ຂ່າວຕ່າງປະເທດລາຍງານ ໃນວັນທີ 25 ຜ່ານມາ; ອົງການອະນາໄມໂລກ (WHO) ເປີດເຜີຍວ່າ: ເດັກນ້ອຍໃນເອີຣົບຕິດເຊື້ອວັນນະໂຣກເພີ່ມຂຶ້ນ 10% ໃນປີ 2023, ສະແດງໃຫ້ເຫັນວ່າ ພະຍາດວັນນະໂຣກຍັງແຜ່ລະບາດຢູ່ ແລະ ຈຳເປັນຕ້ອງມີມາດຕະການດ້ານສາທາລະນະສຸກອັນຮີບດ່ວນ.
WHOປະຈຳພາກພື້ນເອີຣົບ ຊຶ່ງປະກອບດ້ວຍ 53 ປະເທດໃນເອີຣົບແລະອາຊີກາງໄດ້ລາຍງານວ່າ: ມີເດັກນ້ອຍອາຍຸຕ່ຳກວ່າ 15 ປີ 7,500 ຄົນ ທີ່ກວດພົບເປັນພະຍາດວັນນະໂຣກໃນປີ 2023 ຊຶ່ງເພີ່ມຂຶ້ນຫຼາຍກວ່າ 650 ກໍລະນີຈາກປີ 2022.
ທ່ານ ຮັນ ອອງຣີ ຄລູເກີ ຜູ້ອຳນວຍການ WHO ປະຈໍາພາກພື້ນເອີຣົບກ່າວວ່າ: ໂຕເລກທີ່ເພີ່ມສູງຂຶ້ນສະແດງໃຫ້ເຫັນເຖິງຄວາມອ່ອນແອຂອງການຕອບໂຕ້ພະຍາດວັນນະໂຣກ ຊຶ່ງເປັນພະຍາດທີ່ສາມາດປ້ອງກັນ ແລະ ປິ່ນປົວໄດ້.
ທ່ານ ອັສກາ ເຍດິລບາເຢບ ທີ່ປຶກສາດ້ານວັນນະໂຣກ ຂອງ WHO ປະຈຳພາກພື້ນເອີຣົບ ກ່າວວ່າ: ການເພີ່ມຂຶ້ນອາດເປັນຍ້ອນການວິນິດໄສວັນນະໂຣກໄດ້ດີຂຶ້ນ ຫຼື ອາດຈະເປັນຍ້ອນການອົບພະຍົບຂ້າມຊາຍແດນທີ່ເພີ່ມຂຶ້ນຈາກສົງຄາມ,ເນື່ອງຈາກທັງສອງປະເທດມີຈຳນວນຜູ້ຕິດພະຍາດວັນນະໂຣກສູງເປັນອັນດັບຕົ້ນໆໃນພາກພື້ນ.
ເດັກນ້ອຍທີ່ມີອາຍຸຕ່ຳກວ່າ 15 ປີກວມ 4.3% ຂອງຜູ້ຕິດພະຍາດວັນນະໂຣກທັງໝົດໃນສະຫະພາບເອີຣົບ (EU), ນັບເປັນປີທີ 3 ຕິດຕໍ່ກັນທີ່ຈຳນວນຄົນເຈັບໃນກຸ່ມອາຍຸນີ້ເພີ່ມຂຶ້ນ ຊຶ່ງ ທ່ານ ເຍດິລບາເຢບ ກ່າວວ່າ: ເປັນສະຖານະການທີ່ໜ້າເປັນຫ່ວງ.
ກ່ອນໜ້ານີ້,WHO ໄດ້ເຕືອນວ່າ: ການຫຼຸດຜ່ອນຫຼືຕັດເງິນທຶນສະໜັບສະໜູນການຄວບຄຸມວັນນະໂຣກອາດສົ່ງຜົນໃຫ້ຄວາມພະຍາຍາມໃນການຕໍ່ສູ້ກັບພະຍາດນີ້ຕ້ອງຢຸດສະງັກ. ໂດຍສະເພາະແມ່ນຢູ່ປະເທດທີ່ມີລາຍໄດ້ຕ່ຳ ແລະປານກາງ.
ທັງນີ້, ວັນນະໂຣກຍັງຄົງເປັນໜຶ່ງໃນ 10 ພະຍາດທີ່ເຮັດໃຫ້ຜູ້ຄົນເສຍຊີວິດຫຼາຍທີ່ສຸດໃນໂລກ. ໂດຍສ່ວນຫຼາຍແມ່ນເປັນການຕິດເຊື້ອຂອງປອດ ແລະແຜ່ລາມໂດຍການໄອ ຫຼືຈາມ. ອົງການອະນາໄມໂລກຮຽກຮ້ອງໃຫ້ມີການດຳເນີນການ ຫຼັງຈາກພົບວ່າຈໍານວນເດັກນ້ອຍທີ່ເປັນວັນນະໂຣກເພີ່ມຂຶ້ນ 10%ໃນເອີຣົບ.
