ໃນວັນທີ 2 ພະຈິກນີ້ທີ່ສູນກາງແນວລາວສ້າງຊາດ(ສນຊ) ທ່ານ ນາງ ອິນລາວັນ ແກ້ວບຸນພັນຮອງປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້າພົບປະຢ້ຽມຢາມ ຂອງຄະນະສະມາຄົມກັອຟພີ່ນ້ອງຄົນເຊື້ອຊາດລາວຈາກສະຫະລັດອາເມຣິກາ, ອົສຕຣາລີ ແລະ ນິວຊີແລນ ນຳພາໂດຍ ທ່ານ ຈັນສະໝອນ ເມກດາລາ ປະທານສະມາຄົມກັອຟລາວດີຊີ ແລະ ມີ ທ່ານ  ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດຮອງປະທານຄະນະກຳມະການພົວພັນຄົນເຊື້ອຊາດລາວຢູ່ຕ່າງປະເທດ ພ້ອມດ້ວຍພາກສ່ວນທີ່ກ່ຽວຂ້ອງ ຂອງທັງສອງຝ່າຍເຂົ້າຮ່ວມ.
ໂອກາດນີ້, ທ່ານນາງ ອິນລາວັນ ແກ້ວບຸນພັນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ຄະນະນັກກິລາກັອຟທີ່ໄດ້ມາຢ້ຽມຢາມ ສປປ ລາວ ໃນຄັ້ງນີ້ ແລະ ທ່ານ ຍັງໄດ້ຍົກໃຫ້ເຫັນສະພາບລວມໃນການສ້າງສາພັດທະນາປະເທດຊາດ, ພາລະບົດບາດ, ສິດ ແລະ 
ໜ້າທີ່ຂອງອົງການແນວລາວສ້າງຊາດໂດຍຫຍໍ້ ໃນຄະນະໄດ້ຮັບຊາບ. ພ້ອມກັນນັ້ນ, ທ່ານ ຍັງໄດ້ໃຫ້ຮູ້ຕື່ມອີກວ່າ: ພັກ ແລະ ລັດ ຍາມໃດກໍໃຫ້ຄວາມສຳຄັນຕໍ່ພີ່ນ້ອງເຊື້ອຊາດລາວຢູ່ຕ່າງປະເທດ ແລະ ຖືເປັນພາກສ່ວນໜຶ່ງທີ່ບໍ່ສາມາດຕັດແຍກອອກຈາກວົງຄະນາຍາດແຫ່ງຊາດໄດ້, ທັງເປັນກຳລັງແຮງໃນການພັດທະນາປະເທດຊາດ; ຄຽງຄູ່ກັນນັ້ນອົງການແນວລາວສ້າງຊາດ ກໍໄດ້ກໍານົດນະໂຍບາຍຕໍ່ພີ່ນ້ອງເຊື້ອຊາດລາວຢູ່ຕ່າງປະເທດ ຄື: “ໃຫ້ການຮ່ວມມື ແລະ ເສີມຂະຫຍາຍບົດບາດຂອງທີ່ປຶກສາ ແລະ ຜູ້ຮ່ວມງານອົງການແນວລາວສ້າງຊາດຢູ່ຕ່າງປະເທດ ເປັນຜູ້ເຕົ້າໂຮມຄວາມສາມັກຄີພີ່ນ້ອງເຊື້ອຊາດລາວຢູ່ອ້ອມຂ້າງຕົນ ແລະ ດຳເນີນກິດຈະກຳຕ່າງໆ ເພື່ອປະກອບສ່ວນເຂົ້າໃນການສ້າງສາປະເທດຊາດ; ສະນັ້ນ, ໃນການສ້າງຂະບວນການແຂ່ງຂັນກິລາຕີກັອຟມິດຕະພາບ ຂອງສະມາຄົມກັອຟລາວດີຊີໃນຄັ້ງນີ້ ກໍເປັນການສ້າງຄວາມສາມັກຄີຮັກແພງ ລະຫວ່າງຄົນລາວດ້ວຍກັນໃຫ້ຍືນຍົງຕະຫຼອດໄປ.
ປະທານສະມາຄົມກັອຟລາວດີຊີ ກໍໄດ້ກ່າວສະແດງຄວາມຂອບໃຈເປັນຍິ່ງ ຕໍ່ທ່ານຮອງປະທານສູນກາງແນວລາວສ້າງຊາດ ທີ່ໄດ້ຕ້ອນຮັບຄະນະຢ່າງອົບອຸ່ນ ແລະ ໄດ້ລາຍງານຈຸດປະສົງການມາຢ້ຽມຢາມ ສປປ ລາວໃນຄັ້ງນີ້ ໃຫ້ທ່ານຮອງປະທານສູນກາງແນວລາວສ້າງຊາດໄດ້ຮັບຊາບ. ພ້ອມກັນນັ້ນ, ຄະນະຄົນເຊື້ອຊາດລາວຍັງໄດ້ໄປທ່ຽວຊົມຫໍມູນເຊື້ອແນວລາວສ້າງຊາດຕື່ມອີກ.
ຂ່າວ-ພາບ: ເຢ