ຮຽບຮຽງໂດຍ:ວັນໄຊ ຕະວິນຍານ
ໃນໄລຍະປີ 1996-2001, ຫຼັງຈາກກອງປະຊຸມໃຫຍ່ ຄັ້ງທີ VI ຂອງພັກປະຊາຊົນປະຕິວັດລາວ, ຄະນະກໍາມະການແຜນການ ແລະການຮ່ວມມື ໄດ້ປ່ຽນຊື່ເປັນ ຄະນະກຳມະການແຜນການແຫ່ງລັດອີກຄັ້ງໜຶ່ງ ໂດຍແມ່ນ ທ່ານ ບົວທອງ ວົງລໍຄຳ ກໍາມະການສູນກາງພັກເປັນປະທານຄະນະກຳມະການແຜນການແຫ່ງລັດ.ກົງຈັກຂອງຄະນະກໍາມະການແຜນການແຫ່ງລັດ ມີ 7 ພາກສ່ວນ ໃນໄລຍະນີ້ໄດ້ສ້າງຕັ້ງກົມຈັດຕັ້ງຂຶ້ນ, ໄດ້ຍົກຍ້າຍ ວຽກລົງທຶນໄປຂຶ້ນກັບສຳນັກງານນາຍົກລັດຖະມົນຕີ ໂດຍໄດ້ສ້າງຕັ້ງເປັນຄະນະກຳມະການຄຸ້ມຄອງການລົງທຶນພາຍໃນ ແລະຕ່າງປະເທດ; ພ້ອມນັ້ນ ຄະນະກຳມະການແຜນການແຫ່ງລັດ ໄດ້ຊີ້ນໍາການຟື້ນຟູບົດບາດຂອງວຽກງານແຜນການໃຫ້ເປັນລະບົບຄົບຊຸດນັບທັງສູນກາງ ແລະ ທ້ອງຖິ່ນ, ໂດຍຖືເອົາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IV (1996-2000) ຊຶ່ງໄດ້ເນັ້ນໜັກການສ້າງ ແລະ ຈັດຕັ້ງປະຕິບັດ 9 ແຜນງານບຸລິມະສິດຂອງລັດຖະບານ,ໄດ້ສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ V (2001-2005). ຄຽງຄູ່ກັນນັ້ນ, ກໍໄດ້ວາງຍຸດທະສາດການຫັນເປັນອຸດສາຫະກໍາ ແລະ ທັນສະໄໝ,ຍຸດທະສາດການເຕີບໂຕ ແລະ ຫຼຸດຜ່ອນຄວາມທຸກຍາກແຫ່ງຊາດ ແລະ ສູ້ຊົນບັນລຸວິໄສທັດ ຮອດປີ 2020. ນອກຈາກນັ້ນ, ກໍໄດ້ຄົ້ນຄວ້າວາງມາດຕະການແກ້ໄຂວິກິດການການເງິນອາຊີ.
ປີ 2001-2004, ກອງປະຊຸມໃຫຍ່ ຄັ້ງທີ VII ຂອງພັກປະຊາຊົນປະຕິວັດລາວ ໃນເດືອນ 6 ປີ 2001 ໄດ້ມີການປ່ຽນຊື່ຈາກ ຄະນະກຳມະການແຜນການແຫ່ງລັດ ເປັນ ຄະນະກຳມະການແຜນການ ແລະ ການຮ່ວມມື ຕາມດໍາລັດ 150/ນຍ, ໂດຍ ທ່ານ ທອງລຸນ ສີສຸລິດ ກໍາມະການກົມການເມືອງສູນກາງພັກຮອງນາຍົກລັດຖະມົນຕີເປັນປະທານ (ຄຜຮ); ມາຮອດວັນທີ 24/08/2004 ລັດຖະບານໄດ້ມີດໍາລັດປ່ຽນຊື່ມາເປັນ ຄະນະກຳມະການແຜນການ ແລະ ການລົງທຶນ ຕາມດໍາລັດ 118/ນຍ ໂດຍ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກຮອງນາຍົກລັດຖະມົນຕີເປັນປະທານ (ຄຜທ). ໃນໄລຍະປີ 2004-2006, ກົງຈັກການຈັດຕັ້ງ ຂອງ ຄະນະກຳມະການແຜນການ ແລະ ການລົງທຶນ ປະກອບມີ 11 ພາກສ່ວນສໍາລັບຂັ້ນທ້ອງຖິ່ນມີ 18 ພະແນກແຜນການ ແລະ ການລົງທຶນບັນດາແຂວງ, ນະຄອນຫຼວງ ແລະ ເຂດພິເສດ, ມີ 141 ຫ້ອງການແຜນການປະຈໍາຢູ່ບັນດາເມືອງໃນຂອບເຂດທົ່ວປະເທດ. ໃນໄລຍະນີ້, ໄດ້ສືບຕໍ່ນໍາພາບັນດາວຽກງານໃນຂອບເຂດຄວາມຮັບຜິດຊອບຂອງຕົນຄື: ແຜນການ, ການຄຸ້ມຄອງສົ່ງເສີມການລົງທຶນພາຍໃນ ແລະຕ່າງປະເທດ, ການຕິດຕາມປະເມີນຜົນໂຄງການລົງທຶນ, ວຽກງານສະຖິຕິ, ການຮ່ວມມືລາວ-ຫວຽດນາມ, ຮ່ວມມືລາວ-ຈີນ, ສະຖາບັນຄົ້ນຄວ້າເສດຖະກິດແຫ່ງຊາດ ແລະ ໄດ້ສ້າງຕັ້ງສູນຝຶກອົບຮົມພະນັກງານຄຸ້ມຄອງເສດຖະກິດ-ແຜນການ ຂຶ້ນໃນປີ 2004 ໂດຍການຊ່ວຍເຫຼືອປຸກສ້າງສະຖານທີ່ສຳນັກງານຈາກ ກະຊວງແຜນການ ແລະ ການລົງທຶນ ສສ ຫວຽດນາມ. ພ້ອມນັ້ນ, ໄດ້ເອົາໃຈໃສ່ຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ V (2001-2005) ໃນເງື່ອນໄຂໂລກາພິວັດ ແລະ ການເຊື່ອມໂຍງສາກົນໃນການປະຕິບັດເປົ້າໝາຍສະຫັດສະວັດເພື່ອການພັດທະນາ (Millenium Development Goals ຫຼືMDGs), ການພັດທະນາເສດຖະກິດ ແລະ ການລຶບລ້າງຄວາມທຸກຍາກໄປຕາມທິດຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ.
ມາຮອດປີ 2006 ທ່ານ ທອງລຸນ ສີສຸລິດ ກໍາມະການກົມການເມືອງສູນກາງພັກຮອງນາຍົກລັດຖະມົນຕີປະທານຄະນະກຳມະການແຜນການ ແລະ ການລົງທຶນ ໄດ້ຖືກມອບໝາຍໃຫ້ໄປຮັບໜ້າທີ່ໃໝ່. ທ່ານ ສຸລິວົງ ດາລາວົງ ກຳມະການສູນກາງພັກ ໄດ້ເຂົ້າມາຮັບໜ້າທີ່ເປັນ ປະທານຄະນະກຳມະການແຜນການ ແລະ ການລົງທຶນເພື່ອສືບຕໍ່ຊີ້ນຳ-ນຳພາວຽກງານ ຕາມດຳລັດ ຂອງນາຍົກລັດຖະມົນຕີ ສະບັບເລກທີ 118/ນຍ ແລະ ເປັນລັດຖະມົນຕີ ກະຊວງແຜນການ ແລະ ການລົງທຶນ ຕາມດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກະຊວງແຜນການ ແລະ ການລົງທຶນ ສະບັບເລກທີ 374/ນຍ, ລົງວັນທີ 22/10/2007 ຊຶ່ງໄດ້ປ່ຽນຊື່ຄະນະກຳມະການແຜນການ ແລະ ການລົງທຶນ ມາເປັນ ກະຊວງແຜນການ ແລະ ການລົງທຶນ ຈົນເຖິງປັດຈຸບັນ (ປີ2024). ໃນໄລຍະດັ່ງກ່າວໄດ້ມີການປັບປຸງກົງຈັກການຈັດຕັ້ງໃຫ້ສອດຄ່ອງ ໂດຍປະກອບມີ 10 ກົມ, ໃນນັ້ນໄດ້ຮັບເອົາ ກົມຮ່ວມມືສາກົນ ມາຈາກ ກະຊວງການຕ່າງປະເທດໃນປີ 2007.
ປີ 2008-2011 ທ່ານ ສິນລະວົງ ຄຸດໄພທູນ ກໍາມະການສູນກາງພັກ ໄດ້ຮັບການມອບໝາຍເປັນ ລັດຖະມົນຕີວ່າການ ກະຊວງແຜນການ ແລະ ການລົງທຶນ ຊຶ່ງມີພາລະບົດບາດເປັນເສນາທິການໃຫ້ແກ່ສູນກາງພັກ ແລະ ລັດຖະບານທາງດ້ານວຽກງານແຜນການ ແລະ ການລົງທຶນ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VI (2006-2010). ໄດ້ສ້າງຕັ້ງ ກົມກວດກາ ແລະ ໄດ້ສ້າງຕັ້ງຄະນະກຳມະການສົ່ງເສີມຄວາມກ້າວໜ້າຂອງແມ່ຍິງຢູ່ກະຊວງຂຶ້ນ ໃນປີ 2008, ໄດ້ສ້າງຕັ້ງກອງເລຂາຄະນະຊີ້ນຳສ້າງເຂດເສດຖະກິດພິເສດ ໃນທ້າຍປີ 2009. ກົງຈັກການຈັດຕັ້ງຂອງກະຊວງປະກອບມີ 13 ກົມ ແລະທຽບເທົ່າກົມ ອັນພົ້ນເດັ່ນແມ່ນສະພາແຫ່ງຊາດ ແລະ ລັດຖະບານໄດ້ຍົກຖານະກົມສະຖິຕິ ເປັນສູນສະຖິຕິແຫ່ງຊາດໃຫ້ມີຖານະທຽບເທົ່າທະບວງໃນປີ 2010, ໄດ້ສ້າງສູນສະຖິຕິປະຈຳ 16 ແຂວງ ແລະ ສູນສະຖິຕິປະຈໍາ 63 ເມືອງ. ກົງຈັກຂະແໜງແຜນການ ແລະ ການລົງທຶນຢູ່ຂັ້ນແຂວງ, ຂັ້ນເມືອງ ແລະ ກະຊວງ-ອົງການທຽບເທົ່າມີຄວາມກົມກຽວລະຫວ່າງສາຍຕັ້ງ ແລະ ສາຍຂວາງ, ໃນນີ້,ໄດ້ເອົາໃຈໃສ່ເປັນພິເສດຕໍ່ເມືອງທີ່ໂຮມສອງຫ້ອງການແຜນການ ແລະ ການເງິນເຂົ້າກັນ.
ໃນໄລຍະປີ 2011 ເຖິງກາງປີ 2016 ທ່ານ ສົມດີ ດວງດີ ກໍາມະການສູນກາງພັັກໄດ້ຮັບການມອບໝາຍມາປະຈຳການເປັນ ລັດຖະມົນຕີ ກະຊວງແຜນການ ແລະ ການລົງທຶນ ເພື່ອສືບຕໍ່ຊີ້ນຳ-ນຳພາວຽກງານກະຊວງແຜນການ ແລະ ການລົງທຶນ ຕາມດຳລັດ ຂອງນາຍົກລັດຖະມົນຕີ ສະບັບເລກທີ 374/ນຍ. ໃນໄລຍະນີ້, ແມ່ນໄດ້ສຸມໃສ່ຜັນຂະຫຍາຍ ມະຕິ IX ຂອງພັກ ໂດຍສະເພາະການຈັດຕັ້ງປະຕິບັດ 4 ບຸກທະລຸ ແລະສືບຕໍ່ຫັນສູ່ການປະຕິບັດວຽກງານ 3 ສ້າງຢູ່ທ້ອງຖິ່ນຢ່າງແຂງແຮງ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII(2011-2015), ການສໍາຫຼວດພົນລະເມືອງທົ່ວປະເທດ ຄັ້ງທີ 4 ໃນປີ 2015, ໄປພ້ອມກັບການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຊຶ່ງເປັນການສ້າງແຜນທີ່ເນັ້ນໃສ່ຜົນໄດ້ຮັບ.
ຄໍາເຫັນ