ຂ່າວຕ່າງປະເທດລາຍງານ ເມື່ອບໍ່ດົນມານີ້, ທະນາຄານເພື່ອການພັດທະນາແຫ່ງອາຊີ (ADB) ໄດ້ປັບຫຼຸດການຄາດຄະເນການຂະຫຍາຍຕົວທາງດ້ານເສດຖະກິດຂອງປະເທດກຳລັງພັດທະນາໃນອາຊີລົງເຫຼືອ 4,7% ໃນປີ 2023 ເພາະອັດຕາດອກເບ້ຍຢູ່ໃນໄລຍະຂາຂຶ້ນ ແລະ ບັນຫາອະສັງຫາລິມະຊັບໃນຈີນ.
ການປັບຫຼຸດໂຕເລກການຄາດຄະເນຂອງ ADB ຄັ້ງນີ້ຕໍ່າກວ່າການຄາດຄະເນໃນເດືອນເມສາຜ່ານມາ ທີ່ຄາດວ່າ GDP ຈະມີການຂະຫຍາຍຕົວ 4,8% ພ້ອມທັງຄາດວ່າການເຕີບໂຕໃນຈີນມີທ່າອ່ຽງຈະຢູ່ທີ່ 4,9% ໃນປີນີ້ ຊ້າກວ່າການຂະຫຍາຍຕົວ 5% ຈາກປີຜ່ານມາ. ADB ຊີ້ໃຫ້ເຫັນວ່າ ຄວາມຕ້ອງການທົ່ວໂລກທີ່ອ່ອນແອລົງສົ່ງຜົນໃຫ້ການສົ່ງອອກຕົກຕ່ຳ ກິດຈະກຳທາງດ້ານເສດຖະກິດໄດ້ຮັບການສະໜັບສະໜູນຈາກການຟື້ນຕົວຂອງການທ່ອງທ່ຽວ ແລະ ຄວາມຕ້ອງການພາຍໃນປະເທດທີ່ແຂງແຮງ. ນອກຈາກນີ້, ADB ຍັງກ່າວເຖິງຄວາມສ່ຽງ 3 ປະການທີ່ມີຕໍ່ທ່າອ່ຽງການຂະຫຍາຍຕົວຂອງເສດຖະກິດໄດ້ແກ່ ຜົນກະທົບຂອງຄວາມອ່ອນແອໃນພາກອະສັງຫາລິມມະຊັບຂອງຈີນ, ການຢຸດສະງັກຂອງການສະໜອງເປັນໄລຍະໆຂອງຣັດເຊຍ ແລະ ການຄວບຄຸມການສົ່ງອອກທ່າມກາງຄວາມສ່ຽງຂອງໄພແຫ້ງແລ້ງ ແລະ ນ້ຳຖ້ວມທີ່ເກີດຈາກແອວນີໂຢ. ທ່ານ ອັນເບີດ ພຣາກ ຫົວໜ້ານັກເສດຖະສາດຂອງ ADB ກ່າວວ່າ: ການພັດທະນາໃນອາຊີຍັງຄົງຂະຫຍາຍຕົວຢ່າງແຂງແຮງ ແລະ ແຮງກົດດັນດ້ານເງິນເຟີ້ກໍຫຼຸດລົງ ທະນາຄານກາງບາງແຫ່ງໃນພາກພື້ນເລີ່ມຫຼຸດອັດຕາດອກເບ້ຍລົງ ຊຶ່ງຈະຊ່ວຍກະຕຸ້ນການເຕີບໂຕໄດ້ເປັນຢ່າງດີ.
ນອກຈາກນີ້, ADB ຍັງປັບຫຼຸດການຄາດຄະເນການຂະຫຍາຍຕົວຂອງອິນເດຍລົງເຫຼືອ 6,3% ຈາກ 6,4% ເນື່ອງຈາກການລົງທຶນພາກລັດໃນອິນເດຍຍັງຄົງແຂງແຮງ ແລະ ຈະຍັງຄົງຂັບເຄື່ອນການເຕີບໂຕຕໍ່ໄປ ສ່ວນຄວາມຕ້ອງການໃນປະເທດກໍມີຄວາມແຂງແຮງເຊັ່ນດຽວກັບປະເທດອື່ນໆໃນພາກພື້ນ. ທັງນີ້, ADB ຍັງຊີ້ໃຫ້ເຫັນວ່າ ອັດຕາເງິນເຟີ້ໃນປະເທດກຳລັງພັດທະນາໃນອາຊີ ແລະ ປາຊີຟິກຈະຫຼຸດລົງເຫຼືອ 3,6% ໃນປີ 2023 ຫຼຸດລົງຈາກການຄາດຄະເນກ່ອນໜ້ານີ້ 4,2% ພ້ອມທັງຄາດຄະເນວ່າ ອັດຕາເງິນເຟີ້ໃນປີ 2024 ຈະເພີ່ມຂຶ້ນ 3,5%.
ຄໍາເຫັນ