ເນື່ອງໃນໂອກາດ ວັນສ້າງຕັ້ງພັກປະຊາຊົນປະຕິວັດລາວ (ພັກ ປປລ) ຄົບຮອບ 70 ປີ ທີ່ເຕັມໄປດ້ວຍຄວາມໝາຍຄວາມສໍາຄັນອັນເລິກເຊິ່ງ, ທ່ານ ສຸກຂະ ຫຼຽນທອງຄໍາ ຄະນະປະຈໍາພັກແຂວງ ປະທານກວດກາພັກ-ລັດແຂວງບໍ່ແກ້ວໄດ້ສະແດງຄວາມຮູ້ສຶກເອກອ້າງທະນົງໃຈ ທີ່ເຫັນວ່າຜ່ານໄລຍະເວລາ 70 ປີ ເປັນໄລຍະເວລາທີ່ສະຫວ່າງສະໄຫວ ທີ່ມີພັກນໍາພາປະຊາຊົນບັນດາເຜົ່າຕໍ່ສູ້ປົດປ່ອຍອອກຈາກຄວາມມືດມົນ ບໍ່ຮູ້ຊາຕາກຳ ຍ້ອນການກົດຂີ່ຂູດຮີດຂອງພວກລ່າເມືອງ ແລະ ນໍາພາປົກປັກຮັກສາພັດທະນາປະເທດຊາດໃຫ້ຈະເລີນຮຸ່ງເຮືອງມາເຖິງປັດຈຸບັນ.

ທ່ານ ສຸກຂະ ຫຼຽນທອງຄໍາ ກ່າວວ່າ: ຕະຫຼອດໄລຍະ 70 ປີຜ່ານມາ, ແມ່ນໄລຍະທີ່ພັກ ປປລ ໄດ້ສ້າງໜ້າປະຫວັດສາດອັນມະຫັດສະຈັນ ໃຫ້ແກ່ຊາດ ແລະ ປະຊາຊົນບັນດາເຜົ່າ, ແມ່ນໄລຍະທີ່ພັກເຮົາໄດ້ຜ່ານການທົດສອບ, ເຕີບໃຫຍ່ທາງດ້ານປະລິມານ ແລະ ຄຸນນະພາບ ໂດຍຜ່ານແປວໄຟທີ່ລະອິດລະອ້ຽວ ເຕັມໄປດ້ວຍຂວາກໜາມ, ພາຍຸລົມແດງ ຊຶ່ງມີທັງໂສກເສົ້າ ແລະ ຮອຍຍິ້ມ, ມີທັງໄຊຊະນະ ແລະ ມີການເສຍສະຫຼະອັນໃຫຍ່ຫຼວງ ແຕ່ກໍເປັນໄລຍະເວລາທີ່ສະຫວ່າງສະໄຫວ ທັງມີກຽດທາງປະຫວັດສາດຂອງປະເທດເຮົາ.

ມູນເຊື້ອ ແລະ ໄຊຊະນະປະຫວັດສາດຂອງພາລະກິດແຫ່ງການຕໍ່ສູ້ປົດປ່ອຍຊາດໃນເມື່ອກ່ອນ, ຜົນສໍາເລັດໃນພາລະກິດປົກປັກຮັກສາ ແລະ ພັດທະນາປະເທດຊາດພາຍໃຕ້ການນໍາພາຂອງພັກຕະຫຼອດໄລຍະ 70 ປີຜ່ານມາ ຊຶ່ງ ຍາມໃດກໍຍຶດໝັ້ນລັດທິ-ມາກເລນິນເປັນພື້ນຖານ, ແນວຄິດຂອງ ປະທານໄກສອນພົມວິຫານ ແລະ ຍຶດຖືຫຼັກໝັ້ນຂອງຊົນຊັ້ນກໍາມະກອນຢ່າງສະເໝີຕົ້ນສະເໜີປາຍ ສົມທົບແໜ້ນລະຫວ່າງລັດທິຮັກຊາດອັນແທ້ຈິງກັບລັດທິສາກົນອັນຜ່ອງໃສ ມີຄວາມຈົງຮັກພັກດີຕໍ່ອຸດົມການປະຕິວັດ ແລະ ຜົນປະໂຫຍດຂອງປະຊາຊົນບັນດາເຜົ່າ. ພັກເຮົາ, ໄດ້ຖືເອົາຜົນປະໂຫຍດຂອງຊາດ, ຂອງປະຊາຊົນ ເປັນສຳຄັນ ແລະ ໃນໄລຍະຜ່ານມາ ພັກກໍໄດ້ໃຫ້ຄວາມເອົາໃຈໃສ່ ຕໍ່ການນໍາພາ-ຊີ້ນໍາ ຕໍ່ກັບວຽກງານກວດກາ; ພັກເຮົາໄດ້ເນັ້ນໜັກໄວ້ວ່າ: “ບໍ່ມີການກວດກາ ກໍໝາຍຄວາມວ່າບໍ່ມີການນໍາພາ” ເພາະວ່າວຽກງານຕິດຕາມ,ກວດກາ ແມ່ນວຽກງານໜຶ່ງທີ່ຕິດພັນກັບທຸກຂົງເຂດວຽກງານ, ເປັນວຽກທີ່ຄະນະພັກຮັບຜິດຊອບໂດຍກົງ, ຕ້ອງເຮັດເປັນປົກກະຕິ ແລະ ຂາດບໍ່ໄດ້ສໍາລັບການນໍາພາຂອງພັກ ແລະ ການຄຸ້ມຄອງລັດ

ທ່ານ ສຸກຂະ ຫຼຽນທອງຄໍາໄດ້ກ່າວຕື່ມວ່າ: ພາຍໃຕ້ການນໍາພາຂອງພັກເວົ້າລວມ, ເວົ້າສະເພາະອົງຄະນະພັກແຂວງບໍ່ແກ້ວຕໍ່ວຽກງານກວດກາໃນໄລຍະຜ່ານມາກໍຄືປັດຈຸບັນແມ່ນໄດ້ມີການເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ກົງຈັກການຈັດຕັ້ງ, ບຸກຄະລາກອນຂອງຄະນະກວດກາໄດ້ຮັບການປັບປຸງ ແລະ ຍົກບົດບາດເພີ່ມຂຶ້ນເລື້ອຍໆ, ອົງການກວດກາພັກ-ລັດໄດ້ເຮັດບົດບາດເປັນເສນາທິການດ້ານວຽກງານກວດກາພັກ-ລັດຕ້ານການສໍ້ລາດບັງຫຼວງໃນຄະນະພັກ ແລະ ອົງການປົກຄອງແຕ່ລະຂັ້ນ ປະກອບສ່ວນເຂົ້າໃນການປົກປ້ອງພັກ-ພະນັກງານ; ຖັນແຖວພະນັກງານ-ສະມາຊິກພັກ, ການຈັດຕັ້ງມີຄວາມເຂັ້ມແຂງ, ເຮັດໜ້າທີ່ຕົ້ນຕໍໃນການສະກັດກັ້ນ ແລະ ດໍາເນີນການກວດກາຕໍ່ຜູ້ລະເມີດກົດລະບຽບຂອງພັກ, ກົດໝາຍຂອງລັດ ຊຶ່ງຜ່ານມາສາມາດເກັບກູ້ເອົາຊັບສິນ, ເງິນ ຂອງລັດ, ຂອງລວມໝູ່ ແລະ ພົນລະເມືອງຄືນໄດ້ເປັນຈໍານວນບໍ່ໜ້ອຍທັງເປັນການປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ.

ໃນໂອກາດນີ້ ສະຫາຍ ສຸກຂະ ຫຼຽນທອງຄໍາ ຄະນະປະຈໍາພັກແຂວງ ປະທານກວດກາພັກ-ລັດແຂວງ ບໍ່ແກ້ວສະແດງຄວາມຂອບໃຈຮູ້ບຸນຄຸນຕໍ່ພະນັກງານນັກຮົບປະຕິວັດ ແລະ ປະຊາຊົນບັນດາເຜົ່າທີ່ໄດ້ອຸທິດຕົນສະຫຼະຊີວິດ, ເລືອດເນື້ອ ເຫື່ອແຮງໃນພາລະກິດປະຕິວັດຕໍ່ສູ້ກູ້ຊາດໃນເມື່ອກ່ອນ ກໍຄືການນໍາຂອງພັກ-ລັດ, ນັກຮົບປະຕິວັດ ແລະ ປະຊາຊົນບັນດາເຜົ່າໃນພາລະກິດໄລຍະໃໝ່; ໃນໂອກາດອັນສະຫງ່າລາສີ 70 ປີ ພັກນໍາພາຢ່າງມີໄຊ, ຂໍອວາຍພອນໄຊອັນປະເສີດມາຍັງການນໍາພັກ-ລັດທຸກຂັ້ນຈົ່ງມີສຸຂະພາບແຂງແຮງ, ມີຄວາມຜາສຸກ, ມີຜົນສໍາເລັດໃນໜ້າທີ່ການເມືອງອັນສູງສົ່ງ ແລະ ມີກຽດສະຫງ່ານໍາພາປະເທດຊາດມັ່ງຄັ່ງເຂັ້ມແຂງ ເຮັດໃຫ້ປະຊາຊົນລາວບັນດາເຜົ່າ ມີຄວາມຮັ່ງມີີຜາສຸກ, ສັງຄົມມີຄວາມສະຫງົບ, ມີຄວາມສາມັກຄີເປັນປຶກແຜ່ນ, ຍຸຕິທໍາ ແລະ ສີວິໄລ.