ກອງປະຊຸມທາບທາມບຸກຄະລາກອນອອກສະໜັກຮັບເລືອກຕັ້ງຮອບທີ 1 ຂອງຮາກຖານພັກ ພະແນກກະສິກໍາ ແລະ ປ່າໄມ້(ກປ) ແຂວງຄໍາມ່ວນໄດ້ຈັດຂຶ້ນເມື່ອບໍ່ດົນມານີ້ ໂດຍການເຂົ້າຮ່ວມເປັນປະທານຂອງສະຫາຍ ວົງເພັດ ຈິດປັນຍາ ຮອງເລຂາພັກແຂວງ ຜູ້ຊີ້ນໍາວຽກງານການເມືອງ-ແນວຄິດ,ວຽກງານພັກ-ພະນັກງານ, ມີສະຫາຍ ເດດສັກດາ ມະນີຄໍາ ກໍາມະການພັກແຂວງ ເລຂາຄະນະພັກຮາກຖານ ພະແນກກະສິກໍາ ແລະ ປ່າໄມ້ແຂວງ,ມີແຂກຖືກເຊີນ,ສະມາຊິກພັກສົມບູນ ແລະ ສໍາຮອງເຂົ້າຮ່ວມ.

ສະຫາຍ ສຸກັນ ອິນທະນູຮັກ ຮອງເລຂາຄະນະພັກຮາກຖານໄດ້ຜ່ານຮ່າງບົດລາຍງານການເມືອງຕີລາຄາຜົນສໍາເລັດຂອງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງຄະນະພັກຮາກຖານ ພະແນກ ກປ ແຂວງນັບແຕ່ປີ 2019 - 2024 ແລະ ທິດທາງແຜນການແຕ່ປີ 2025 - 2029 ໂດຍໃນບົດລາຍງານການເມືອງແມ່ນໄດ້ຕີລາຄາຜົນສຳເລັດໃນການນຳພາ-ຊີ້ນຳແຕ່ລະດ້ານເປັນຕົ້ນແມ່ນການນຳພາດ້ານໂຄງປະກອບການຈັດຕັ້ງ,ການນຳພາດ້ານແບບແຜນນຳພາ ແລະ ວິທີເຮັດວຽກ, ວຽກນໍາພາການເມືອງ - ແນວຄິດ ແລະ ຮັກສາຄວາມປອດໄພຢູ່ສໍານັກງານ - ອົງການ, ວຽກງານນຳພາດ້ານວິຊາສະເພາະ, ວຽກງານນຳພາກໍ່ສ້າງພັກ, ປັບປຸງການຈັດຕັ້ງ-ພະນັກງານ ແລະ ກວດກາປ້ອງກັນພັກ ແລະ ວຽກງານນຳພາອົງການຈັດຕັ້ງມະຫາຊົນ. ພ້ອມກັນນັ້ນຍັງໄດ້ຕີລາຄາດ້ານດີ, ດ້ານອ່ອນ, ບັນຫາຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້.. ຈາກນັ້ນ, ສະຫາຍ ເດດສັກດາ ມະນີຄໍາ ໄດ້ຜ່ານຮ່າງບົດສໍາຫຼວດການນໍາພາລວມຂອງຄະນະພັກຮາກຖານສະໄໝທີ VII ໃນໄລຍະ 5 ປີ (2019 – 2024)ຜ່ານມາ.

ໃນກອງປະຊຸມສະຫາຍ ນາງ ມຸນທາ ລັດຖະຈັກ ຕາງໜ້າຄະນະຈັດຕັ້ງແຂວງໄດ້ຜ່ານມາດຖານ ແລະເງື່ອນໄຂບຸກຄະລາກອນຜູ້ທີ່ຈະອອກສະໜັກຮັບເລືອກຕັ້ງຮອບທີ 1 ຂອງຮາກຖານພັກ ພະແນກ ກປ ແຂວງ. ຈາກນັ້ນ, ບັນດາຜູ້ແທນສົມບູນ ໄດ້ປ່ອນບັດທາບທາມບຸກຄະລາກອນອອກສະໜັກຮັບເລືອກຕັ້ງຮອບທີ 1 ຢ່າງເປັນທາງການ.

(ຂ່າວ-ພາບ:ແດງສະຫວັດ ແສນພານິດ)