ທ່ານ ຄຳພຽນ ຄຳມາດນີວົງ ຫົວໜ້າຫ້ອງການ-ການເງິນນະຄອນ ໄດ້ຜ່ານບົດສະຫຼຸບຜົນການຈັດຕັ້ງປະຕິບັດແຜນງົບປະມານເດືອນ 3 ເດືອນປີ 2025, ຊຶ່ງໄດ້ຍົກໃຫ້ເຫັນຜົນງານທີ່ພົ້ນເດັ່ນ, ບັນຫາທີ່ເປັນຂໍ້ຫຍຸ້ງຍາກ ແລະ ສິ່ງທ້າທາຍໃນການຈັດຕັ້ງປະຕິບັດວຽກງານການເງິນ-ງົບປະມານ. ຕະຫຼອດໄລຍະຜ່ານມາ, ຫ້ອງການ-ການເງິນນະຄອນ ໄດ້ສຸມໃສ່ແກ້ໄຂຢ່າງເອົາຈິງເອົາຈັງ ແລະ ເປັນລະບົບຄື: ສືບຕໍ່ແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ, ບັນຫາສຳຄັນແມ່ນການຈັດຕັ້ງປະຕິບັດແຜນງົບປະມານໄດ້ຮັບຜົນສຳເລັດຫຼາຍດ້ານ ໂດຍສະເພາະການຂຸດຄົ້ນລາຍຮັບງົບປະມານໄດ້ລື່ນແຜນການປີ, ການຄຸ້ມຄອງລາຍຈ່າຍສາມາດຕອບສະໜອງລາຍຈ່າຍໃຫ້ແກ່ການເຄື່ອນໄຫວຂອງກົງຈັກພັກ-ລັດ ເປັນຕົ້ນລາຍຈ່າຍເງິນເດືອນ, ເງິນນະໂຍບາຍ, ເງິນບໍລິຫານ, ເງິນດັດສົມ-ສົ່ງເສີມໄດ້ໂດຍພື້ນຖານ. ຫ້ອງການ-ການເງິນນະຄອນ ໄດ້ຮັບຈັດຕັ້ງປະຕິບັດແຜນຈັດເກັບລາຍຮັບປີ 2025 ທັງໝົດ 33.83 ຕື້ກວ່າກີບ, ມາຮອດເດືອນ 3 ປີ 2025 ປະຕິບັດໄດ້ 9.88 ຕື້ກີບ ເທົ່າກັບ 29.21% ຂອງແຜນການປີ 2025 ແລະ ໄດ້ລື່ນແຜນງວດ 1.79 ຕື້ກວ່າກີບ (ແຜນງວດແມ່ນ 8.11 ຕື້ກວ່າກີບ ເທົ່າກັບ 24%). ໃນນີ້, ອາກອນປົກກະຕິປະຕິບັດໄດ້ 6.57 ຕື້ກວ່າກີບ ເທົ່າກັບ 44.10% ຂອງແຜນການປີ, ທີ່ດິນ ບັນລຸໄດ້ 663.47 ລ້ານກວ່າກີບ ເທົ່າກັບ 8.41%, ຄ່າທຳນຽມ 8.12 ຕື້ກີບ, ປະຕິບັດໄດ້ 2,476 ຕື້ກີບ ເທົ່າກັບ 30.50%; ດ້ານການປະຕິບັດລາຍຈ່າຍບໍລິຫານປົກກະຕິ ແລະບໍລິຫານວິຊາການໃນໄລຍະ 3 ເດືອນຕົ້ນປີ ປະຕິບັດໄດ້ 250.41 ລ້ານກວ່າກີບ; ສ່ວນທິດທາງແຜນການໃນ 9 ເດືອນທ້າຍປີ 2025 ຈະຕ້ອງສູ້ຊົນເກັບລາຍຮັບໃຫ້ໄດ້ 23.95 ຕື້ກີບ ຫຼື ໃຫ້ລື່ນແຜນການ. ຈາກນັ້ນ, ຜູ້ເຂົ້າຮ່ວມກໍໄດ້ປະກອບຄໍາຄິດເຫັນ, ສະໜີວິທີການແກ້ໄຂໃສ່ບົດສະຫຼຸບ ພ້ອມທັງຮັບຮອງເອົາທິດທາງແຜນການປະຈຳປີ 2025.
ໃນພິທີ, ຍັງໄດ້ມອບໃບຍ້ອງຍໍໃຫ້ກັບພະນັກງານຜູ້ທີ່ມີຜົນງານໃນການປະຕິບັດໜ້າທີ່ວຽກງານດີເດັ່ນຂອງຂະແໜງການ ຫ້ອງການສ່ວຍສາອາກອນປະຈຳນະຄອນ ແລະ ບັນດາບ້ານຂອງນະຄອນ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ