ເພື່ອເປັນການສົ່ງເສີມຂະບວນການປູກຝັງ-ລ້ຽງສັດຂອງທ້ອງຖິ່ນ ໃຫ້ມີການພັດທະນາທີ່ມີຄຸນນະພາບດີຂຶ້ນ. ສະນັ້ນ, ສູນສົ່ງເສີມການລ້ຽງສັດລາດແສນ ແຂວງຊຽງຂວາງ ໄດ້ຈັດພິທີເປີດການນຳໃຊ້ສູນສົ່ງເສີມການລ້ຽງສັດລາດແສນຂຶ້ນເມື່ອບໍ່ດົນມານີ້, ເປັນກຽດເຂົ້າຮ່ວມມີ ທ່ານ ສົມສະໝອນ ຜະລິຈັນ ຫົວໜ້າພະແນກກະສິກຳ ແລະ ປ່າໄມ້ແຂວງຊຽງຂວາງ, ມີ ທ່ານ ທ່ານ ຂິຮູນ ຕາງໜ້າອົງການກອຍກ້າ ປະຈຳ ສປປລາວ.

ໃນພິທີ, ໄດ້ຮັບຟັງການລາຍງານ ແຜນກິດຈະກໍາພັດທະນາຊົນນະບົດ ເປັນໂຄງການຮ່ວມມື ລາວ-ເກົາຫລີ ທີ່ໄດ້ຮັບການຊ່ວຍເຫຼືອ ຈາກປະເທດ ສ ເກົາຫຼີ ມີຈໍານວນທັງໝົດ 600,000 ໂດລາສະຫະລັດ. ໂຄງການກໍ່ສ້າງສູນສົ່ງເສີມການລ້ຽງສັດລາດແສນ ເປັນໂຄງການໜຶ່ງ ທີມີຈຸດປະສົງໃນການສົ່ງເສີມວຽກງານການລ້ຽງງົວ ໂດຍສະເພາະແມ່ນລະບົບການປະສົມ ພັນທຽມ ເພື່ອນໍາໄປຂະຫຍາຍ ແລະ ລ້ຽງໃຫ້ກາຍເປັນສິນຄ້າ ເພື່ອສົ່ງຂາຍອອກທັງພາຍໃນ ແລະ ຕ່າງປະເທດ. ມີເນື້ອທີ່ທັງໝົດ 18 ເຮັກຕ່າ ແລະ ກໍ່ສ້າງພື້ນຖານໂຄງລ່າງອາຄານຫ້ອງການ, ອາຄານຫ້ອງທົດລອງ, ບ່ອນຈອດລົດໃຫຍ່,ຄອກງົວ, ບ່ອນໝັກຫຍ້າ, ທາງເບຕົງ ແລະ ທົ່ງຫຍ້າລ້ຽງສັດ

ທ່ານ ສົມສະໝອນ ຜະລິຈັນ ໄດ້ກ່າວເປີດການນຳໃຊ້ສູນຢ່າງເປັນທາງການ ແລະ ຮຽກຮ້ອງໃຫ້ ພາກສ່ວນທີ່ກ່ຽວຂ້ອງຈົ່ງພ້ອມກັນປົກປັກຮັກສາ, ນໍາໃຊ້ສູນແຫ່ງນີ້ໃຫ້ຍືນຍົງ ແລະ ເກີດປະໂຫຽດສູງສຸດ.

(ຂ່າວ: ວັນມົວ)