ທ່ານ ຫວາງ ເຕີ ສວນ ໄດ້ລາຍງານວ່າ: ບໍລິສັດ ລາວຄາຍຢວນ ບໍ່ແຮ່ຈໍາກັດ ຜູ້ດຽວ ໄດ້ສ້າງຕັ້ງຂຶ້ນ ໃນປີ 2009 ໂດຍອາໄສຊັບພະຍາກອນໂປຕາສຊຽມ ທີ່ອຸດົມສົມບູນໃນການຂຸດຄົ້ນ ແລະ ປຸງແຕ່ງເປັນຫຼັກ, ບໍລິສັດມຸ່ງໝັ້ນທີ່ຈະສ້າງເປັນກຸ່ມອຸດສາຫະກຳຕ່ອງໂສ້ສໍາລັບການຊົມໃຊ້ຊັບພະຍາກອນໂປຕາສຊຽມຢ່າງຮອບດ້ານ, ຮອດທ້າຍປີ 2024 ບໍລິສັດໄດ້ສໍາເລັດການລົງທຶນທັງໝົດ 1 ຕື້ໂດລາສະຫະລັດ, ມີມູນຄ່າການຜະລິດປະຈຳປີ 250 ລ້ານໂດລາສະຫະລັດ, ສະໜອງວຽກເຮັດງານທຳໄດ້ 3,000 ກວ່າຕໍາແໜ່ງ, ໄດ້ມອບພັນທະດ້ານພາສີ-ອາກອນໃຫ້ລັດຖະບານ ລາວ ໄດ້ທັງໝົດ 150 ລ້ານໂດລາສະຫະລັດ ແລະ ປະກອບສ່ວນ ປະມານ 9.4 ລ້ານໂດລາ ເຂົ້າໃນການພັດທະນາ-ຊຸກຍູ້ເສດຖະກິດທ້ອງຖິ່ນ, ຍົກສູງຜົນປະໂຫຍດທາງສັງຄົມ, ບໍລິສັດໄດ້ໃຫ້ຄວາມສຳຄັນ ແລະ ຕອບສະໜອງຢ່າງຕັ້ງໜ້າຕໍ່ຄວາມຮຽກຮ້ອງຂອງລັດຖະບານ, ໄດ້ຊຸກຍູ້ສົ່ງເສີມວຽກງານການຫັນເປັນ ນິຄົມອຸດສາຫະກຳ ເສດຖະກິດໝູນວຽນ ລາວຄາຍຢວນ ຢ່າງເຕັມທີ່ ແລະ ໄດ້ຍື່ນໜັງສືສະເໜີກ່ຽວກັບການຫັນເປັນນິຄົມອຸດສາຫະກຳ ໃຫ້ແກ່ພາກສ່ວນທີ່ກ່ຽວຂ້ອງເປັນທີ່ຮຽບຮ້ອຍ.
ເຂດນິຄົມອຸດສາຫະກຳ ເສດຖະກິດໝູນວຽນຂອງບໍລິສັດ ລາວຄາຍຢວນ ບໍ່ແຮ່ຈຳກັດ ຜູ້ດຽວ ຕັ້ງຢູ່ບ້ານນາມະລາດ ເມືອງທ່າແຂກ ແຂວງຄຳມ່ວນ, ມີເນື້ອທີ່ທັງໝົດ 1,000 ເຮັກຕາ, ໄດ້ຮັບການພັດທະນາແລ້ວປະມານ 300 ເຮັກຕາ ສ່ວນທີ່ເຫຼືອ 700 ເຮັກຕາ ຄາດວ່າຈະສ້າງສໍາເລັດໃນອີກ 3-5 ປີຕໍ່ໜ້າ. ໂຄງການສະເໜີໃນເຂດນິຄົມອຸດສາຫະກຳ ນັບແຕ່ປີ 2025-2028 ມີການລົງທຶນທີ່ວາງແຜນໄວ້ປະມານ 1 ຕື້ໂດລາສະຫະລັດ.
(ຂ່າວ-ພາບ: ກອງຄໍາ)
ຄໍາເຫັນ