ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ອັງກໍ ເອັນເຕີໄພຣ ໄດ້ເປີດເຜີຍບົດລາຍງານໂດຍລະບຸວ່າ: ໃນເດືອນມັງກອນ 2024 ອັງກໍວັດຂອງກຳປູເຈຍມີນັກທ່ອງທ່ຽວຕ່າງປະເທດມາຢ້ຽມຢາມເຖິງ 115.532 ຄົນ ເພີ່ມຂຶ້ນ 49% ຈາກ 77.436 ຄົນ ໃນເດືອນດຽວກັນຂອງປີຜ່ານມາ.
ອັງກໍວັດ ສາມາດສ້າງລາຍໄດ້ຈາກການຈຳໜ່າຍບັດເຂົ້າຊົມເຖິງ 5,5 ລ້ານໂດລາໃນເດືອນມັງກອນ ເພີ່ມຂຶ້ນ 51% ຈາກ 3,64 ລ້ານໂດລາ ຂອງເດືອນດຽວກັນໃນປີ 2023. ອີກຢ່າງໜຶ່ງ, ອັງກໍວັດມີຂະໜາດ 401 ກິໂລຕາແມັດ ຕັ້ງຢູ່ແຂວງສຽມຣຽບທາງພາກຕາເວັນຕົກສ່ຽງເໜືອຂອງກຳປູເຈຍເປັນທີ່ຕັ້ງຂອງວັດບູຮານ 91 ແຫ່ງ ຊຶ່ງຖືກກໍ່ສ້າງຂຶ້ນລະຫວ່າງສະຕະວັດທີ 9-13. ອັງກໍວັດຖືກຈັດເປັນແຫຼ່ງມໍລະດົກໂລກໂດຍອົງການ UNESCO ເມື່ອປີ 1992 ແລະ ເປັນຈຸດໝາຍທ່ອງທ່ຽວຍອດນິຍົມທີ່ສຸດຂອງກຳປູເຈຍ. ທ່ານ ທົບ ໂສພຽກ ລັດຖະມົນຕີກະຊວງການທ່ອງທ່ຽວ ແລະ ໂຄສົກກະຊວງການທ່ອງທ່ຽວເປີດເຜີຍວ່າ: ສະໜາມບິນສາກົນສຽມຣາດ ອັງກໍ ຊຶ່ງເປີດດຳເນີນການຢ່າງເປັນທາງການເມື່ອເດືອນພະຈິກ 2023 ໃນຮູບແບບການຄ້າ ຈະດຶງດູດນັກທ່ອງທ່ຽວຈາກຕ່າງປະເທດມາຍັງອັງກໍວັດຫຼາຍຂຶ້ນ. ທ່ານ ໂສພຽກ ກ່າວຕື່ມວ່າ: ສະໜາມບິນແຫ່ງຊາດນີ້ມີບົດບາດສຳຄັນຕໍ່ການຊ່ວຍກະຕຸ້ນການທ່ອງທ່ຽວ ເສດຖະກິດ, ການຄ້າ ແລະ ການລົງທຶນຂອງປະເທດ.
ປັດຈຸບັນ, ສະໜາມບິນສາກົນລະດັບ 4E ທີ່ມີຣັນເວຍາວ 3.600 ແມັດດັ່ງກ່າວ ເປັນສະໜາມບິນຂະໜາດໃຫຍ່ທີ່ສຸດໃນກຳປູເຈຍ ແລະ ເປັນປະຕູເຊື່ອມຕໍ່ສຳຄັນສູ່ອັງກໍວັດ.
ຄໍາເຫັນ