ລົງວັນທີ 21/11/2023 ວ່າດ້ວຍການຮັບຮອງໃຫ້ລັດຖະບານສືບຕໍ່ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຮອດປີ 2025 ຕໍ່ກອງປະຊຸມສະໄໝສາມັນ ເທື່ອທີ 8 ສະພາແຫ່ງຊາດຊຸດທີ IX ໃນວັນທີ 20 ພະຈິກນີ້ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ພົອ ວິໄລ ຫຼ້າຄໍາຟອງ ກ່າວວ່າ: ຕະຫຼອດໄລຍະ 11 ເດືອນຜ່ານມາ, ເຖິງວ່າລັດຖະບານ ຈະປະສົບຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ ແຕ່ກໍມີຜົນສໍາເລັດໃນຫຼາຍລະດັບທີ່ແຕກຕ່າງກັນ ໂດຍສະເພາະນັບແຕ່ເດືອນ 1 - 11 ປີ 2024 ໃນຂອບເຂດທົ່ວປະເທດ ສາມາດແກ້ໄຂມ້າງທຳລາຍຄະດີຢາເສບຕິດ ໄດ້ທັງໝົດ 3,395 ເລື່ອງ, ຈັບຜູ້ຖືກຫາໄດ້ 5,168 ຄົນ/ຍິງ 505 ຄົນ, ຕ່າງປະເທດ 199 ຄົນ/ຍິງ 19 ຄົນ (ຫວຽດນາມ 61 ຄົນ/ ຍິງ 6 ຄົນ, ຈີນ 59 ຄົນ/ຍິງ 3 ຄົນ, ມຽນມາ 16 ຄົນ, ໄທ 39 ຄົນ/ຍິງ 4 ຄົນ, ມາເລເຊຍ 3 ຄົນ, ໄນຈີເລຍ 1 ຄົນ/ຍິງ 1 ຄົນ, ອີຕາລີ 1 ຄົນ, ອົສຕຣາລີ 1 ຄົນ, ອິນເດຍ 2 ຄົນ/ຍິງ 1 ຄົນ, ອິນໂດເນເຊຍ 1 ຄົນ, ເຢເມນ 1 ຄົນ, ຝຣັ່ງ 1 ຄົນ, ສ ເກົາຫຼີ 3 ຄົນ, ເລບານອນ 1 ຄົນ, ອັງກິດ 1 ຄົນ, ອາເມຣິກາ 1 ຄົນ, ເຢຍລະມັນ 2 ຄົນ/ຍິງ 1 ຄົນ, ຍີ່ປຸ່ນ 2 ຄົນ/ຍິງ 1 ຄົນ, ກຳປູເຈຍ 2 ຄົນ, ຟີລີບປິນ 1 ຄົນ); ຢຶດເຮໂຣອິນ 380.96 ກິໂລ (ກລ), ຢາບ້າ 81,030,733 ເມັດ ນໍ້າໜັກ 8,103.07 ກລ, ຢາໄອສ 4,816.17 ກລ, ຢາຝິ່ນ 84,86 ກລ, ຄັນຊາ 3,583.24 ກລ, ເຄຕາມິນ 33,14 ກລ, ຢາອີ 2,584 ເມັດ ກັບ 61,44 ກລ, ໂຄເຄນ 0,99 ກລ, ແປ້ງຝຸ່ນ 10,092.84 ກລ, ສານເຄມີ 101 ຖັງ, ລົດໃຫຍ່ 77 ຄັນ, ລົດ ຈັກ 480 ຄັນ, ປືນ 10 ກະບອກ, ລູກປືນ 1,677 ລູກ; ໄດ້ລົງສຳຫຼວດເນື້ອທີ່ລັກລອບປູກຝິ່ນ ປີ 2024 ຢູ່ 9 ແຂວງພາກເໜືອ ແລະ ພາກກາງ; ກວດພົບເນື້ອທີ່ລັກລອບປູກຝິ່ນ 5,831 ເຮັກຕາ (ຮຕ), ທໍາລາຍໄດ້ 126 ຮຕ ແລະ ລົງກວດກາ ແລະ ທໍາລາຍການລັກ ລອບປູກຕົ້ນກະທ່ອມ ຢູ່ເມືອງສັງທອງ ນະຄອນຫຼວງວຽງຈັນ 123 ຕົ້ນ ແລະ ໄດ້ທໍາລາຍສານເຄມີຕົ້ນທີ່ເຈົ້າໜ້າທີ່ຢຶດໄດ້ຢູ່ 3 ແຂວງພາກເໜືອຄື: ແຂວງບໍ່ແກ້ວ, ຫຼວງພະບາງ, ຫຼວງນ້ຳທາ ຈຳນວນ 126 ໂຕນ; ຕໍ່ເປົ້າໝາຍຜູ້ເສບຢາເສບຕິດ (ຜູ້ຖືກເຄາະຮ້າຍ) ພວກເຮົາໄດ້ນໍາເຂົ້າສູນບໍາບັດ-ປິ່ນປົວ, ຟື້ນຟູສຸຂະພາບ ທີ່ມີໃນທົ່ວປະເທດ 14 ສູນ; ມີທັງໝົດ 5,132 ຄົນ/ຍິງ 209 ຄົນ (ໃນນັ້ນ, ປິ່ນປົວດີແລ້ວກັບຄືນບ້ານມີ 2,513 ຄົນ/ຍິງ 112 ຄົນ, ສືບຕໍ່ປິ່ນປົວ 2,619 ຄົນ/ຍິງ 97 ຄົນ); ປັດຈຸບັນລັດຖະບານ ສສ ຫວຽດນາມ ໄດ້ໃຫ້ການຊ່ວຍເຫຼືອໂຄງການກໍ່ສ້າງສູນບໍາບັດຜູ້ຕິດຢາເສບຕິດ 1 ແຫ່ງ (ຫຼັກ 62) ຊຶ່ງສາມາດບັນຈຸໄດ້ 500 ກວ່າຄົນ; ໄດ້ສຳເລັດພິທີວາງສີລາລືກໃນວັນທີ 12 ກໍລະກົດ 2024 ຄາດວ່າທ້າຍປີ 2025 ຈະສໍາເລັດການກໍ່ສ້າງ ແລະ ມີຈຸດໃຫ້ຄໍາປຶກສາຜູ້ຕິດຢາເສບຕິດ ຂັ້ນຊຸມຊົນຢູ່ໂຮງໝໍເມືອງ ຈຳນວນ 28 ຈຸດ; ໄດ້ອອກໃບຢັ້ງຢືນຮັບຮອງບໍລິສັດເຂົ້າຮ່ວມໂຄງການປູກພືດທົດແທນການປູກຝິ່ນຢູ່ 7 ແຂວງພາກເໜືອ ແລະ ພາກກາງ, ມີທັງໝົດ 57 ບໍລິສັດ, ບໍລິສັດດັ່ງກ່າວໄດ້ປູກ ແລະ ເກັບຊື້ຜົນຜະລິດນຳປະຊາຊົນເຊັ່ນ: ຢາງພາລາ, ກາເຟ, ຊາ, ອ້ອຍ, ສາລີ, ມັນຕົ້ນ, ເຂົ້າ, ໝາກແໜ່ງ, ລ້ຽງງົວ-ຄວາຍ ແລະ ລ້ຽງປາ (ລວມມີ 18 ລາຍການພືດ ແລະ 2 ລາຍການລ້ຽງສັດ), ປະຊາຊົນໄດ້ຮັບຜົນປະໂຫຍດ 1,440 ບ້ານ, 58,185 ຄອບຄົວ.
ທ່ານ ພົອ ວິໄລ ຫຼ້າຄໍາຟອງ ກ່າວຕື່ມວ່າ: ໃນໄລຍະຜ່ານມາ ລັດຖະບານໄດ້ເອົາໃຈໃສ່ເພີ່ມທະວີຄວາມຮັບຜິດຊອບ ແລະ ຄວາມສາມາດໃນການນໍາພາ-ຊີ້ນໍາຂອງຄະນະພັກ, ອໍານາດການປົກຄອງແຕ່ລະຂັ້ນໃຫ້ສູງຂຶ້ນກວ່າເກົ່າ; ຖືເອົາວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ເປັນສະໜາມຮົບທົ່ວປວງຊົນ ແລະ ເປັນມາດຕະ ຖານເງື່ອນໄຂໜຶ່ງເຂົ້າໃນຂະບວນການແຂ່ງຂັນຮັກຊາດ ແລະ ພັດທະນາ, ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕິດພັນກັບການສ້າງບ້ານ, ສຳນັກງານ, ອົງການກົມກອງ, ສະຖາບັນການສຶກສາ, ໂຮງຮຽນ, ໂຮງໝໍ, ໂຮງງານ ແລະ ບັນດາຫົວໜ່ວຍການຜະລິດ-ທຸລະກິດປອດຢາເສບຕິດ; ປັດຈຸບັນ ສາມາດສ້າງບ້ານປອດຢາເສບຕິດ ໄດ້ 3,222 ບ້ານ, ສ້າງບ້ານຄູ່ຂະໜານສີຂາວປອດຢາເສບຕິດ ໄດ້ 20 ບ້ານ (ກັບປະເທດໄທໄດ້ 17 ບ້ານ, ກັບປະເທດກຳປູເຈຍ ໄດ້ 3 ບ້ານ); ສ້າງບ້ານປອດຄະດີ ໄດ້ 2,899 ບ້ານ; ສ້າງໂຮງຮຽນ, ສະຖາບັນການສຶກສາປອດຢາເສບຕິດ ໄດ້ 9,163 ໂຮງຮຽນ; ສ້າງສະຖານທີ່ປອດຢາເສບຕິດ ໄດ້ 38 ກົມກອງ/ຂະແໜງການ.
(ຂ່າວ: ວັນເພັງ+ຍຸພິນທອງ, ພາບ: ສຸກສະຫວັນ)
ຄໍາເຫັນ