ການກຳເນີດຂອງກຳລັງ ປກສ ປະຊາຊົນ ແມ່ນສຸດທີ່ມີຄວາມໝາຍສຳຄັນ, ເປັນເຫດການທາງການເມືອງ ອັນໃຫຍ່ຫຼວງໃນປະຫວັດສາດຂອງຊາດລາວເຮົາ; ນັບແຕ່ມື້ສ້າງຕັ້ງເປັນຕົ້ນມາ ກຳລັງ ປກສ ປະຊາຊົນໄດ້ເອົາໃຈໃສ່ປະຕິບັດ 3 ໜ້າທີ່ 4 ການພົວພັນ ທັງເຄື່ອນໄຫວປ້ອງກັນ, ຝຶກແອບຮ່ຳຮຽນ, ປັບປຸງກໍ່ສ້າງກຳລັງ, ເພີ່ມພູນຜະລິດ ຜົນ, ສ້າງພະລາທິການກັບທີ່, ລົງຂົນຂວາຍກໍ່ສ້າງຮາກຖານ ຊຶ່ງໄດ້ຮັບຄວາມຮັກແພງ, ອຸ້ມຊູຊ່ວຍເຫຼືອຈາກປະຊາ ຊົນໄດ້ເປັນຢ່າງດີ ເຮັດໃຫ້ກຳລັງ ປກສ ມີຄວາມເຕີບໃຫຍ່ເຂັ້ມແຂງເປັນກ້າວໆມາ, ບັນດາກຳລັງວິຊາສະເພາະໄດ້ຮັບການປັບປຸງ ແລະ ພັດທະນາຢ່າງຕໍ່ເນື່ອງ, ເພື່ອຮັບປະກັນເຮັດໃຫ້ປະເທດຊາດມີສະຖຽນລະພາບທາງດ້ານການ ເມືອງຢ່າງໜັກແໜ້ນ, ສັງຄົມມີຄວາມສະຫງົບ ເປັນລະບຽບຮຽບຮ້ອຍໂດຍພື້ນຖານ, ຕ້ານ-ສະກັດກັ້ນອາຊະຍາກຳທຸກປະເພດ ແລະ ແກ້ໄຂປະກົດການຫຍໍ້ທໍ້ຕ່າງໆ ຢ່າງແຂງແຮງ ອັນພົ້ນເດັ່ນໄດ້ເປັນເຈົ້າການໃນການຫັນເອົາກຳລັງລົງກໍ່ສ້າງຮາກຖານການເມືອງຢູ່ບັນດາເຂດຈຸດສຸມ, ຫຼໍ່ແຫຼມ ເຮັດໃຫ້ຮາກຖານມີຄວາມສະຫງົບ, ຕີຕ້ານ ແລະ ແກ້ໄຂບັນຫາໜໍ່ແໜງຄວາມບໍ່ສະຫງົບຢ່າງເປັນເຈົ້າການ, ມີຄວາມຄ່ອງແຄ້ວ ແລະ ຮັບປະກັນ ສຸມໃສ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄດ້ຮັບໝາກຜົນຕົວຈິງ ເຮັດໃຫ້ບັນຫາຢາເສບຕິດໄດ້ຮັບການສະກັດກັ້ນ, ແກ້ໄຂຢ່າງຕໍ່ເນື່ອງ, ແກ້ໄຂກຸ່ມແກ້ງສໍ້ໂກງຊັບທາງໂທລະຄົມ (ຄໍເຊັນເຕີ, ສະແກມເມີ) ສະກັດກັ້ນ-ແກ້ໄຂບັນຫາການຄ້າມະນຸດ, ການສວຍໃຊ້ສື່ສັງຄົມອອນລາຍໃນທາງບໍ່ຖືກຕ້ອງ ແລະ ປະກົດການຫຍໍ້ທໍ້ຕ່າງໆ ໃນສັງຄົມ; ເອົາໃຈໃສ່ໃນການປ້ອງກັນ 3 ວັນປະຫວັດສາດ, ວັນສະຖາປະນາ ສປປ ລາວ ຄົບຮອບ 50 ປີ, ກອງປະຊຸມໃຫຍ່ຄັ້ງທີ XII ຂອງພັກ, ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ X, ສະມາຊິກສະພາປະຊາຊົນແຂວງ ຊຸດທີ V ແລະ ງານມະຫະກຳກິລາແຫ່ງຊາດ ຄັ້ງທີ XII ມີຄວາມສະຫງົບປອດໄພ 100%; ພ້ອມນັ້ນ, ຍັງໄດ້ເພີ່ມທະວີການພົວພັນຮ່ວມມືກັບກໍາລັງ ປກສ ບັນດາປະເທດເພື່ອນມິດຍຸດທະສາດ, ບັນດາປະເທດກຸ່ມອາຊຽນ ແລະ ບັນດາປະເທດຕ່າງໆ ໃນພາກພື້ນ ແລະ ໃນທົ່ວໂລກ ເຮັດໃຫ້ກຳລັງ ປກສ ປະຊາຊົນລາວ ມີບົດບາດພົ້ນເດັ່ນຂຶ້ນໃນເວທີສາກົນ.
ຜ່ານການປະຕິບັດໜ້າທີ່ຂອງກຳລັງ ປກສ ປະຊາຊົນ ຕະຫຼອດໄລຍະຜ່ານມາ, ພັກ-ລັດຖະບານ ໄດ້ຕີລາຄາສູງຕໍ່ຜົນສຳເລັດຫຼາຍດ້ານ ທີ່ກຳລັງ ປກສ ຍາດມາໄດ້; ເຖິງແມ່ນວ່າໄລຍະຜ່ານມາ ສະພາບການຂອງໂລກ, ພາກພື້ນໄດ້ມີການຜັນແປຢ່າງສະຫຼັບສັບຊ້ອນ ສົ່ງຜົນກະທົບຕໍ່ສັນຕິພາບ ແລະ ຄວາມໝັ້ນຄົງຂອງໂລກ, ສະພາບພາຍໃນປະເທດ ຍັງສືບຕໍ່ປະເຊີນກັບຄວາມຫຍຸ້ງຍາກ ແລະ ສິ່ງທ້າທາຍບາງດ້ານກໍຕາມ, ແຕ່ກຳລັງ ປກສ ພວກເຮົາກໍໄດ້ມີຄວາມພະຍາຍາມຢ່າງຕັ້ງໜ້າ, ມີຄວາມສູ້ຊົນບຸກບືນ, ມີຄວາມຮັບຜິດຊອບສູງ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ, ສືບຕໍ່ຮັບປະກັນສະຖຽນລະພາບ ແລະ ຄວາມໝັ້ນຄົງຂອງລະບອບປະຊາທິປະໄຕ ປະຊາຊົນລາວໃຫ້ໜັກແໜ້ນ.
ກຳລັງ ປກສ ຍັງສາມາດຮັກສາບົດບາດເປັນແກ່ນສານ ແລະ ເປັນກຳລັງປະກອບອາວຸດປະຕິວັດອັນແຫຼມຄົມຂອງພັກ ໃນການຮັບປະກັນຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນຂອງຊາດ, ສ້າງເງື່ອນໄຂທີ່ເອື້ອອໍານວຍຄວາມສະດວກໃຫ້ປະເທດຊາດ ໃນການພັດທະນາເສດຖະກິດ-ສັງຄົມ ແລະ ຫຼຸດພົ້ນອອກຈາກປະເທດດ້ອຍພັດທະນາ.
ຈາກຜົນສຳເລັດທີ່ພວກເຮົາຍາດມາໄດ້ໃນໄລຍະຜ່ານມານັ້ນ, ແມ່ນການຈັດຕັ້ງປະຕິບັດແນວທາງຂອງພັກຢ່າງຖືກຕ້ອງ ທັງສອດຄ່ອງກັບສະພາບເງື່ອນໄຂ ແລະ ຈຸດພິເສດຂອງກຳລັງ ປກສ, ແມ່ນໝາກຜົນຂອງຄວາມບາກບັ່ນ, ບຸກບືນສູ້ຊົນດ້ວຍຄວາມມານະອົດທົນ, ເດັດດ່ຽວໜຽວແໜ້ນ ແລະ ມີຄວາມສາມັກຄີອັນເປັນປຶກແຜ່ນ ຂອງສະມາຊິກພັກ, ນາຍ ແລະ ພົນຕໍາຫຼວດ ໃນທົ່ວກໍາລັງ ປກສ ທີ່ໄດ້ຕັ້ງໜ້າທຸ້ມເທເຫື່ອແຮງ, ສະຕິປັນຍາປະກອບສ່ວນເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນ ດ້ວຍຄວາມຮັບຜິດຊອບສູງ ສະແດງໃຫ້ເຫັນວ່າ ພາຍໃຕ້ການນຳພາຂອງພັກກຳລັງ ປກສ ໄດ້ເສີມຂະຫຍາຍທາດແທ້, ມູນເຊື້ອຂອງກຳລັງປະກອບອາວຸດປະຕິວັດ, ຍາມໃດກໍຕອບສະໜອງໄດ້ກັບຄວາມຮຽກຮ້ອງຕ້ອງການຂອງພັກ ແລະ ປະຊາຊົນ ດ້ວຍຄວາມຈົງຮັກພັກດີ, ຊື່ສັດບໍລິສຸດ ແລະ ເດັດດ່ຽວໜຽວແໜ້ນ ເພື່ອກ້າວເດີນຕາມອຸດົມການສັງຄົມນິຍົມ ທີ່ພັກເຮົາໄດ້ກຳນົດໄວ້.
ສັງລວມແລ້ວ ເຫັນວ່າຕະຫຼອດໄລຍະ 65 ປີຜ່ານມາ, ພວກເຮົາໄດ້ເຮັດຫຼ້ອນໜ້າທີ່ອັນໃຫຍ່ຫຼວງ ທີ່ພັກ- ລັດ ແລະ ປະຊາຊົນລາວບັນດາເຜົ່າມອບໝາຍໃຫ້, ແມ່ນໄລຍະທາງທີ່ສະຫວ່າງສະໄຫວ, ມີກຽດສະຫງ່າຊຶ່ງເປັນພື້ນ ຖານອັນໜັກແໜ້ນ ໃນການປັບປຸງກໍ່ສ້າງກຳລັງ ປກສ ປະຊາຊົນໃຫ້ມີລະບຽບແບບແຜນ ແລະ ກ້າວສູ່ຄວາມທັນສະໄໝ.
ເພື່ອອະນາຄົດອັນສົດໃສຂອງປະເທດຊາດ ແລະ ຄວາມເຂັ້ມແຂງຂອງກຳລັງ ປກສ ພວກເຮົາ ຈົ່ງພ້ອມກັນເສີມຂະຫຍາຍທາດແທ້, ມູນເຊື້ອອົງອາດກ້າຫານ, ມູນເຊື້ອອັນສະຫງ່າງາມ, ຜົນງານໄຊຊະນະອັນຫຍິ່ງໃຫຍ່ ທີ່ກຳລັງ ປກສ ປະຊາຊົນຍາດມາໄດ້ ແລະ ສືບຕໍ່ປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ,ປະຕິບັດໜ້າທີ່ການເມືອງໃຫ້ມີໝາກຜົນດີກວ່າເກົ່າ, ນຳພາກຳລັງກ້າວຂຶ້ນດ້ວຍທ່ວງທ່າໃໝ່ຢ່່າງໜັກແໜ້ນ ແລະ ເຂັ້ມ ແຂງຢ່າງບໍ່ຢຸດຢັ້ງ. ເພື່ອເປັນການສະເຫຼີມສະຫຼອງຜົນງານ ແລະ ການເຕີບໃຫຍ່ຂະຫຍາຍຕົວຂອງກຳລັງ ປກສ ປະ ຊາຊົນລາວ ຄົບຮອບ 65 ປີ; ພວກເຮົາໄດ້ຈັດຕັ້ງປະຕິບັດກິດຈະກຳທີ່ຕິດພັນກັບຂະບວນການຕ່າງໆ ແລະ ເນື້ອໃນສະເຫຼີມສະຫຼອງ ເປັນຕົ້ນ ການດຳເນີນຊີວິດການເມືອງທົ່ວກຳລັງ, ຂະບວນການເຄື່ອນໄຫວວິຊາສະເພາະ, ຂະ ບວນການສືບຕໍ່ແກ້ໄຂບັນຫາຢາເສບຕິດ, ເກັບກູ້ອາວຸດເສິກ, ຂະບວນການກິລາ, ສິລະປະວັນນະຄະດີ, ປະດັບປະດາກົມກອງ, ເຄື່ອນໄຫວປາຖະກະຖາຢູ່ບັນດາກະຊວງ-ອົງການ; ລົງພົບປະ ພະນັກງານປະຕິວັດອາວຸໂສບໍານານ, ອະ ດີດຄອບຄົວການນຳກະຊວງ, ລົງຢ້ຽມຢາມພະນັກງານທີ່ເຈັບປ່ວຍຢູ່ໂຮງໝໍ 5 ເມສາ ແລະ ປະຕິບັດນະໂຍບາຍຕໍ່ຄອບຄົວນາຍ ແລະ ພົນຕຳຫຼວດທີ່ເສຍສະຫຼະຊີວິດ ແລະ ໄດ້ຮັບບາດເຈັບ ຈາກການປະຕິບັດໜ້າທີ່ໃນການແກ້ໄຂບັນຫາຢາເສບຕິດ; ໃນແຕ່ລະປີກໍໄດ້ຈັດຕັ້ງໂຮມຊຸມນຸມສະເຫຼີມສະຫຼອງວັນສ້າງຕັ້ງກໍາລັງ ປກສ ຢ່າງເປັນຂະບວນ ຟົດຟື້ນ ແລະ ມີເນື້ອໃນທີ່ມີຄວາມໝາຍສຳຄັນອັນເລິກເຊິ່ງ ສະແດງເຖິງຄວາມເອົາໃຈໃສ່ຂອງຄະນະພັກ-ຄະນະນຳກະຊວງ, ບັນດານາຍ ແລະ ພົນຕຳຫຼວດ ທົ່ວກຳລັງ ປກສ ເພື່ອລະນຶກເຖິງບຸນຄຸນ, ຄຸນງາມຄວາມດີຂອງການນໍາພັກ-ລັດ, ອະດີດນັກຮົບປະຕິວັດທີ່ເສຍສະຫຼະເລືອດເນື້ອເພື່ອປະເທດຊາດ, ເພື່ອປະຊາຊົນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເປັນການຈາລຶກເຖິງບຸນຄຸນ-ຄຸນງາມຄວາມດີຂອງບັນດາທ່ານເຫຼົ່ານັ້ນ ຈາ ລຶກໄວ້ໃນປະຫວັດສາດ ແລະ ຄວາມຊົງຈຳຂອງພວກເຮົາຕະຫຼອດໄປ.
ຂໍອວຍພອນໄຊອັນປະເສີດແດ່ບັນດາທ່ານການນຳພັກ-ລັດ ຈົ່ງມີສຸຂະພາບເຂັ້ມແຂງສືບຕໍ່ນຳພາປະເທດຊາດ ກໍຄືກຳລັງປະກອບອາວຸດ ແລະ ປວງຊົນລາວບັນດາເຜົ່າກ້າວຂຶ້ນສູ່ຈຸດໝາຍທີ່ວາງໄວ້. ອວຍພອນໃຫ້ຄະນະພັກ-ຄະນະບັນຊາແຕ່ລະຂັ້ນ, ນາຍ ແລະ ພົນຕຳຫຼວດ ທົ່ວກຳລັງ ປກສ ຈົ່ງມີສຸຂະພາບເຂັ້ມແຂງ ພ້ອມກັນອອກແຮງສູ້ຊົນ, ບຸກບືນເຮັດສໍາເລັດໜ້າທີ່ ແລະ ຍາດໄດ້ຜົນສຳເລັດໃໝ່ທີ່ຍິ່ງໃຫຍ່ກວ່າເກົ່າ. ອວຍພອນໃຫ້ພະນັກງານປະຕິວັດອາວຸໂສບຳນານ, ພະນັກງານລັດຖະກອນ, ປະຊາຊົນລາວບັນດາເຜົ່າ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ສືບຕໍ່ອູ້ມຊູຊ່ວຍເຫຼືອກຳລັງ ປກສ ພວກເຮົາໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.
ນໍ້າໃຈວັນທີ 5 ເມສາ ໝັ້ນຢືນ !!
ຂ່າວ: ປກສ
ຄໍາເຫັນ