ເພີ່ມຂຶ້ນ 40% ເມື່ອທຽບໃສ່ປີຜ່ານມາ, ຄາດວ່າ ໝົດປີ 2024 ນີ້ ຈະເກັບໃຫ້ໄດ້ 55 ພັນຕື້ກວ່າກີບ ເທົ່າກັບ 110% ຂອງແຜນການປີ.
ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນວັນທີ 18 ພະຈິກ 2024 ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ສັນຕິພາບ ພົມວິຫານ ໃຫ້ຮູ້ວ່າ: ການຈັດຕັ້ງປະຕິບັດແຜນງົບປະມານ 10 ເດືອນ ປີ2024 ກະຊວງການເງິນ ສາມາດຈັດຕັ້ງປະຕິບັດລາຍຮັບທັງໝົດໄດ້ 46,174 ຕື້ກີບ ເທົ່າກັບ 92% ຂອງແຜນການປີ ຫຼື ເທົ່າກັບ 15.72% ຂອງ GDP,ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 40% ເປັນເງິນປະມານ 13,083 ຕື້ກີບ, ໃນນັ້ນມີລາຍຮັບພາຍໃນປະຕິບັດໄດ້ 43,170 ຕື້ກີບ ເທົ່າກັບ 96% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 35% ເປັນເງິນປະມານ 11,293 ຕື້ກີບ ປະກອບມີລາຍຮັບສູນກາງ 29,900 ຕື້ກີບ ເທົ່າກັບ 87%ແລະ ລາຍຮັບທ້ອງຖິ່ນ 13,270 ຕື້ກີບ ເທົ່າກັບ 125% ຂອງແຜນການປີ. ຄາດຄະເນສູ້ຊົນເກັບລາຍຮັບທັງໝົດໃນປີ 2024 ຈະໃຫ້ໄດ້ 55,117 ຕື້ກີບ ເທົ່າກັບ 110% ຂອງແຜນການປີ ເປັນເງິນ 5,011 ຕື້ກີບ ເທົ່າກັບ 18.76% ຂອງ GDP (ມະຕິສະພາ 17%) ໃນນີ້ ບໍ່ລວມລາຍຮັບວິຊາການ ແລະ ກອງທຶນທີ່ສະເໜີດັດແກ້ 941 ຕື້ກີບ.
ທ່ານ ສັນຕິພາບ ພົມວິຫານ ໄດ້ຍົກໃຫ້ເຫັນສິ່ງທີ່ພົ້ນເດັ່ນ ໃນການຈັດຕັ້ງປະຕິບັດ ລາຍຮັບເຂົ້າງົບປະມານມີທ່າອ່ຽງເພີ່ມຂຶ້ນ ເມື່ອທຽບໃສ່ໄລຍະດຽວກັນ ຍ້ອນການຂະຫຍາຍຕົວ ຂອງເສດຖະກິດພາຍໃນ, ການເປີດປີທ່ອງທ່ຽວລາວ ຕິດພັນກັບການເປັນປະທານອາຊຽນທີ່ສປປ ລາວ ເປັນເຈົ້າພາບ, ສັດສ່ວນການລົງທຶນຂອງຕ່າງປະເທດ ກໍມີທ່າອ່ຽງເພີ່ມຂຶ້ນ, ຫຼາຍກິດຈະການ ກໍມີທ່າອ່ຽງຂະຫຍາຍຕົວ ບວກກັບການຈັດຕັ້ງປະຕິບັດບັນດາມາດຕະການ ແລະ ນິຕິກຳ ທີ່ເປັນການຜັນຂະຫຍາຍວາລະແຫ່ງຊາດ, ການອັດຊ່ອງວ່າງການຮົ່ວໄຫຼຂອງງົບປະມານ, ການປັບປຸງນິຕິກຳ, ການບັງຄັບໃຊ້ກົດໝາຍ ແລະ ການຄຸ້ມຄອງການເກັບລາຍຮັບເປັນທັນສະໄໝ ເຮັດໃຫ້ການເກັບລາຍຮັບເພີ່ມຂຶ້ນ ທຽບໃສ່ໄລຍະດຽວກັນຂອງປີຜ່ານມາ ເປັນຕົ້ນການຂະຫຍາຍຕົວຂອງເສດຖະກິດ ເຫັນວ່າເປັນປັດໄຈພື້ນຖານ ເຮັດໃຫ້ຫຼາຍກິດຈະການ ມີທ່າອ່ຽງທີ່ເພີ່ມຂຶ້ນເປັນຕົ້ນ: ລາຍຮັບກິດຈະການຂົນສົ່ງ 142%, ໂຮງແຮມ-ບ້ານພັກ ເພີ່ມຂຶ້ນ 97%, ພາຫະນະ 91%, ບັນເທິງ ແລະ ຫວຍ 85%, ໄຟຟ້າ 60%, ການຄ້າ 60%, ນໍ້າມັນເຊື້ອໄຟ 57%, ທະນາຄານ ແລະ ການປະກັນໄພ44%, ບໍ່ແຮ່ 45%, ຜະລິດເຄື່ອງດື່ມ 37% ແລະ ອື່ນໆ; ສາມາດຄຸ້ມຄອງເກັບລາຍຮັບ ທີ່ເປັນສະກຸນເງິນຕາຕ່າງປະເທດໄດ້ 438.9 ລ້ານໂດລາແລະ 1,251.3 ລ້ານບາດ ລວມເປັນເງິນກີບ 10,155 ຕື້ກີບ ເທົ່າກັບ 21% ຂອງແຜນລາຍຮັບທັງໝົດ ແລະ ເປັນເງິນໂດລາເພີ່ມຂຶ້ນ 32% ແລະ ເງິນບາດເພີ່ມຂຶ້ນ 11% ທຽບໃສ່ໄລຍະດຽວກັນຂອງປີຜ່ານມາ. ສ່ວນຄ່າຜິດດ່ຽງຈາກອັດຕາແລກປ່ຽນ ເຫັນວ່າບໍ່ມີຜົນຕໍ່ການເພີ່ມຂຶ້ນຂອງການເກັບລາຍຮັບ ເນື່ອງຈາກອັດຕາແລກປ່ຽນ ສະເລ່ຍຢູ່ໃນລະດັບໃກ້ຄຽງກັນໃນເວລາການສ້າງແຜນ ພ້ອມນີ້, ຍັງໄດ້ປະຕິບັດການເພີ່ມອັດຕາອາກອນຊົມໃຊ້ ຂອງບາງປະເພດສິນຄ້າ;ສາມາດເອົາພາຫະນະເຂົ້າສູ່ລະບົບ ຄຸ້ມຄອງເກັບລາຍຮັບອາກອນ; ນຳໃຊ້ລະບົບຈັດເກັບຄ່າທຳນຽມ ແລະ ຄ່າບໍລິການລວມສູນຢູ່ 7 ດ່ານໃຫຍ່ດ້ວຍລະບົບທັນສະໄໝ; ອັດຊ່ອງວ່າງຮົ່ວໄຫຼ ດ້ວຍການປາບປາມການລັກລອບ ໜີພາສີດ້ວຍການຕິດຕາມກວດກາ.
ສຳລັບການຈັດຕັ້ງປະຕິບັດລາຍຈ່າຍ 10 ເດືອນ2024 ປະຕິບັດໄດ້ 41,512 ຕື້ກີບ ເທົ່າກັບ 68% ຂອງແຜນການປີ, ໃນນັ້ນຂັ້ນສູນກາງປະຕິບັດໄດ້ 32,420 ຕື້ກີບ ເທົ່າກັບ 67% ແລະ ຂັ້ນທ້ອງຖິ່ນປະຕິບັດໄດ້ 9,092 ຕື້ກີບ ເທົ່າກັບ 70% ຂອງແຜນການປີ; ຄາດຄະເນລາຍຈ່າຍໝົດປີ ຈະສູ້ຊົນປະຕິບັດບໍ່ເກີນກອບເພດານແຜນລາຍຈ່າຍ ທີ່ສະພາແຫ່ງຊາດຮັບຮອງ ບົນຈິດໃຈປະຢັດ ແລະ ຕ້ານການຟຸ່ມເຟືອຍ ໃນນີ້ ຍັງບໍ່ທັນລວມການຂໍດັດແກ້ລາຍຈ່າຍວິຊາການ ແລະ ກອງທຶນ 941 ຕື້ກີບ.
ສຳລັບທິດທາງລວມ ກະຊວງການເງິນ ໄດ້ຄົ້ນຄວ້າຄາດໝາຍແຜນງົບປະມານ ປີ 2025 ບົນພຶ້ນຖານການສ້າງແຜນລາຍຮັບ ພາຍໃນກຸ້ມລາຍຈ່າຍພາຍໃນ ແລະ ສ່ວນເຫຼືອສະສົມໄວ້ ເພື່ອຊຳລະໜີ້ສິນພາຍໃນ ແລະ ຕ່າງປະເທດໃຫ້ຫຼຸດລົງ, ຫຼຸດຜ່ອນການກູ້ຢືມໃໝ່ ທີ່ເປັນການສ້າງໜີ້; ສຳລັບຄາດໝາຍແຜນງົບປະມານຄາດຄະເນ ສູ້ຊົນເກັບລາຍຮັບທັງໝົດ ໃນປີ 2025 ຈຳນວນ 68,100 ຕື້ກີບ ທຽບໃສ່ແຜນຂອງປີຜ່ານມາເພີ່ມຂຶ້ນ 36% (ເປັນເງິນ 17,993 ຕື້ກີບ) ເທົ່າກັບ 18.16% ຂອງ GDP. ສະເພາະລາຍຮັບພາຍໃນ ຈໍານວນ 62,700 ຕື້ກີບເພີ່ມຂຶ້ນ 39% (ເປັນເງິນ 17,630 ຕື້ກີບ) ເທົ່າກັບ 16,72% ຂອງ GDP (ມູນຄ່າ GDP ເທົ່າກັບ 374,921 ຕື້ກີບ). ສ່ວນຄາດໝາຍເພດານ ລວມຍອດລາຍຈ່າຍງົບປະມານແຫ່ງລັດ ທັງໝົດ 71,850 ຕື້ກີບ ເທົ່າກັບ 19.16% ຂອງGDP ໃນນີ້ລາຍຈ່າຍງົບປະມານປົກກະຕິພາຍໃນ 53,550 ຕື້ກີບ ເທົ່າກັບ 14.28% ຂອງ GDP.
ຂ່າວ-ພາບ: ຍຸພິນທອງ
ຄໍາເຫັນ