ຂ່າວຕ່າງປະເທດລາຍງານ; ທ່ານ ອັນວາ ອິບຣາຮິມ ກ່າວໃນວັນທີ 25 ມີນາ ຜ່ານມາວ່າ: ກຸ່ມແຮກເກີໄດ້ຮຽກຮ້ອງຄ່າໄຖ່ເປັນເງິນຈຳນວນ 10 ລ້ານໂດລາ, ຫຼັງຈາກກໍ່ເຫດການໂຈມຕີທາງໄຊເບີ ຈົນສົ່ງຜົນກະທົບຕໍ່ການດຳເນີນງານບາງສ່ວນຂອງສະໜາມບິນສາກົນກົວລາລຳເປີ (KLIA) ໃນທ້າຍອາທິດຜ່ານມາແລະສ້າງຄວາມເປັນຫ່ວງກ່ຽວກັບຄວາມປອດໄພທາງໄຊເບີ ຂອງ KLIA ແລະຄວາມປອດໄພຂອງຜູ້ໂດຍສານ.
ທັງນີ້, ທ່ານ ອັນວາ ຢືນຢັນວ່າ: ບໍລິສັດ Malaysia Airports Holdings Berhad (MAHB) ຊຶ່ງເປັນຜູ້ປະກອບການຂອງKLIA ໄດ້ຕົກເປັນເຫຍື່ອຂອງການໂຈມຕີທາງໄຊເບີຄັ້ງໃຫຍ່ຈາກກຸ່ມບຸກຄົນທີ່ຢູ່ເບື້ອງຫຼັງການໂຈມຕີດັ່ງກ່າວ.
ຢ່າງໃດກໍຕາມ, ທ່ານ ອັນວາ ກ່າວວ່າ: ລັດຖະບານມາເລເຊຍຈະບໍ່ຈ່າຍເງິນຄ່າໄຖ່ໃຫ້ກຸ່ມແຮັກເກີດັ່ງກ່າວ.
ຖະແຫຼງການຂອງທ່ານ ອັນວາ ຖືເປັນການຢືນຢັນຢ່າງເປັນທາງການຄັ້ງທຳອິດຈາກລັດຖະບານມາເລເຊຍວ່າ:KLIA ໄດ້ຖືກໂຈມຕີທາງໄຊເບີ ແລະ ຍັງບໍ່ທັນຈະແຈ້ງວ່າການໂຈມຕີໄດ້ສິ້ນສຸດລົງຫຼືບໍ່. ຫຼັງຈາກລະບົບຂອງ KLIA ປະສົບບັນຫາຫຼົ້ມເປັນເວລາ 10 ຊົ່ວໂມງໃນວັນອາທິດທີ 23 ມີນາ ຜ່ານມານີ້.
MAHB ແລະອົງການຄວາມປອດໄພທາງໄຊເບີແຫ່ງຊາດ (NCSA) ຢືນຢັນວ່າການໂຈມຕີໄດ້ສົ່ງຜົນກະທົບຕໍ່ລະບົບຄອມພິວເຕີຂອງ KLIA ບາງສ່ວນ.
ນີ້ບໍ່ແມ່ນເທື່ອທຳອິດທີ່ລະບົບຄວາມປອດໄພທາງອອນລາຍຂອງມາເລເຊຍບໍ່ສາມາດປ້ອງກັນກຸ່ມແຮັກເກີ. ໂດຍກ່ອນໜ້ານີ້ໃນປີ 2022, ແຮັກເກີສາມາດເຂົ້າເຖິງເຊີເວີຂອງລັດຖະບານມາເລເຊຍແລະໄດ້ນໍາຂໍ້ມູນສ່ວນຕົວຂອງຊາວມາເລເຊຍ 22.5 ລ້ານຄົນໄປຂາຍໃນເວັບໄຊມືດ ຊຶ່ງຂໍ້ມູນດັ່ງກ່າວລວມທັງຊື່ ແລະນາມສະກຸນ, ໝາຍເລກບັດປະຈຳຕົວແລະລາຍລະອຽດຂອງທີ່ຢູ່ອາໄສແລະຮູບບັດປະຈຳຕົວ.
