ໂດຍ: ຕະວິນຍານ
ປະຕິບັດຕາມແຜນພັດທະນາເສດຖະກິດ-ສັງຄົມຄັ້ງທີ VII (2020-2024) ຂອງເມືອງແກ່ນທ້າວ ແຂວງໄຊຍະບູລີ ໃນການຄຸ້ມຄອງ ແລະ ນໍາໃຊ້ຊັບພະຍາກອນທໍາມະຊາດ ແລະ ປົກປັກຮັກສາສິ່ງແວດລ້ອມ ໃຫ້ມີຄວາມຍືນຍົງ.
ຕະຫຼອດ 5 ປີ ຜ່ານມາ,ເມືອງແກ່ນທ້າວໄດ້ເອົາໃຈໃສ່ຄຸ້ມຄອງ ແລະປົກປັກຮັກສາປ່າໄມ້ ໃຫ້ມີຄວາມຍືນຍົງໂດຍສຸມໃສ່ເຜີຍແຜ່ນິຕິກໍາກ່ຽວກັບການຄຸ້ມຄອງ, ປ້ອງກັນສະກັດກັ້ນການຖາງປ່າເຮັດໄຮ່ ແລະ ໄຟໄໝ້ລາມປ່າ,ພ້ອມທັງສົ່ງເສີມການປູກໄມ້ໃຫ້ເປັນປ່າ ຕິດພັນກັບການຕິດຕາມ,ກວດກາລາດຕະເວນຢ່າງເປັນປົກກະຕິ, 5 ປີຜ່ານມາ,ເມືອງສາມາດປູກໄມ້ໃຫ້ເປັນປ່າທັງໝົດ 1,357.74 ເຮັກຕາ (ໃນນີ້: ປູກໄມ້ໃສ່ດິນລັດ 164.34 ເຮັກຕາ,ຂອງລວມໝູ່ 1.99 ເຮັກຕາ ແລະ ດິນປະຊາຊົນ 1,191.41 ເຮັກຕາ) ແລະ ກຳນົດເຂດຟື້ນຟູປ່າໄດ້ 7 ແຫ່ງ, ເນື້ອທີ່3,337.82 ເຮັກຕາ (ໃນນີ້:ໃນເຂດປ່າສະຫງວນຂອງແຂວງ ໄດ້ 2 ແຫ່ງ,ເນື້ອທີ່ 861.97 ເຮັກຕາ, ປ່າປ້ອງກັນ 5 ແຫ່ງ,ເນື້ອທີ່ 2,475.85 ເຮັກຕາ) ມາຮອດປັດຈຸບັນ ທົ່ວເມືອງ ມີອັດຕາການປົກຫຸ້ມປ່າໄມ້ກວມ 47%.
ກ່ຽວກັບວຽກການເຕີບໂຕສີຂຽວ ແລະ ການແກ້ໄຂບັນຫາຕໍ່ກັບການປ່ຽນແປງດິນຟ້າອາກາດ ແລະ ການກຽມຄວາມພ້ອມຮັບມືຈາກໄພພິບັດ.ເມືອງໄດ້ອອກແຮງເຜີຍແຜ່,ເຊື່ອມຊຶມຄູ່ມືແນະນຳການຈັດຕັ້ງປະຕິບັດວຽກງານຂຽວສະອາດງາມຕາ ແລະຊຸກຍູ້ຕິດຕາມກວດກາໄດ້ 7 ໂຮງຮຽນ 6 ບ້ານ,ປະເມີນສຳເລັດ 2 ໂຮງຮຽນ,3 ບ້ານ ແລະ ໄດ້ຮັບຮອງເປັນບ້ານດີເດັ່ນຂຽວສະອາດງາມຕາ ໄດ້ 3 ບ້ານ;ໄປພ້ອມດຽວກັນນີ້ເມືອງໄດ້ເອົາໃຈໃສ່ຊຸກຍູ້ການຈັດຕັ້ງປະຕິບັດແຜນການຄຸ້ມຄອງສິ່ງແວດລ້ອມ, ສັງຄົມແລະ ທຳມະຊາດ ຢູ່ບັນດາຫົວໜ່ວຍທຸລະກິດແບບຄອບຄົວ 20 ຄັ້ງ,ເທົ່າກັບ 100% ຂອງແຜນການ, ລົງເກັບຕົວຢ່າງເພື່ອກວດກາຄຸນນະພາບນໍ້າ 5 ຄັ້ງ,ກວດກາສະຖານທີ່ສ້າງຕັ້ງບັນດາໂຄງການ,ກິດຈະການ,ຫົວໜ່ວຍທຸລະກິດ, ຫ້າງຮ້ານ,ຮັບຮອງອອກໃບຢັ້ງຢືນສິ່ງແວດລ້ອມໃຫ້ບັນດາຫົວໜ່ວຍທຸລະກິດຂັ້ນຄອບຄົວໄດ້ 33 ຫົວໜ່ວຍເທົ່າກັບ 66%, ວັດແທກປະລິມານນ້ຳຝົນໄດ້ທັງໝົດ 246 ຄັ້ງ, ປະລິມານນ້ຳຝົນ 6.371,5 ມິນລີແມັດແລະ ສ້າງສະຖານທີ່ຖີ້ມຂີ້ເຫຍື້ອໄດ້ 5 ຈຸດ.
ຕໍ່ກັບການນໍາໃຊ້ທີ່ດິນ,ປ່າໄມ້ ແລະ ນໍ້າຕາມທິດທີ່ມີຄວາມສົມດຸນ ແລະ ຍືນຍົງ,ເມືອງໄດ້ສຳເລັດການສ້າງແຜນຈັດສັນທີ່ດິນຂັ້ນບ້ານສຳເລັດ 47 ບ້ານ, ເທົ່າກັບ 100%, ຂຶ້ນທະບຽນອອກໃບຕາດິນຖາວອນໄດ້ທັງໝົດ 1,367 ຕອນ, ເນື້ອທີ່ 14,118,265 ຕາແມັດ, ເທົ່າກັບ 137% ຂອງແຜນການ, ຕິດຕາມ, ກວດກາດິນລັດທີ່ໃຫ້ນັກລົງທຶນ ເຊົ່າ-ສໍາປະທານຈຳນວນ 90 ຕອນ, ເນື້ອທີ່ 178.45 ເຮັກຕາ, ກວດກາການນຳໃຊ້ທີ່ດິນ 8 ປະເພດສຳເລັດ 10 ບ້ານ, ກວດກາການຄຸ້ມຄອງການນຳໃຊ້ທີ່ດິນເຂດຫວງຫ້າມຂອງລັດ (ຖອນສິດນຳໃຊ້) ຈຳນວນ 106 ຕອນ, ເນື້ອທີ່ 115.41 ເຮັກຕາແລະສ້າງສະຖານີອຸຕຸນິຍົມໄດ້ 2 ແຫ່ງ, ສະຖານີອຸທົກກະສາດໄດ້ 1 ແຫ່ງ.
