ທ່ານ ເພັດ ພົມພິພັກ ລັດຖະມົນຕີ ກະຊວງກະສິກຳ ແລະ ປ່າໄມ້(ກປ)ໄດ້ຊີ້ແຈງຕໍ່ຄຳຊັກຖາມ ຂອງສະມາຊິກສະພາແຫ່ງຊາດ(ສສຊ) ໃນກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX (2/11/2023) ໂດຍການເປັນ ປະທານ ຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ
ທ່ານ ລັດຖະມົນຕີ ກະຊວງ ກປ ກ່າວວ່າ:ການຜະລິດເພື່ອທົດແທນການນຳເຂົ້າ ແລະ ການຜະລິດເພື່ອເປັນສິນຄ້າສົ່ງອອກໃນຂະແໜງການກະສິກຳ ຊຶ່ງໃນມະຕິຂອງສະພາແຫ່ງຊາດໄດ້ກຳນົດຄາດໝາຍສູ້ຊົນໃຫ້ຂະແໜງການກະສິກຳ ແລະ ປ່າໄມ້ໃຫ້ຂະຫຍາຍຕົວໃນ2,5% ກວມເອົາ 10,2% ຂອງ GDP ຜ່ານການຈັດຕັ້ງປະຕິບັດ ໄລຍະ 9 ເດືອນຜ່ານມາຂະແໜງການກະສິກຳ ແລະ ປ່າໄມ້ໄດ້ຂະຫຍາຍຕົວໃນລະດັບ3,4% ກວມເອົາ 17,2% ແລະ ປະມົງ 3,7% ຂອງ GDP ໃນນັ້ນປູກຝັງຂະຫຍາຍຕົວ 3%,ລ້ຽງສັດ 4,2%,ປ່າໄມ້ 4,6%,ຄາດຄະເນໝົດປີ ຢູ່ໃນລະດັບບໍ່ໃຫ້ຫຼຸດ3,4% ກວມເອົາ 21,4% ຂອງ GDP.
ສຳລັບກ່ຽວກັບການຜະລິດເພື່ອທົດແທນການນຳເຂົ້າຊຶ່ງມີ 2ໝວດໃຫຍ່,ໝວດທີ 1 ການຜະລິດສະບຽງອາຫານ,ການຜະລິດເຂົ້າ ປີ 2023 ຄາດວ່າຈະໄດ້ຕາມຄາດໝາຍ,ພືດຜັກ ໄດ້ຍູ້ແຮງຂະບວນການຜະລິດຜັກ,ໄມ້ໃຫ້ໝາກຂອງຊາວກະສິກອນຜູ້ຜະລິດຂະໝາດນ້ອຍ,ຂະໜາດກາງດ້ວຍການສ້າງ ແລະ ປັບປຸງກຸ່ມການຜະລິດໃຫ້ເຂັ້ມແຂງ ມີທັງໝົດ 4193 ກຸ່ມ,ປັດຈຸບັນທົ່ວປະເທດມີເຮືອນຮົ່ມທັງໝົດ 4.545ຫຼັງ ແລະ ສະໜອງທຶນ ສົມທົບສຳລັບການປັບປຸງລະບົບການຜະລິດຕ່າງໆເປັນຕົ້ນນໍ້າ ແລະ ອຸປະກອນຜະລິດເຮັດໃຫ້ມີຜົນຜະລິດ ປະມານ 1,5 ລ້ານໂຕນ ແລະ ໝາກໄມ້ 1,4 ລ້ານໂຕນ,ໄຂ່,ຊີ້ນ ແລະ ປາໄດ້ຍູ້ແຮງຂະບວນການລ້ຽງສັດ ປະເພດສັດປີກ,ໝູ,ງົວ, ຄວາຍ ແລະ ແບ້ ເປັນຟາມຂອງຜູ້ປະກອບການຂະໝາດນ້ອຍ,ກາງ ແລະ ຂະໜາດໃຫຍ່ ຊຶ່ຶງມີຟາມໃໝ່ເກີດຂຶ້ນ 5 ຟາມຊຶ່ງໃນຟາມມີສັດລ້ຽງຢູ່ ປະມານ 6 ລ້ານກວ່າໂຕ,ຈາກທ່າແຮງດັ່ງກ່າວຂະແໜງກະຊິກຳພວກເຮົາໄດ້ກຳນົດມາດຕະການສົ່ງເສີມການຜະລິດພາຍໃນໄປຄຽງຄູ່ການຄວບຄຸມ ການນຳເຂົ້າ,ບັນຫາສິນຄ້າທີ່ສາມາດຜະລິດໄດ້ພາຍໃນມີ 2 ລາຍການ,ລາຍການທີ 1 ສິນຄ້າທີ່ຕ້ອງເກືອດຫ້າມນຳເຂົ້າ ແລະ ລາຍການ ທີ 2 ແມ່ນສິນຄ້າກະສິກຳທີ່ຕ້ອງຫຼຸດຜ່ານການນຳເຂົ້າ ສຳລັບສິນຄ້າທີ່ຫ້າມນຳເຂົ້າມີປະເພດພືດ ແລະ ຜະລິດຕະພັນພືດ ມີເຂົ້າ,ກາເຟ,ຊາ ແລະ ປະເພດພືດກິນໃບ,ພືດກິນໝາກ ແລະ ອື່ນໆ,ປະເພດສັດ ມີ ງົວ,ໝູ,ແບ້,ໄກ່,ຫ່ານ,ຜະລິດຕະພັນສັດ ແລະ ຜະລິດຕະພັດປານໍ້າຈືດ ແລະ ປະເພດສິນຄ້າຫຼຸດຫຜ່ອນການນຳເຂົ້າ ປະເພດພືດຫຼາຍຊະນິດ ແລະ ປະເພດສັດ ແລະ ແນວພັນອື່ນໆຈຳນວນໜຶ່ງ,ສືບຕໍ່ຂະຫຍາຍຜະລິດລູກປາ ປັດຈຸບັນມີສະຖານີລ້ຽງລູກປາທັງໝົດ 53 ແຫ່ງ ຜູ້ປະກອບການມີ 112 ແຫ່ງ ສາມາດຜະລິດລູກປາໄດ້ 200 ກວ່າລ້ານໂຕ
ທ່ານກ່າວຕື່ມວ່າ: ສຳລັບມູນຄ່າການສົ່ງອອກ ໃນ 9 ເດືອນຕົ້ນປີ 2023 ປະຕິບັດໄດ້ 1.220 ລ້ານກວ່າໂດລາ (ໃນນັ້ນ ພືດ 982 ລ້ານກວ່າໂດລາ, ສັດ 61 ລ້ານໂດລາ ແລະ ໄມ້, ຜະລິດຕະພັນໄມ້, ຢາງພາລາ ແລະ ເຄື່ອງປ່າຂອງດົງ 183 ລ້ານກວ່າໂດລາ), ຄາດຄະເນໝົດປີ ປະມານ 1.630 ລ້ານກວ່າໂດລາ (ແຜນການ 1.200 ລ້ານໂດລາ). ສິນຄ້າທີ່ພົ້ນເດັ່ນ: ມັນຕົ້ນ 448 ລ້ານກວ່າໂດລາ, ກ້ວຍ 197 ລ້ານກວ່າໂດລາ, ຢາງພາລາ 150 ລ້ານກວ່າໂດລາ, ກາເຟ 64 ລ້ານໂດລາ, ໝາກໂມ ປະມານ 50 ລ້ານໂດລາ ແລະ ອື່ນໆ.ການສົ່ງອອກສິນຄ້າກະສິກຳໃນປີນີ້ໄດ້ມີຜູ້ປະກອບການຈົດທະບຽນສະຖານທີ່ປະກອບການເພີ່ມຂຶ້ນຫຼາຍ, ລາຍການສິນຄ້າໃໝ່ ກໍໄດ້ເພີ່ມຂຶ້ນຫຼາຍພໍສົມຄວນ, ມີທາງລົດໄຟທີ່ອຳນວຍ ຄວາມສະດວກໃນການຂົນສົ່ງ ບວກຕື່ມຕະຫຼາດ ແລະ ລາຄາ ກໍດີຂຶ້ນ ຄາດວ່າສິນຄ້າກະສິກຳ ທີ່ຈະສົ່ງອອກມີທ່າອ່ຽງເພີ່ມຂຶ້ນໃນແຕ່ລະປີ.
(ຂ່າວ-ພາບ:ສຳນານ)
