ເມືອງສາລະວັນ ແຂວງສາລະວັນ ໄດ້ປະກາດຮັບຮອງເອົາ 13 ບ້ານຂອງເມືອງ ເປັນບ້ານຢຸດຕິການຖ່າຍຊະຊາຍ ມີ: ບ້ານສະໂປນ, ເລີນສຳພັນ, ປາກປົ່ງ, ສອງຄອນ, ເລີນປະອູບ, ໜອງບົວໃຫຍ່, ທົ່ງປິວ, ໜອງສະເກີງ, ໂພນທັນ, ຄັນຈົມ, ດົງໂກະເໜືອ, ນາຄູ ແລະ ບ້ານນາບອນ. ເຊິ່ງເປັນບ້ານທີ 116 ຂອງເມືອງ ແລະບ້ານທີ 570 ຂອງແຂວງ. ຫຼັງຈາກໄດ້ຮັບການຈັດຕັ້ງປະຕິບັດສໍາເລັດຫຼາຍດ້ານ ຄົບຕາມມາດຖານ, ເງື່ອນໄຂ ແລະ ປະຊາຊົນ ສາມາດເຂົ້າເຖິງການບໍລິການດ້ານສາທາລະນະສຸກ.
ຜ່ານການຈັດຕັ້ງປະຕິບັດຕາມຂັ້ນຕອນ ແລະ ວິທີການຈັດຕັ້ງປະຕິບັດສ້າງບ້ານຢຸດຕິການຖ່າຍຊະຊາຍ ຕາມ 4 ຂັ້ນຕອນຄື: ຂັ້ນຕອນກະກຽມ, ການເກັບກຳ-ວິເຄາະວິໃຈຂໍ້ມູນ, ການຈັດຕັ້ງປະຕິບັດຄາດໝາຍສູ້ຊົນຂອງເມືອງ ເພື່ອບັນລຸການຢຸດຕິການຖ່າຍຊະຊາຍ ແລະ ຂັ້ນຕອນການຊຸກຍູ້, ຕິດຕາມ, ກວດກາ, ປະເມີນຜົນ ແລະຕາມມາດຖານເງື່ອນໄຂ 4 ດາວ ວຽກງານຊຸມຊົນເປັນເຈົ້າການດ້ານສຸຂານາໄມ (ຊຈສ) ສາມາດປະເມີນໄດ້ຄື: ດາວທີ 1 ທຸກໆຄົວເຮືຶອນຕ້ອງກໍ່ສ້າງວິດຖ່າຍ ແລະ ນຳໃຊ້ວິດຖ່າຍ ປະຕິບັດໄດ້ 100%, ດາວທີ 2 ອະນາໄມຮ່າງກາຍ ແລະ ລ້າງມືໃສ່ສະບູທຸກຄັ້ງກ່ອນ ຫຼື ຫຼັງຈັບບາຍສິ່ງຂອງຕ່າງໆ ປະຕິບັດໄດ້ 80%, ດາວທີ 3 ນໍ້າດື່ມ-ນໍ້າໃຊ້ມີຄວາມປອດໄພ ປະຕິບັດໄດ້ 80% ແລະ ດາວທີ 4 ອະນາໄມສິ່ງແວດລ້ອມ ປະຕິບັດໄດ້ 80%. ຈາກນັ້ນ, ທ່ານ ໜູຄຳ ສີສະຫັວດ ຮອງເຈົ້າເມືອງສາລະວັນ ແລະ ທ່ານ ວົງດາວ ສຸລິນທາ ຮອງຫົວໜ້າພະແນກສາທາລະນະສຸກແຂວງ ໄດ້ມອບໃບຢັ້ງຢືນ ບ້ານຢຸດຕິການຖ່າຍຊະຊາຍ ແລະ ບ້ານແບບຢ່າງສາທາລະນະສຸກໃຫ້ 13 ບ້ານ ຕາງໜ້າຮັບໂດຍ ເລຂາພັກ-ນາຍບ້ານ.
ພິທີດັ່ງກ່າວໄດ້ຈັດຂຶ້ນໃນວັນທີ 9 ກຸມພາ 2024 ທີ່ສະໂມສອນເມືອງ, ໂດຍການເຂົ້າຮ່ວມຂອງ ທ່ານ ທ່ານ ຮອງເຈົ້າເມືອງສາລະວັນ ແລະ ພາກສ່ວນກ່ຽວຂ້ອງເຂົ້າຮ່ວມ.
(ຂ່າວ-ພາບ: ທິດລານີ ໂຄດໂຍທາ)
ຄໍາເຫັນ