ໂດຍມີ ທ່ານ ກາວີ ເກດດົມລິ ເຈົ້າເມືອງ ທົ່ງມີໄຊ, ມີການນໍາຫຼັກແຫ່ງຂອງເມືອງໃຫ້ການຕ້ອນຮັບ.
ທ່ານ ເຈົ້າເມືອງ ໄດ້ໃຫ້ຮູ້ວ່າ: ໃນໄລຍະ 9 ເດືອນຕົ້ນປີ 2024ຜ່ານມາ ເມືອງແມ່ນໄດ້ສຸມໃສ່ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໂດຍເລັ່ງໃສ່ຊຸກຍູ້ໃຫ້ປະຊາຊົນຜະລິດເປັນສິນຄ້າໃຫ້ຫຼາຍເປັນຕົ້ນແມ່ນການປູກຝັງ ແລະ ລ້ຽງສັດປະເພດຕ່າງໆ, ພ້ອມດຽວກັນຍັງໄດ້ເອົາໃຈໃສ່ໃນການຈັດເກັບລາຍຮັບເຂົ້າງົບປະມານໄດ້ທັງໝົດ 1,684 ລ້ານກວ່າກີບ, ລື່ນແຜນການ 32.84%, ທຽບໃສ່ໄລຍະດຽວກັນເພີ່ມຂຶ້ນ 57.71%. ໃນນີ້: ຮັບຈາກອາກອນ 1,665 ລ້ານກວ່າກີບ ແລະ ຮັບຈາກຊັບສິນ 18 ລ້ານກວ່າກີບ. ດ້ານລາຍຈ່າຍປະຕິບັດໄດ້ 1,499 ລ້ານກວ່າກີບ ເທົ່າກັບ 70.59% ຂອງແຜນການປີ, ທຽບໃສ່ໄລຍະດຽວກັນລຸດລົງ 29.41%. ນອກນີ້, ຍັງໄດ້ເອົາໃຈໃສ່ປັບປຸງຕາໜ່າງເສັ້ນທາງຄົມມະນາຄົມຢູ່ພາຍໃນເມືອງ, ເປັນຕົ້ນແມ່ນ ເສັ້ນທາງລະຫວ່າງ ເມືອງ ຫາ ເມືອງ, ເມືອງ ຫາ ບ້ານ ແມ່ນໄດ້ຮັບການປັບປຸງ ແລະ ຍົກລະດັບໃຫ້ດີຂຶ້ນ ສາມາດທຽວໄດ້ 2 ລະດູ, ເຮັດໃຫ້ການໄປ-ມາ ແລະ ຂົນສົ່ງສິນຄ້າກະສິກໍາໄດ້ສະດວກ.
ໂອກາດດັ່ງກ່າວ, ທ່ານເຈົ້າແຂວງ ໄດ້ເນັ້ນໜັກໃຫ້ການນໍາຂອງເມືອງສືບຕໍ່ເອົາໃຈໃສ່ເພີ່ມທະວີສືກສາອົບຮົມການເມືອງແນວຕິດໃຫ້ພະນັກງານ-ນັກຮົບ, ປະຊາຊົນບັນດາເຜົ່າໃຫ້ເຖິງຖອງຕົວຈິງ, ສືບຕໍ່ນໍາເອົາກໍາລັງປະກອບອາວຸດລົງປະຈໍາຢູ່ບ້ານລຽບຊາຍແດນເພື່ອປັບປຸງຮາກຖານໃຫ້ເຂັ້ມແຂງ ແລະ ເປັນການປ້ອງກັນບໍ່ໃຫ້ກຸ່ມຄົນບໍ່ດີເຂົ້າມາກໍ່ຄວາມບໍ່ສະຫງົບໄດ້, ສືບຕໍ່ຕິດຕາມ ແລະ ຊຸກຍູ້ການເກັບກູ້ພືດລະດູປີຂອງປະຊາຊົນ ພ້ອມທັງຊຸກຍູ້ການປູກພືດເປັນສິນຄ້າໃນລະດູແລ້ງ, ສືບຕໍ່ຍູ້ຂະບວນການຕ່າງໆເປັນຕົ້ນແມ່ນໂຄງການຍົກລະດັບເສັ້ນທາງ, ໂຄງການກໍ່ສ້າງອ່າງນໍ້າປະປາໃຫ້ສໍາເລັດຕາມແຜນການທີ່ວາງໄວ້, ເອົາໃຈໃສ່ກະກຽມກອງປະຊຸມໃຫຍ່ຂອງເມືອງຮັບປະກັນໃຫ້ໄດ້ດ້ານເນື້ອໃນ, ຂະບວນການປິ່ນອ້ອມ ແລະ ບຸກຄະລາກອນ. ຈາກນັ້ນ ທີມງານຂອງທ່ານເຈົ້າແຂວງກໍໄດ້ລົງເບິ່ງໂຄງການຍົກລະດັບເສັ້ນທາງ, ໂຄງການກໍ່ສ້າງອ່າງນໍ້າປະປາ, ຢ້ຽມຢາມອ້າຍນ້ອງທະຫານຊາຍແດນທີ່ປະຈໍາການຢູ່ປ່ອມຊາຍແດນ ແລະ ໄດ້ມອບໄຟຟ້າແສງຕາເວັນໃຫ້ປ່ອມຊາຍແດນຈໍານວນ 5 ຊຸດ.
(ຂ່າວ-ພາບ: ອຸ່ນເຮືອນ ໂພທິລັກ)
ຄໍາເຫັນ