ທ່ານ ເບລຍ ໄດ້ບັນລະຍາຍທີ່ມະຫາວິທະຍາໄລເລສເຕີ ວ່າ: ປະສິດທິພາບການຜະລິດ (Productivity) ໄດ້ຫຼຸດລົງຢ່າງຫຼວງຫຼາຍເມື່ອທຽບໃສ່ກັບໄລຍະເກີດວິກິດການທາງການເງິນສົ່ງຜົນກະທົບຕໍ່ມາດຕະຖານການດໍາລົງຊີວິດ, ແນວໃດກໍຕາມ, ປະຫວັດສາດໄດ້ພິສູດແລ້ວວ່າເຕັກໂນໂລຊີໃໝ່ໆສາມາດຊຸກຍູ້ການເຕີບໂຕຂອງເສດຖະກິດໄດ້.
ທ່ານ ເບລຍ ເຫັນວ່າ:AI ມີຄວາມສາມາດທີ່ຈະເປັນເຕັກໂນໂລຊີທີ່ເພີ່ມປະສິດທິພາບການຜະລິດໄດ້ຄືກັນກັບເຕັກໂນໂລຊີເຄື່ອງຈັກໄອນ້ຳ ແລະຄອມພິວເຕີໃນສະໄໝກ່ອນເຄີຍເຮັດໄວ້ ຊຶ່ງຈະມີຄວາມສຳຄັນສຳລັບອັງກິດ ທີ່ກຳລັງປະເຊີນໜ້າກັບບັນຫາສັງຄົມຜູ້ອາຍຸສູງ.
ຜູ້ວ່າການທະນາຄານແຫ່ງອັງກິດກ່າວວ່າ:ຄວາມຈຳເປັນໃນການນໍາໃຊ້ເຕັກໂນໂລຊີເພື່ອເພີ່ມຄວາມສາມາດຂອງແຮງງານມະນຸດ ແລະ ຊຸກຍູ້ທ່າແຮງທາງດ້ານເສດຖະກິດທີ່ມີຄວາມເລັ່ງດ່ວນຫຼາຍຂຶ້ນ.ດັ່ງນັ້ນ, ຈຶ່ງມີຄວາມເຫັນວ່າພວກເຮົາຕ້ອງສົ່ງເສີມການເຕີບໂຕຂອງ AI.
ທ່ານ ເບລຍ ເນັ້ນໜັກວ່າ: ບໍ່ມີຄວາມກັງວົນວ່າ AI ຈະຍາດວຽກເຮັດງານທຳຂອງມະນຸດ. ໂດຍປຽບທຽບກັບເຕັກໂນໂລຊີໃນໄລຍະປະຕິວັດອຸດສາຫະກໍາ ຊຶ່ງບໍ່ໄດ້ສົ່ງຜົນໃຫ້ເກີດການວ່າງງານໃນວົງກວ້າງແລະເຫັນວ່າເປັນເລື່ອງຂອງຄົນທີ່ໃຊ້ AI ຫຼາຍກວ່າທີ່AIຈະມາແທນຄົນ.
ນອກຈາກນີ້, ຜູ້ວ່າການ BoE ຍັງກ່າວວ່າ:ໃນຂະນະທີ່ການຄ້າມີຄວາມສໍາຄັນໃນການເລັ່ງຄວາມກ້າວໜ້າດ້ານເຕັກໂນໂລຊີ, ແຕ່ລະບົບການຄ້າໃນປັດຈຸບັນກໍາລັງປະເຊີນກັບຄວາມບໍ່ສົມດູນຢ່າງຮ້າຍແຮງ. ໂດຍສະເພາະກັບຈີນທີ່ມີການເກີນດຸນການຄ້າຢ່າງຫຼວງຫຼາຍ ຊຶ່ງບັນຫານີ້ພວມສ້າງຄວາມກົດດັນໃຫ້ຫຼາຍປະເທດຫັນກັບມາໃຊ້ມາດຕະການພາສີໃນລະດັບທີ່ສູງຂຶ້ນ.
ຄໍາເຫັນ