ເພື່ອສະໜັບສະໜູນຄວາມມຸ່ງໝັ້ນຂອງ ສປປ ລາວ ໃນການບັນລຸເປົ້າໝາຍການປ່ອຍແກ໊ສເຮືອນແກ້ວສຸດທິເປັນສູນ ພາຍໃນປີ 2050 ດັ່ງທີ່ໄດ້ລະບຸໄວ້ໃນ ແຜນງານແຫ່ງຊາດ ການປະກອບສ່ວນແກ້ໄຂບັນຫາການປ່ຽນແປງດິນຟ້າອາກາດ (NDC), ສູນພະລັງງານອາຊຽນ (ACE) ໄດ້ເປີດໂຕ ບົດສຶກສາສໍາຄັນ ພາຍໃຕ້ຫົວຂໍ້ “ແຜນງານພັດທະນາຂະແໜງພະລັງງານ ສໍາລັບການປ່ອຍແກ໊ສເຮືອນແກ້ວສຸດທິເປັນສູນ ຂອງ ສປປ ລາວ”.

ງານເປີດໂຕ ແຜນງານດັ່ງກ່າວ ໄດ້ຈັດຂຶ້ນໃນວັນທີ 25 ມີນາ ນີ້ ທີ່ນະຄອນຫຼວງວຽງຈັນ, ຮ່ວມກ່າວເປີດກອງປະຊຸມໂດຍ ທ່ານ ນາງ ສັນຕິສຸກ ພິມພະຈັນ ຫົວໜ້າເຈົ້າໜ້າທີ່ອະວຸໂສພະລັງງານອາຊຽນ (SOE) ຂອງ ສປປ ລາວ ແລະ ທ່ານ ຊູລຟິກາ ຢູລນາຍດິ (Zulfikar Yurnaidi) ຜູ້ຈັດການພະແນກສ້າງແບບຈໍາລອງພະລັງງານ ແລະ ການວາງແຜນນະໂຍບາຍ (MPP) ຂອງ ACE; ມີ ທ່ານ ນາງ ອໍດິລລາ ນໍ໌ ຣາຄີມາຮ (Aldilla Noor Rakhiemah) ຜູ້ຈັດການໂຄງການປ່ຽນແປງດິນຟ້າອາກາດ ແລະ ພະລັງງານອາຊຽນ (ACCEPT) ພ້ອມດ້ວຍບັນດາທ່ານຈາກພາກສ່ວນກ່ຽວຂ້ອງຈາກພາກລັດ, ລັດວິສາຫະກິດ ແລະ ພາກເອກະຊົນຢູ່ລາວເຂົ້າຮ່ວມ.

ທ່ານ ນາງ ສັນຕິສຸກ ພິມພະຈັນ ກ່າວວ່າ: ງານສໍາຄັນດັ່ງກ່າວນີ້ ແມ່ນຈັດຂຶ້ນເພື່ອສະແດງເຖິງຄວາມມຸ່ງໝັ້ນຂອງ ສປປ ລາວ ໃນການນໍາພາພາກພື້ນກ້າວເຂົ້າສູ່ຄວາມຍືນຍົງ ແລະ ປ່ອຍກາກບອນຕໍ່າໃນອະນາຄົດ. ບົດບາດສໍາຄັນຂອງ ACE ກໍເພື່ອສົ່ງເສີມການຮ່ວມມືລະດັບພາກພື້ນໃນຂະແໜງພະລັງງານ ຄຽງຄູ່ກັບຂໍ້ຄິດລິເລີ່ມໃນການປ່ອຍກາກບອນຕໍ່າອື່ນໆ ຊຶ່ງມີຄວາມສໍາຄັນໃນການບັນລຸເປົ້າໝາຍດ້ານດິນຟ້າອາກາດ ແລະ ພະລັງງານຂອງພວກເຮົາ. ຜົນການຄົ້ນພົບຈາກບົດສຶກສາທ່າອ່ຽງດ້ານພະລັງງານ ອາຊຽນ ສະບັບທີ 8 (AEO8) ເປັນເອກະສານສິ່ງພິມສໍາຄັນ ຂອງ ACE ຈະຖືກນໍາມາເຜີຍແຜ່ຜ່ານງານກິດຈະກໍາລະດັບຊາດ ໃນທົ່ວປະເທດສະມາຊິກອາຊຽນ (AMS), ເພື່ອສະໜັບສະໜູນໃຫ້ມີການແບ່ງປັນຄວາມຮູ້ ແລະ ການສ້າງຄວາມສາມາດໃນທົ່ວພາກພື້ນ. ສໍາລັບ ສປປ ລາວ, ເຊິ່ງເປັນປະເທດທໍາອິດທີ່ຮ່ວມມືກັບ ACE ໃນການພັດທະນາບົດສຶກສາລະດັບຊາດຮ່ວມກັນ ກ່ຽວກັບເສັ້ນທາງສູ່ການປ່ອຍແກັສເຮືອນແກ້ວສຸດທິເປັນສູນ, ໂດຍສະແດງໃຫ້ເຫັນເຖິງຄວາມມຸ່ງໝັ້ນຢ່າງແຮງກ້າຂອງ ACE ໃນການຫັນປ່ຽນດ້ານພະລັງງານ ແລະ ການສົ່ງເສີມນະວັດຕະກໍາເພື່ອອະນາຄົດທີ່ຍືນຍົງ.

ທ່ານ ຊູລຟິກາ ຢູລນາຍດິ ໄດ້ຍົກໃຫ້ເຫັນເຖິງຄວາມສໍາຄັນຂອງການສ້າງແນວທາງການວາງແຜນລະດັບຊາດ ແລະ ພາກພື້ນໃຫ້ສອດຄ່ອງກັນ, ໂດຍກ່າວວ່າ: ບົດສຶກສາທ່າອ່ຽງດ້ານພະລັງງານ ອາຊຽນ ສະບັບທີ 8 ໄດ້ນໍາສະເໜີກ່ຽວກັບສະພາບຄວາມເປັນກາງຂອງກາກບອນ (CNS) ໃນລະດັບພາກພື້ນ, ປັດຈຸບັນໄດ້ຖືກຫັນປ່ຽນເປັນແຜນງານສະເພາະຂອງປະເທດ, ໂດຍມີ ສປປ ລາວ ເປັນຄູ່ຮ່ວມງານລາຍທໍາອິດຂອງພວກເຮົາ. ຜ່ານບົດສຶກສາ AEO ແລະ ບົດສຶກສາການປ່ອຍແກັສເຮືອນແກ້ວສຸດທິເປັນສູນລະດັບຊາດ, ACE ມຸ່ງໝັ້ນທີ່ຈະໃຫ້ການສະໜັບສະໜູນປະເທດສະມາຊິກອາຊຽນ ໃນການຊຸກຍູ້ການຮ່ວມມືລະດັບພາກພື້ນ ເພື່ອບັນລຸເປົ້າໝາຍດ້ານພະລັງງານ ແລະ ດິນຟ້າອາກາດຮ່ວມກັນ.

ຂະນະທີ່, ທ່ານ ນາວ ອໍດິລລາ ນໍ໌ ຣາຄີມາຮ ກ່າວວ່າ: ການເປີດໂຕ “ແຜນງານພັດທະນາຂະແໜງພະລັງງານສໍາລັບການປ່ອຍແກັສເຮືອນແກ້ວສຸດທິເປັນສູນ ຂອງ ສປປ ລາວ” ຖືເປັນບາດກ້າວສໍາຄັນໃນການຫັນປ່ຽນດ້ານພະລັງງານຂອງ ສປປ ລາວ. ACCEPT ມີບົດບາດສໍາຄັນໃນການເສີມສ້າງຄວາມເຂັ້ມແຂງດ້ານການເຊື່ອມໂຍງລະຫວ່າງ ພະລັງງານ ແລະ ການປ່ຽນແປງດິນຟ້າອາກາດ ຜ່ານການສຶກສາວິເຄາະທີ່ຂັບເຄື່ອນດ້ວຍຂໍ້ມູນ ພ້ອມທັງເລັ່ງການຮ່ວມມືໃນລະດັບພາກພື້ນ ໂດຍສ້າງຄວາມສາມາດໃນລະດັບພາກພື້ນ. ສິ່ງດັ່ງກ່າວສອດຄ່ອງກັບເປົ້າໝາຍໄລຍະຍາວຂອງ ACCEPT ທີ່ໃຫ້ການສະໜັບສະໜູນບັນດາປະເທດສະມາຊິກອາຊຽນ ໃນການຫັນປ່ຽນສູ່ລະບົບພະລັງງານກາກບອນຕໍ່າ ແລະ ບັນລຸເປົ້າໝາຍການປ່ອຍແກັສອາຍພິດສຸດທິເປັນສູນ.

ACE ມີຄວາມມຸ່ງໝັ້ນທີ່ຈະພັດທະນາພະລັງງານກາກບອນຕໍ່າໃນອະນາຄົດ ຜ່ານການສະເໜີຄໍາແນະນໍາກ່ຽວກັບນະໂຍບາຍທີ່ອີງໃສ່ຫຼັກຖານ ແລະ ຄວາມພະຍາຍາມໃນການສ້າງຄວາມສາມາດໃນພາກພື້ນ ໂດຍໃຫ້ການສະໜັບສະໜູນອາຊຽນ ໃນການຈັດຕັ້ງປະຕິບັດຕາມວິທີການແກ້ໄຂບັນຫາພະລັງງານແບບຍືນຍົງ ແລະ ແກ້ໄຂບັນຫາຄວາມສໍາພັນລະຫວ່າງ ພະລັງງານ ແລະ ການປ່ຽນແປງດິນຟ້າອາກາດທີ່ຊັບຊ້ອນ, ໂດຍສ້າງການຮ່ວມມື ແລະ ຄວາມຊ່ຽວຊານໃນລະດັບພາກພື້ນໃຫ້ເລິກເຊິ່ງຫຼາຍຂຶ້ນ.

(ຂ່າວ-ພາບ: ສຸກສະຫວັນ)