ໂດຍ: ວັນເພັງ

ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ (ພັກປປ ລາວ) ຄົບຮອບ 70 ປີ (22 ມີນາ 1955-22 ມີນາ 2025), ສະຫາຍ ນາງ ທິບພະສອນ ຫຼວງຊະລາດ ຮອງຫົວໜ້າພະແນກວິທະຍຸ-ໂທລະພາບຊາວໜຸ່ມ ກົມສື່ມວນຊົນໜຸ່ມລາວ ສູນກາງຊາວໜຸ່ມປະຊາຊົນ ປະຕິວັດລາວ (ສຊປລ) ໄດ້ສະແດງທັດສະນະຕໍ່ວັນດັ່ງກ່າວ ຜ່ານນັກຂ່າວໜັງສືພິມປະຊາຊົນ ເມື່ອບໍ່ດົນມານີ້ວ່າ: ນັບແຕ່ມື້ສ້າງຕັ້ງພັກປປ ລາວ ໃນວັນທີ 22 ມີນາ 1955 ພັກໄດ້ນໍາພາ-ຊີ້ນໍາໂດຍກົງຮອບດ້ານ ໃນຂະບວນການຕໍ່ສູ້ກູ້ຊາດໃນເມື່ອກ່ອນ ແລະ ໄດ້ເປັນແກ່ນນໍາເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ ແລະ ຊາວໜຸ່ມ ໃນຂອບເຂດທົ່ວປະເທດລຸກຂຶ້ນຕໍ່ສູ້ກັບຈັກກະພັດຕ່າງດ້າວຈົນຍາດໄດ້ໄຊຊະນະກ້າວໆມາ. ນອກນີ້, ພາຍໃຕ້ຫົ່ມທຸງຂອງພັກ ແລະ ການນໍາພາອັນສະຫຼາດສ່ອງໃສໄດ້ກາຍເປັນມູນເຊື້ອວິລະກໍາທາງດ້ານປະຫວັດສາດ ໂດຍສະເພາະນັກຮົບປະຕິວັດຜູ້ທີ່ເສຍສະຫຼະເລືອດເນື້ອເພື່ອປະເທດຊາດຕະຫຼອດໄລຍະທີ່ຜ່ານມາຍ້ອນມີພັກນໍາພາໃນພາລະກິດຂອງການປະຕິວັດຈຶ່ງສາມາດນໍາພາປະເທດຊາດກ້າວເຂົ້າສູ່ສັງຄົມທີ່ມີຄວາມສີວິໄລ, ມີຄວາມສະຫງົບສຸກ, ມີລະບຽບວິໄນ. ຈົນເຖິງປັດຈຸບັນພັກປະຊາຊົນປະຕິວັດລາວ ຄົບຮອບ 70ປີ ແລະ ໄດ້ສືບຕໍ່ພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ໝັ້ນຄົງຖາວອນ.

ພັກປະຊາຊົນ ປະຕິວັດລາວ ເປັນແກນນໍາສູງສຸດໃນການນໍາພາປະເທດຊາດກ້າວຂຶ້ນສູ່ຍຸກສະໄໝແຫ່ງການເຕີບໃຫຍ່ຂະຫຍາຍຕົວ,ຕະຫຼອດ 70 ປີ ພັກເຮົາໄດ້ຍົກສູງບົດບາດການຮ່ວມມືທັງພາຍໃນ ແລະ ຕ່າງປະເທດຢ່າງຮອບດ້ານ ເປັນຕົ້ນການຍົກສູງບົດບາດວຽກງານສື່ມວນຊົນເປັນໜ້າທີ່ໜຶ່ງທີ່ສໍາຄັນ ເພາະຍາມໃດພັກເຮົາກໍຖືເອົາວຽກງານໂຄສະນາສຶກສາອົບຮົມຄົນຮຸ່ນໜຸ່ມ ຜູ້ທີ່ຈະສືບຕໍ່ພາລະກິດຂອງການປະຕິວັດໃນອະນາຄົດ. ສະນັ້ນ, ສື່ມວນຊົນ ຈຶ່ງມີບົດບາດທີ່ສໍາຄັນທຸກໆຂົງເຂດວຽກງານຍາມໃດສື່ມວນຊົນກໍປະກອບສ່ວນສຸມສະຕິປັນຍາ ເຫື່ອແຮງມັນສະໝອງທຸກດ້ານເຂົ້າໃນການໂຄສະນາສຶກສາອົບຮົມວຽກງານຊາວໜຸ່ມ-ເຍົາວະຊົນ ໃນຂອບເຂດທົ່ວປະເທດ, ອອກຂ່າວຜ່ານທາງສື່ເອເລັກໂຕຣນິກເຊັ່ນ: ໜັງສືພິມ, ວິທະຍຸ, ໂທລະພາບ, ເພສຂ່າວ ແລະ ສື່ສັງຄົມອອນລາຍ ເພື່ອເຜີຍແຜ່ຂໍ້ມູນຂ່າວສານທີ່ຖືກຕ້ອງ ແລະ ສອດຄ່ອງໃຫ້ສັງຄົມໄດ້ຮັບຮູ້, ເຂົ້າໃຈຕໍ່ສະພາບການທີ່ເກີດຂຶ້ນທັງພາຍໃນ ແລະ ຕ່າງປະເທດ. ນອກນີ້, ຕ້ອງຕ້ານປະກົດການຫຍໍ້ທໍ້ທີ່ເກີດຂຶ້ນໃຫ້ທັນເຫດການໃຫ້ສົມກັບວ່າ: ສື່ມວນຊົນລາວຕ້ອງເປັນສື່ກາງ, ເປັນກະບອກສຽງໃຫ້ພັກ-ລັດ, ໃຫ້ປະຊາຊົນລາວບັນດາເຜົ່າຢ່າງແທ້ຈິງ. ດັ່ງນັ້ນ, ພັກປະຊາຊົນປະຕິວັດລາວຈິງເຊື່ອໝັ້ນຕໍ່ວຽກງານສື່ມວນຊົນ ແລະ ທຸກພາລະກິດການເຄື່ອນໄຫວຂອງພັກ, ຂອງຊາດບົດບາດຂອງສື່ມວນຊົນລາວ ກໍຄືສື່ມວນຊົນໜຸ່ມລາວ ໄດ້ປະກອບສ່ວນຢ່າງຕັ້ງໜ້າ ແລະ ນັບມື້ນັບເຂັ້ມແຂງຂຶ້ນເທື່ອລະກ້າວ.

ໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ສະຫາຍ ນາງ ທິບພະສອນ ຫຼວງຊະລາດ ຍັງໄດ້ສະແດງຄວາມຮູ້ບຸນຄຸນຢ່າງສູງ ແລະ ຂໍອວຍພອນໄຊອັນປະເສີດມາຍັງການນໍາພັກ-ລັດ ໃນຂອບເຂດທົ່ວປະເທດ ຈົ່ງມີພະລານາໄມສົມບູນ, ມີຄວາມຜາສຸກໃນຊີວິດຄອບຄົວ ແລະ ສືບຕໍ່ເສີມຂະຫຍາຍມູນເຊື້ອອັນສະຫງ່າລາສີນີ້ໃຫ້ຄົງຢູ່ຕະຫຼອດໄປ.

ພັກປະຊາຊົນທີ່ມີກຽດສະຫງ່າ ໝັ້ນຍືນ!