ໃນວັນທີ 10ຕຸລາ ນີ້, ສະຫາຍທອງລຸນສີສຸລິດເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວປະທານປະເທດແຫ່ງສປປລາວໄດ້ສົ່ງສານອວຍພອນເຖິງສະຫາຍກິມເຈິງອຸນເລຂາທິການໃຫຍ່ພັກແຮງງານເກົາຫຼີປະທານກິດຈະການແຫ່ງລັດສປປເກົາຫຼີ, ຜູ້ບັນຊາການສູງສຸດກໍາລັງປະກອບອາວຸດສປປເກົາຫຼີເນື່ອງໃນໂອກາດວັນສ້າງຕັ້ງພັກແຮງງານເກົາຫຼີຄົບຮອບ 79 ປີ (10ຕຸລາ 1945-10ຕຸລາ 2024).

ສະຫາຍທອງລຸນສີສຸລິດໄດ້ສະແດງຄວາມຊົມເຊີຍອັນອົບອຸ່ນ ແລະ ສົ່ງຄໍາອວຍພອນໄຊອັນປະເສີດ ໄປຍັງ ສະຫາຍ ກິມເຈິງອຸນ ພ້ອມດ້ວຍບັນດາສະຫາຍ ໃນຄະນະບໍລິຫານງານສູນກາງພັກແຮງງານເກົາຫຼີ, ສະມາຊິກພັກ ແລະ ປະຊາຊົນ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ ອ້າຍນ້ອງທຸກຖ້ວນໜ້າເນື່ອງໃນໂອກາດວັນສ້າງຕັ້ງພັກແຮງງານເກົາຫຼີ ຄົບຮອບ 79 ປີ.

ໃນຖານະເປັນເພື່ອນມິດທີ່ໃກ້ຊິດ, ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ມີຄວາມພາກພູມໃຈທີ່ເຫັນວ່າ ໃນຕະຫຼອດໄລຍະ 79 ປີ ຜ່ານມາ, ພັກແຮງງານເກົາຫຼີ ໄດ້ນໍາພາປະເທດຊາດ ແລະ ປະຊາຊົນ ສປປ ເກົາຫຼີ ຍາດໄດ້ຜົນສໍາເລັດທີ່ສໍາຄັນຮອບດ້ານ ໃນພາລະກິດສ້າງສາສັງຄົມນິຍົມ ແລະ ປົກປັກຮັກສາໝາກຜົນຂອງການປະຕິວັດໄວ້ໄດ້ຢ່າງໝັ້ນຄົງ ແລະ ເຊື່ອໝັ້ນວ່າ ພາຍໃຕ້ການຊີ້ນໍາ-ນໍາພາ ອັນຖືກຕ້ອງ, ເຂັ້ມແຂງຂອງພັກແຮງງານເກົາຫຼີ ທີ່ມີ ສະຫາຍ ເປັນຜູ້ນໍາພາ, ພັກ-ລັດຖະບານ ແລະ ປະຊາຊົນ ສປປ ເກົາຫຼີ ຈະສາມາດບັນລຸຜົນສໍາເລັດໃນການປະຕິບັດ ມະຕິຂອງກອງປະຊຸມໃຫຍ່ ຄັ້ງທີ VIII ຂອງພັກ ຢ່າງມີໄຊ, ສືບຕໍ່ສ້າງສັງຄົມນິຍົມ ຢູ່ ສປປ ເກົາຫຼີ ໃຫ້ນັບມື້ນັບເຂັ້ມແຂງ ແລະ ຈະເລີນຮຸ່ງເຮືອງ ຍິ່ງໆຂຶ້ນ.

ພ້ອມນີ້, ສະຫາຍ ທອງລຸນ ສີສຸລິດຍັງໄດ້ສະແດງຄວາມຍິນດີທີ່ຈະຮ່ວມກັນ ສະຫາຍກິມເຈິງອຸນ ເພື່ອສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ-ສປປ ເກົາຫຼີ ໃຫ້ສືບຕໍ່ໄດ້ຮັບການເສີມຂະຫຍາຍເຂົ້າສູ່ລວງເລິກຢ່າງບໍ່ຢຸດຢັ້ງ ເພື່ອຜົນປະໂຫຍດຂອງປະຊາຊົນສອງຊາດພວກເຮົາ ກໍຄື ພາລະກິດສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາຢູ່ໃນພາກພື້ນ ແລະ ໃນໂລກ; ອວຍພອນໃຫ້ສະຫາຍ ກິມເຈິງອຸນ ຈົ່ງມີພະລານາໄມສົມບູນ, ມີຄວາມຜາສຸກ, ປະສົບຜົນສໍາເລັດໃນພາລະກິດອັນສູງສົ່ງຂອງສະຫາຍ.