ທ່ານ ນາງ ອ່ອນ ຈັນທະວົງ ຫົວໜ້າສ່ວຍສາອາກອນປະຈໍາແຂວງວຽງຈັນ ໃຫ້ສຳພາດຕໍ່ນັກຂ່າວແຂວງໃນວັນທີ 28 ເມສາຜ່ານມາວ່າ: ໃນປີ 2025 ນີ້, ສ່ວຍສາອາກອນປະຈໍາແຂວງວຽງຈັນ ມີແຜນເກັບລາຍຮັບ ທັງໝົດ 970.30 ຕື້ກີບ. ໃນນີ້, ມີແຜນເກັບລາຍຮັບຂອງຊັບສິນແຫ່ງລັດ 207 ຕື້ກີບ; ແຜນເກັບລາຍສ່ວຍສາອາກອນ 763.20 ຕື້ກີບ ໂດຍໄດ້ແບ່ງໃຫ້ສ່ວຍສາອາກອນຂັ້ນແຂວງຮັບຜິດຊອບ 669.89 ຕື້ກີບ. ສ່ວຍສາອາກອນປະຈໍາ 11 ເມືອງ ຮັບຜິດຊອບ 93.30 ຕື້ກີບ. ຜ່ານການຈັດຕັ້ງປະຕິບັດຕົວຈິງໃນໄລຍະ 4 ເດືອນຕົ້ນປີປະຕິບັດໄດ້ແລ້ວ 138.54 ຕື້ກີບ.ໃນນີ້, ສ່ວຍສາອາກອນຂັ້ນແຂວງປະຕິບັດໄດ້ 60.29 ຕື້ກີບ, ສ່ວຍອາກອນປະຈໍາເມືອງ 11 ເມືອງ ປະຕິບັດໄດ້ 31.13 ຕື້ີ້ກີບ, ຊັບສິນແຫ່ງລັດປະຕິບັດໄດ້ 47.10 ຕື້ກີບ.
ການຈັດຕັ້ງປະຕິບັດວຽກງານສ່ວຍສາກອນໃນປີນີ້, ມີລັກສະນະພິເສດ ແຕກຕ່າງຈາກປີຜ່ານມາເນື່ອງຈາກວ່າປີຜ່ານມາແຜນເກັບລາຍຮັບທັງໝົດມີພຽງ 272.70 ຕື້ກີບ, ແຕ່ປີ 2025 ແມ່ນ 970.30 ຕື້ກີບ ເພີ່ມຈາກ ປີຜ່ານມາ 700 ກວ່າຕື້ກີບ, ສາເຫດຂອງການເພີ່ມຂຶ້ນຍ້ອນແຂວງພວກເຮົາ ເປັນແຂວງທີ 10 ທີ່ປະຕິບັດຕາມມະຕິ 4/ກມສພ ລົງວັນທີ 11 ເມສາ 2024 ວ່າດ້ວຍການເສດຖະກິດ ເອກລາດ ເປັນເຈົ້າຕົນເອງໃນໄລຍະໃໝ່. ດັ່ງນັ້ນ, ສູນກາງ ຈຶ່ງໄດ້ມອບ 46 ຫົວໜ່ວຍ ທີ່ຕົນເອງຄຸ້ມຄອງ ມອບໃຫ້ສ່ວຍສາອາກອນປະຈໍາແຂວງວຽງຈັນຄຸ້ມຄອງ ແລະ ເກັບລາຍຮັບ ຊຶ່ງຫົວໜ່ວຍດັ່ງກ່າວນັ້ນແມ່ນມີທີ່ຕັ້ງພາກສະໜາມຢູ່ແຂວງວຽງຈັນ.
ສຳລັບການເກັບລາຍ 8 ເດືອນທ້າຍປີນີ້ ຈະໄດ້ສຸມໃສ່ເກັບລາຍຮັບຈາກໂຄງການທີ່ມາເຄື່ອນໄຫວຢູ່ແຂວງວຽງຈັນ, ສຸມໃສ່ປັກມຸດຕອນດິນ, ສຸມໃສ່ວຽກງານອາກອນມູນຄ່າເພີ່ມຢູ່ ເມືອງວັງວຽງ, ເມືອງເຟືອງ ແລະ ເມືອງແກ້ວອຸດົມ. ທ່ານ ນາງ ອ່ອນ ຈັນທະວົງ ຍັງໄດ້ຮຽກຮ້ອງມາຍັງ ພະແນກການກ່ຽວຂ້ອງ, ຜູ້ປະກອບການ, ທຸກພາກສ່ວນ ຕະຫຼອດຮອດປະຊາຊົນຈົ່ງພ້ອມກັນປະຕິບັດພັນທະຂອງຕົນເພື່ອເຮັດໃຫ້ການເກັບລາຍຮັບໃນ 8 ເດືອນທ້າຍປີນີ້ສຳເລັດຕາມແຜນທີ່ວາງໄວ້.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ