3 ປີເມືອງເງິນ ຈັດຕັ້ງປະຕິບັດວາລະແຫ່ງຊາດ ແກ້ໄຂບັນຢາເສບຕິດ

ປກສ ເມືອງເງິນ ແຂວງໄຊຍະບູລີ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ (2021-2023) ຂຶ້ນໃນອາທິດຜ່ານມານີ້, ຢູ່ຫໍປະຊຸມ ປກສ ເມືອງພາຍໃຕ້ການເປັນປະທານຂອງທ່ານ ພັທ ພອນສະຫວັນ ວໍລະສັກ ຄະນະປະຈໍາພັກເມືອງ ຫົວໜ້າ ກອງບັນຊາການ ປກສ ເມືອງ, ມີກໍາມະການພັກເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ພັທ ສົມພອນ ພູມມາລີ ຮອງກອງບັນຊາການ ປກສ ເມືອງ ໄດ້ຜ່ານບົດສະຫຼຸບ ຕີລາຄາປະເມີນຜົນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢູ່ເມືອງເງີນ (ແຕ່ປີ 2021-2023). ກອງບັນຊາການ ປກສ ເມືອງເງີນ ໄດ້ຈັດຕັ້ງຜັນຂະຫຍາຍໄດ້ເອົາບ້ານຂອນເປັນບ້ານທົດລອງ. ຈາກນັ້ນ, ຈຶ່ງໄດ້ຜັນຂະຫຍາຍໄປທົ່ວເມືອງ ແລະ ໄດ້ປະຕິບັດ 6 ວຽກງານຈຸດສຸມຂອງວາລະແຫ່ງຊາດ ໂດຍຖືເອົາການໂຄສະນາເຜີຍແຜ່ລະບຽບ, ກົດໝາຍຂອງລັດເປັນປາຍແຫຼມ ໂດຍສະເພາະແມ່ນບັນດາເອກະສານຕ່າງໆທີ່ພົວພັນເຖິງວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃຫ້ແກ່ບັນດາຫ້ອງການ, ກົມກອງ, ອົງການ, ພະນັກງານ, ທະຫານ, ຕຳຫຼວດ ແລະ ພໍ່ແມ່ປະຊາຊົນບັນດາເຜົ່າໃນທົ່ວເມືອງມີຜົນສຳເລັດ 100% ມີຜູ້ເຂົ້າຮ່ວມທັງໝົດ 11, 224 ຄົນ ຍິງ 5,028 ຄົນ. ຈັດຕັ້ງການສຶກສາອົບຮົມນັກໂທດ, ຜູ້ຖືກຫາ, ຜູ້ຖືກດັດສ້າງ ແລະ ຜູ້ທີ່ມາກັກຕົວຟື້ນຟູສຸຂະພາບຢູ່ສູນດັດສ້າງທັງໝົດ 285 ຄົນ ຍິງ 11 ຄົນ. ແຕ່ງຕັ້ງບັນດາອານຸກຳມະການຮັບຜິດຊອບດ້ານຕ່າງໆ ພ້ອມທັງແຕ່ງຕັ້ງນາຍ ແລະ ພົນຕຳຫຼວດຈຳນວນ 15 ສະຫາຍ ລົງໄປຊ່ວຍ 4 ກຸ່ມບ້ານ ໃນທົ່ວເມືອງ ເພື່ອນຳພາບັນຊາແກ້ໄຂວາລະແຫ່ງຊາດ ຢູ່ແຕ່ລະກຸ່ມບ້ານ. ໄດ້ດຳເນີນການສືບສວນຂັ້ນພື້ນຖານເພື່ອກຳແໜ້ນສະພາບ ແລະ ເປົ້າ ໝາຍທີ່ພົວພັນກັບສີ່ງເສບຕິດມີທັງໝົດ 499 ຄົນ ຍິງ 26 ຄົນ. ໃນນີ້, ເປົ້າໝາຍຄ້າ-ຂາຍ 42 ຄົນ ຍິງ 7 ຄົນ, ເປົ້າໝາຍເສບ 457 ຄົນ ຍິງ 19 ຄົນ, ຕໍ່ກັບເປົ້າໝາຍເສບທີ່ໄດ້ແກ້ໄຂທັງໝົດ 461 ຄົນ ຍິງ 22 ຄົນ, ສຶກສາອົບຮົມ ແລະ ເຮັດບົດບັນທຶກຢູ່ຂັ້ນບ້ານ 225 ຄົນ ຍິງ 11 ຄົນ, ນໍາຕົວມາເຂົ້າສູນດັດສ້າງ 236 ຄົນ ຍິງ 7 ຄົນ,ຈັດຕັ້ງເຊື່ອມຊືມເຜີຍແຜ່ແນວທາງ, ລະບຽບ, ກົດໝາຍ, ມະຕິ, ຄຳສັ່ງ ຂອງຂັ້ນເທີງໃຫ້ແກ່ພະນັກງານ, ທະຫານ, ຕຳຫຼວດ, ອົງການປົກຄອງຂັ້ນຕ່າງໆຕະຫຼອດຮອດພໍ່ແມ່ປະຊາຊົນບັນດາເຜົ່າໃຫ້ຮັບຮູ້ເຂົ້າໃຈຢ່າງເລິກເຊີ່ງ ຕໍກັບວາລະແຫ່ງຊາດແນວທາງການແກ້ໄຂບັນຫາຢາເສບຕິດນັບແຕ່ເມືອງລົງຮອດຮາກຖານບ້ານມີທັງໝົດ 25 ຄັ້ງ, ຢູ່ຫ້ອງການ, ກົມກອງ, ໂຮງຮຽນ, ໂຮງໝໍ 3 ຄັ້ງ, ບ້ານ 22 ຄັ້ງ ມີຜູ້ເຂົ້າຮ່ວມທັງໝົດ 11 224 ຄົນ ຍິງ 5 028 ຄົນ.
(ຂ່າວ: ອິນແປງ ແຫວນຄຳ, ພາບ: ດາວສຸກ ສຸລິຍະພອນ)