ວັນທີ 7 ພະຈິກ ນີ້ ແຂວງຄໍາມ່ວນໄດ້ຈັດກອງປະຊຸມເຊື່ອມຊຶມ ແລະ ຜັນຂະຫຍາຍຜົນສຳເລັດກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງພັກ ສະໄໝທີ XI ແລະ ມະຕິກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຂວງຄໍາມ່ວນ ສະໄໝທີ X ທີ່ສະໂມສອນຂອງແຂວງ, ໂດຍພາຍໃຕ້ການເປັນປະທານຂອງສະຫາຍ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງຄຳມ່ວນ, ມີບັນດາສະຫາຍໃນຄະນະບໍລິຫານງານພັກແຂວງ, ຄະນະບໍລິຫານງານພັກເມືອງ, ຄະນະພັກ-ຄະນະພະແນກ, ພະນັກງານອາວຸໂສບໍານານ, ກອງບັນຊາການ ປກຊ-ປກສ ແຂວງ ຕະຫຼອດພະນັກງານການນໍາຫຼັກແຫຼ່ງຂອງແຂວງເຂົ້າຮ່ວມ.
ເອກະສານທີ່ນຳມາເຜີຍແຜ່ເຊື່ອມຊຶມໃນຄັ້ງນີ້ປະກອບມີເອກະສານສໍາຄັນເຊັ່ນ: ມະຕິກອງປະຊຸມຄົບຄະນະກາງສະໄໝຂອງຄະນະບໍຫານງານສູນກາງພັກສະໄໝທີ XI, ມະຕິກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຂວງສະໄໝທີ X, ບົດສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄົບຄະນະກາງສະໄໝຂອງຄະນະບໍລິຫານງານພັກແຂວງ, ບົດສະຫຼຸບຕີລາຄາແຜນພັດທະນາເສດຖະກິດ-ສັງຄົມ  5 ປີ ຄັ້ງທີ X ຂອງແຂວງ (ໄລຍະກາງສະໄໝ), ທິດທາງແຜນການສູ້ຊົນໃນຕໍ່ໜ້າ ແລະ ຄຳສັ່ງແນະນຳຂອງຄະນະປະຈຳພັກແຂວງສະບັບເລກທີ 12/ຄປຈ.ຄມ, ລົງວັນທີ 31 ຕຸລາ 2023 ກ່ຽວກັບການຈັດຕັ້ງເຊື່ອມຊຶມແລະຜັນຂະຫຍາຍມະຕິກອງປະຊຸມກາງສະໄໝຂອງຄະນະບໍລິຫານງານພັກແຂວງ. ນອກນັ້ນກອງປະຊຸມຍັງໄດ້ມີການແລກປ່ຽນຄໍາຄິດເຫັນ ເພື່ອສ້າງຄວາມເປັນເອກະພາບໃນການຈັດຕັ້ງປະຕິບັດ ທັງເພື່ອແນໃສ່ເຮັດໃຫ້ບັນດາສະຫາຍທີ່ເຂົ້າຮ່ວມໄດ້ຮັບຮູ້ເຂົ້າໃຈ, ເຊື່ອມຊຶມ, ກຳໄດ້ຄວາມໝາຍທີ່ສຳຄັນຕໍ່ເນື້ອໃນຂອງກອງປະຊຸມ ເພື່ອປະຕິບັດບັນດາຄາດໝາຍສູ້ຊົນ, ວຽກງານຈຸດສຸມ ແລະ ແຜນປະຕິບັດວຽກງານອັນລະອຽດໃນການຜັນຂະຫຍາຍມະຕິກອງປະຊຸມດັ່ງກ່າວໃຫ້ປະກົດຜົນເປັນຈິງ.
ໂອກາດມີຄໍາເຫັນກ່າວເປີດກອງປະຊຸມ ສະຫາຍ ວັນໄຊ ພອງສະຫວັນ  ຍັງໄດ້ຮຽກຮ້ອງມາຍັງບັນດາສະຫາຍທີ່ເຂົ້າຮ່ວມ ຈົ່ງໄດ້ເອົາໃຈໃສ່ຕິດຕາມຮັບຟັງການເຜີຍແຜ່, ແນະນໍາເອກະສານທີ່ສະເໜີຕໍ່ກອງປະຊຸມຄັ້ງນີ້ ເພື່ອກໍາໃຫ້ໄດ້ດ້ານເນື້ອໃນຈິດໃຈ ແລະ ສ້າງຄວາມເອກະພາບຢ່າງສູງໃນການສືບຕໍ່ຈັດຕັ້ງປະຕິບັດທິດທາງແຜນການໃນ 2 ປີຕໍ່ໜ້າ ໃນການແກ້ໄຂບັນຫາຕ່າງໆ ໃຫ້ບັນລຸບັນດາຄາດໝາຍສູ້ຊົນທີ່ມະຕິກອງປະຊຸມຄົບຄະນະກາງສະໄໝ ຂອງແຂວງວາງອອກ ບົນຈິດໃຈກໍາແໜ້ນຄຳຂວັນກອງປະຊຸມໃຫຍ່ໄດ້ກຳນົດໄວ ເພື່ອເຮັດແນວໃດໃຫ້ແຂວງຄໍາມ່ວນພວກເຮົາມີການພັດທະນາ, ຄຸນນະພາບຊີວິດການເປັນຂອງປະຊາຊົນໄດ້ຮັບການປັບປຸງແກ້ໄຂໃຫ້ນັບມື້ດີຂຶ້ນ.
ຂ່າວ-ພາບ: ມະນີວັນ