຍໃຕ້ການຊີ້ນໍາໆພາຂອງພັກ ກໍຄື ຄະນະພັກ ຄອສພ ຕໍ່ອົງການຈັດຕັ້ງຊາວໜຸ່ມ ຊຶ່ງໄດ້ອໍານວຍຄວາມສະດວກໃຫ້ສະມາຊິກຊາວໜຸ່ມ ໄດ້ສ້າງຜົນງານ ຊຶ່ງຕິດພັນກັບການສ້າງຂະບວນການຕ່າງໆ ສະແດງອອກ ໃນວຽກງານວິຊາສະເພາະ, ກິລາ ແລະ ການຊຸກຍູ້ຊ່ວຍເຫຼືອ ແລະ ສະໜັບສະໜູນສັງຄົມ. ຜົນງານພົ້ນເດັ່ນ ຈໍານວນສະມາຊິກຊາວໜຸ່ມ ໄດ້ກາຍເປັນພະນັກງານສືບທອດໃນຫຼາຍຕໍາແໜ່ງງານທີ່ສູງຂຶ້ນ ເປັນຕົ້ນ ຂັ້ນຫົວໜ້າກົມ, ຮອງກົມ, ຄະນະພະແນກ. ນອກຈາກພົ້ນເດັ່ນໃນວຽກງານວິຊາສະເພາະແລ້ວ, ຍັງພົ້ນເດັ່ນໃນການສ້າງຂະບວນການກິລາ ລະຫວ່າງ ພາຍໃນ ຄອສພ ກັບບັນດາ ກະຊວງ, ອົງການ, ທ້ອງຖິ່ນຕ່າງໆ. ຄຽງຄູ່ກັນນັ້ນ ກໍໄດ້ໄປທັດສະນະສຶກສາ, ແລກປ່ຽນບົດຮຽນ ກ່ຽວກັບວຽກງານອົງການຈັດຕັ້ງມະຫາຊົນ ຄື: ແຂວງບໍ່ແກ້ວ, ຫຼວງນໍ້າທາ, ຄໍາມ່ວນ, ຈໍາປາສັກ. ທັງໝົດນັ້ນ ແມ່ນຜົນງານທີ່ໄດ້ຕິດພັນກັບການຊີ້ນໍາໆພາ ຂອງຄະນະພັກ-ຄະນະນໍາ ຄອສພ.

ໂອກາດດໍາເນີນກອງປະຊຸມໃຫຍ່ຄັ້ງທີV ຂອງສະມາຊິກຊາວໜຸ່ມ ຄອສພໂດຍຕິດພັນກັບ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70ປີ(22/3/1955-22/3/2025), ສະຫາຍນາງສຸກສະຫວັນ ອິນຄະວິໄລ ຕາງໜ້າໃຫ້ສະມາຊິກຊາວໜຸ່ມ ຄອສພ ໃນນາມເປັນຄົນຮຸ່ນໜຸ່ມ ຂໍຈົດຈໍາບຸນຄຸນຂອງພັກ ຍ້ອນມີພັກຊີ້ທິດເຍືອງທາງ ວຽກງານອົງການຈັດຕັ້ງຊາວໜຸ່ມ ຈຶ່ງເຕີບໃຫຍ່ເຂັ້ມແຂງ ແລະ ຂະຫຍາຍຕົວ ທັງປະລິມານ ແລະ ຄຸນນະພາບ. ຍ້ອນມີການນໍາພັກ-ລັດ ກໍຄື ພະນັກງານ ຜູ້ອາວຸໂສ, ການນໍາຮຸ່ນກ່ອນ ທີ່ຖ່າຍທອດຄວາມຮູ້, ສົ່ງຜົນງານໄວ້ໃຫ້ຄົນຮຸ່ນໜຸ່ມ ໄດ້ຝຶກຝົນ, ຫຼໍ່ຫຼອມ, ຮໍ່າຮຽນເອົາຜົນງານ ກໍຄື ບົດຮຽນຕົວຈິງເຫຼົ່ານັ້ນ ນໍາມາໝູນໃຊ້ເຂົ້າໃນການເຮັດວຽກໃນປັດຈຸບັນໄດ້ຢ່າງເປັນຮູບປະທໍາ ແລະ ເພື່ອໃຫ້ກາຍເປັນພະນັກງານທັງໜຸ່ມ ທັງແໜ້ນ-ໜຽວ, ມີຄວາມຮູ້, ຄວາມສາມາດ ທີ່ແຂງແຮງ. ຂໍອວຍໄຊໃຫ້ພອນແດ່ ການນໍາພັກ, ລັດທຸກສະຫາຍ ຈົ່ງມີສຸຂະພາບເຂັ້ມແຂງ ຈົ່ງສືບຕໍ່ຊີ້ນໍາໆພາ ແລະ ຊຸກຍູ້ວຽກງານຂອງອົງການຈັດຕັ້ງຊາວໜຸ່ມໃຫ້ມີບາດກ້າວໃໝ່ ແລະ ຂະຫຍາຍຕົວຂຶ້ນກວ່າເກົ່າ.