4 ເດືອນຕົ້ນປີ ເຊກອງມ້າງຄະດີຢາເສບຕິດໄດ້ 31 ເລື່ອງ

ກອງບັນຊາການປ້ອງກັນຄວາມສະຫງົບ( ປກສ )ແຂວງເຊກອງ ໄດ້ຍົກສູງປະສິດທິພາບທາງດ້ານການນໍາພາ-ບັນຊາໃນການແກ້ໄຂບັນຫາຢາເສບຕິດຕາມ 6 ວຽກຈຸດສຸມ ໂດຍຢຶດໝັ້ນ 3 ຫຼັກການຄື: ຄວາມເດັດຂາດ, ໂປ່ງໃສ ແລະ ເປັນມືອາຊີບ; ໃນໄລຍະ 4 ເດືອນຕົ້ນປີ 2024 ສາມາດມ້າງຄະດີຢາເສບຕິດໄດ້ 31 ເລື່ອງ, ຢຶດຂອງກາງປະເພດຢາບ້າໄດ້ 20.992 ເມັດ ແລະ ກັກຕົວຜູ້ຖືກຫາໄດ້ 31 ຄົນ, ຍິງ 4 ຄົນ.
    ອີງຕາມຂໍ້ມູນຈາກກອງບັນຊາການ ປກສ ແຂວງໃຫ້ຮູ້ວ່າ: ການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດນັບແຕ່ປີ 2021 ເຖິງປັດຈຸບັນ ສາມາດແກ້ໄຂຄະດີໄດ້ຫຼາຍເລື່ອງ ຊຶ່ງເປັນການປະກອບສ່ວນສໍາຄັນໃນການແກ້ໄຂຄວາມບໍ່ສະຫງົບ ກໍຄືບັນຫາປະກົດການຫຍໍ້ທໍ້ຕ່າງໆໃນສັງຄົມໃຫ້ຫຼຸດລົງ, ຍູ້ແຮງການຈັດຕັ້ງແຜນແມ່ບົດກ່ຽວກັບການສ້າງຄອບຄົວ, ບ້ານ ແລະ ກົມກອງປອດຢາເສບຕິດ ແນໃສ່ສ້າງເງື່ອນໄຂອໍານວຍຄວາມສະດວກແກ່ການພັດທະນາເສດຖະກິດ-ສັງຄົມ ແລະ ແກ້ໄຂຄວາມທຸກຍາກຂອງປະຊາຊົນໃຫ້ດີຂຶ້ນ.
    ເພື່ອສືບຕໍ່ແກ້ໄຂບັນຫາຢາເສບຕິດໃຫ້ມີປະສິດທິພາບ-ປະສິດທິຜົນ ແລະ ມີຜົນສໍາເລັດຕາມລະດັບຄາດໝາຍທີ່ວາງໄວ້; ໃນຕໍ່ໜ້າເຈົ້າໜ້າທີ່ກ່ຽວຂ້ອງ ແລະ ຂະແໜງການຕ່າງໆພາຍໃນແຂວງ ຕ້ອງເປັນເຈົ້າການໃນການໂຄສະນາເຜີຍແຜ່ຜົນຮ້າຍຂອງຢາເສບຕິດໃຫ້ກວ້າງຂວາງ ແລະ ທົ່ວເຖິງ ເພື່ອສ້າງໃຫ້ປະຊາຊົນມີຄວາມຮັບຮູ້ເຂົ້າໃຈ ແລະ ເຂົ້າຮ່ວມແກ້ໄຂບັນຫາດັ່ງກ່າວຢ່າງເປັນຂະບວນຟົດຟື້ນ; ສຸມກໍາລັງຫັນລົງກໍ່ສ້າງຮາກຖານການເມືອງ, ປັບປຸງກໍາລັງ ປກສ ຮາກຖານໃຫ້ເຂັ້ມແຂງ, ຊຸກຍູ້ຂະບວນການສ້າງຄອບຄົວ, ບ້ານ ແລະ ກົມກອງປອດຢາເສບຕິດໃຫ້ເປັນປະທໍາຫຼາຍຂຶ້ນ.
ຂ່າວ: ສັນຍາ